ކުރިއަށް އޮތް ރިޔާސީ އިންތިޚާބުގައި އިދިކޮޅު ޕީޕީއެމްއިން ވާދަކުރާނެކަމަށް ނިންމާފައިވާ އެޕާޓީގެ ރައީސް ޔާމީންގެ ފަހަތްޕުޅުގައި މުޅި ޕާޓީ އޮތީ ގަދަކޮށް ކަމުގައި ޕްރޮގްރެސިވް ކޯލިޝަނުން ބުނެފިއެވެ.
ރިޔާސީ އިންތިޚާބަށް ގާތްވަމުންދާއިރު ރިޔާސީ އިންތިޚާބު އެއްބުރުން ކާމިޔާބު ކުރުމަށް ސަރުކާރު ހިންގާ މައި ޕާޓީ އެމްޑީޕީީން ދަނީ މަސައްކަތް ކުރަމުންނެވެ. އެމްޑީޕީގެ ކެނޑިޑޭޓް ރައީސް ޞާލިހު ޕާޓީތަކާއި ކޯލިޝަން ހެދުމަށް ފޮނުވާފައިވާ ދައުވަތު ގަބޫލުކޮށް މިހާތަނަށް އަދާލަތު ޕާޓީއާއި އެމްޑީއޭއިން ވަނީ ކޯލިޝަން ހެދުމަށް ނިންމާފައެވެ. އެމްޑީއޭއިން އެމްޑީޕީއާއި ކޯލިޝަން ހަދަން ނިންމާފައިވަނީ ޕީޕީއެމްއާއިއެކުވެސް ކޯލިޝަން މަޝްވަރާތައް ކުރުމަށް ފަހުއެވެ.
އެމްޑީއޭއާއި 2013 ވަނަ އަހަރުގެ ރިޔާސީ އިންތިޚާބު ޕީޕީއެމްއާއި ކާމިޔާބު ކުުރުމަށް އެންމެ ބޮޑަށް މަސައްކަތްކުރި އެއް ޕާޓީއެވެ. އަދި ގިނަ ދުވަސްތަކެއް ވަންދެން އެމްޑީއޭއިން ވަނީ ޕީޕީއެމްއާއިއެކު މަސައްކަތް ކޮށްފައެވެ. އެމްޑީއޭގެ ލީޑަރު އަހުމަދު ސިޔާމަކީ ރައީސް ޔާމީންގެ ވަރަށް އަރިސް ބޭފުޅެކެވެ.
އެމްޑީއޭއިން އެމްޑީޕީއާއި ކޯލިޝަން ހެދުމަށް ނިންމުމާއި ގުޅިގެން ޕީޕީއެމްގެ ލީޑަރޝިޕްގައި ހިމެނި ވަޑައިގަންނަވާ ގިނަ ބޭފުޅުން ވަނީ އެމްޑީއޭގެ ނިންމުމާއި ގުޅިގެން ޕީޕީއެމްގެ މެމްބަރުން ތިބި އަޒުމަކަށް ގުޑުމެއް ނާންނާނެކަމަށް ބުނެފައެވެ. ޕީޕީއެމްގެ ނައިބް ރައީސް މުހައްމަދު ޣައްސާން މައުމޫން ވިދާޅުވީ މިހާލަތުގައި ޕީޕީއެމް އޮތީ ރައީސް ޔާމީންގެ ފަހަތްޕުޅުގައި ނުގުޑާފަދަ އަޒުމެއްގައި ހިތްވަރާއިއެކު ގަދަކޮށް ކަމަށެވެ.
ރައީސް ޔާމީންގެ ލަފާފުޅާއި އެކު މުޅި ޕީޕީއެމް، ކެތްތެރިކަމާއި އިހުލާސްތެރި ކަމާއިއެކު އެއް އަޒުމެއްގައި ގަދަ ހިތްވަރުގަ ސާބިތުވެ މަސައްކަތުގަ އެބަތިބީން. އިރާދަ ކުރެއްވިއްޔާ އިންތިޚާބު ކާމިޔާބު ކުރާނީ ރައީސް ޔާމީން.
– ޣައްސާން ވިދާޅުވިއެވެ.
