މޫނު ނިވާކޮށްގެން ތިބި ބަޔަކު ހުޅުމާލެ ޓޭކްއަވޭ ހަދާ ކެފޭއަކަށް ގެއްލުންދިން މައްސަލައިގައި ބަލައިފާސްކުރި އެޕާޓްމެންޓަކުން މަސްތުވާތަކެތި ފެނިގެން، ހަތް މީހަކު ހައްޔަރު ކޮށްފިއެވެ.
ހުޅުމާލޭގެ ޖޫސް ޓައިމްއަށް ގެއްލުން ދިން މައްސަލައިގައި މިއަދު ފުލުހުން ބުނެފައިވަނީ ފެބްރުއަރީ 17 ވަނަ ދުވަހުގެ ރޭ ހުޅުމާލޭގެ ޖޫސް ޓައިމް އަށް ވަދެ ގެއްލުންދީފައިވާ މައްސަލައިގައި އިއްޔެ ހުޅުމާލެ އެޕާޓްމެންޓެއް ބަލައިފާސްކޮށްފައިވާ ކަމަށެވެ.
ފުލުހުން ބުނެފައިވަނީ ޖޫސް ޓައިމްއަށް ބަޔަކު ވަދެ ގެއްލުންދީފައިވާ މައްސަލައާ ގުޅިގެން ފެބްރުވަރީ 28 ވަނަ ދުވަހު ކޯޓު އަމުރެއްގެ ދަށުން ހުޅުމާލޭގެ އެޕާޓްމަންޓެއް ބަލައި ފާސްކޮށްފައިވާކަމަށެވެ. މި އެޕާޓްމަންޓް ބަލައިފާސްކުރިއިރު، މާރާމާރީ ހިންގުމަށް ބޭނުންކުރާ ބައެއް ތަކެއްޗާއި މަސްތުވާތަކެތި ފެނުމާ ގުޅިގެން 7 މީހަކު ވަނީ ހައްޔަރުކޮށްފައި ކަމަށެވެ.
މި މީހުންގެ ތެރޭގައި އަންހެނަކުވެސް ހިމެނޭ ކަމަށާއި، މި އެންމެންނަކީވެސް ދިވެހިން ކަމަށް ފުލުހުން ވަނީ ބުނެފައެވެ. މިމައްސަލަ ފުލުހުން ދަނީ ތަހުގީގު ކުރަމުންނެވެ.
އެ ކެފޭއަށް ހަމަލާ ދޭ މަންޒަރު ފެންނަ ވީޑިއޯ މީސް މީޑިއާގައި އާއްމު ވިއެވެ. އެ ވީޑިއޯއިން ފެނިގެން ދަނީ ކަޅު ކުލައިގެން ޓީޝާޓު ލައިގެން ތިބި ދެ މީހަކު ކެފޭ ކައިރިއަށް ސައިކަލު މަޑު ކުރުމަށްފަހު، މަރުތޭލެއް ކަހަލަ އެއްޗެއް ހިފައިގެން ކެފޭ ތެރެއަށް ވަދެ ގެއްލުންދޭ މަންޒަރެވެ. ވީޑިއޯއިން ފެންނަ ގޮތުގައި އެމީހުން ތިބީ ވެސް މޫނު ނުފެންނަ ގޮތަށް މާސްކް އާއި ހެލްމެޓް ވެސް އަޅައިގެންނެވެ.