އިދިކޮޅު ޕީއެންސީގެ ނައިބް ރައީސް އާދަމް ޝަރީފް ވިދާޅުވީ ނުހައްގުން 3 ފަހަރު ރައީސް ޔާމީން ޖަލަށް ލުމުންވެސް ރައްޔިތުންގެ ތާއީދު އޮތީ ރައީސް ޔާމީނަށް ހާމަވާކަމަށެވެ. އަދި ކުރިއަށް އޮތް ދުވަސްތަކުގައި ރައީސް ޔާމީން މިނިވަންކޮށް، އިންތިޚާބު ބޮޑު ތަނުން ކާމިޔާބުކުރާނީ ރައީސް ޔާމީންކަމަށް އާދަމް ޝަރީފް ވިދާޅުވިއެވެ.
ރިޔާސީ އިންތިޚާބުގައި ދިވެހި ރައްޔިތުންގެ އުންމީދަކީ ރައީސް ޔަމީން! އިރާދަކުރެއްވިއްޔާ ރައީސް ޔާމީން މިނިވަންކޮށް، އިންތިޚާބު ކާމިޔާބު ކުރާނަން. ނުހަގުން ތިން ވަނަ ފަހަރަށް ޖަލަށް ލުމުންވެސް ރައްޔިތުންގެ ތާއީދާއި ލޯބި ރައީސް ޔާމީނަށް އެއް ދުވަހުން އަނެއް ދުވަހަށް ދަނީ އިތުރު ވަމުން.
– އާދަމް ޝަރީފް ވިދާޅުވިއެވެ.
ޕީއެންސީގެ ނައިބް ރައީސް އިބްރާހިމް ޝުޖާ ވިދާޅުވީ ރައީސް ޔާމީން ރިޔާސީ އިންތިޚާބުގައި ނިކުންނަވާނީ އެކަނިކަމަށް ގަބޫލު ކުރައްވާ މީހުން އެގަބޫލު ކުރަނީ އަދި ކުށް ހީއެއްކަމަށެވެ. އެމަނިކުފާނުގެ ފަހަތްޕުޅުގައި މިޤައުމުގެ މިނިވަންކަމާއި ސިޔާދަތާއި އިސްތިޤުލާލަށް މަސައްކަތް ކުރާ އެތައް ހާސް ރައްޔިތުންނަށް ތިބިކަމަށް ޝުޖާ ވިދާޅުވިއެވެ.
ޕީ.ޕީ.އެމަށް ވޯޓް ދެއްވުމަށް ނިންމައިގެން ތިއްބެވި ރައްޔިތުން ޔަޤީން ކުރައްވާ! ރައީސް ޔާމީން ރިޔާސީ އިންތިޚާބަށް ނުކުންނަވާނީ އެކަންޏެއްނޫން. ޤައުމުގެ މިނިވަންކަމާއި އިސްތިޤްލާލް އަދި މާތްވެގެންވާ އިސްލާމް ދީނުގެ ހައްޤުގައި މަސައްކަތް ކުރައްވާ އެތައްހާސް ރައްޔިތުންނާއެކު.
– ޝުޖާ ވިދާޅުވިއެވެ.
އަންނަ ރިޔާސީ އިންތިޚާބަށް އިދިކޮޅު ޕީޕީއެމްއިން ކޯލިޝަންގެ މަޝްވަރާތައް ރަސްމީކޮށް ނުފެށި ކަމުގައި ވީނަމަވެސް އެޕާޓީން ދަނީ ނުރަސްމީކޮށް ޕާޓީތަކާއި މަޝަވަރާ ކުރަމުންނެވެ. އިންތިޚާބަށް އެޕާޓީގެ މަސައްކަތް މާ އެދެވޭ ގޮތަކަށް ނުކުރެވެނީ އެޕާޓީން ވާދަކުރަން ނިންމާފައިވާ ރައީސް ޔާމީން ޖަލުގައިި އޮންނެވުމުންނެވެ. ރައީސް ޔާމީން މިނިވަން ކުރުމަށް އެޕާޓީން މަސައްކަތް ކުރަމުންދާއިރު، އެޕާޓީން ނިންމައިގެން ތިބީ ރައީސް ޔާމީނާއިއެކު އިންތިޚާބުގައި ވާދަކޮށް އިންތިޚާބު ކާމިޔާބު ކުރުމަށެވެ.
