މޫނު ނިވާކޮށްގެން ހުޅުމާލޭގެ ކެފޭ އަކަށް އިއްޔެ ވަދެ މަރުތޭލުން އެ ތަނަށް ގެއްލުން ދިން މީހުން ދުއްވި ސައިކަލް ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން ބުނީ ހުޅުމާލޭ "ޖޫސް ޓައިމް" އަށްވަދެ ގެއްލުންދިން މައްސަލައިގައިި ތުހުމަތުކުރެވޭ މީހުން އެވަގުތު ދުއްވި ކަމަށް ބެލެވޭ ސައިކަލް ވަނީ ފުލުހުންގެ ބެލުމުގެ ދަށަށް ގެންގޮސްފައި ކަމަށެވެ.
ފުލުހުން ބުނީ މައްސަލަ ތަހުގީގްކޮށް މައްސަލައިގައި ތުހުމަތތު ކުރެވޭ މީހުން ދެނެގަތުމުގެ މަސައްކަތް ކުރަމުންދާކަމަށެވެ.
ސޯޝަލް މީޑިއާގައި ދައުރުވަމުން ދާ ވީޑިއޯއިން ފެންނަނީ ހެލްމެޓް އަޅައި، މޫނު ނިވާކޮށްގެން ތިބި ދެ ފިރިހެނުން ކެފޭއާ ދިމާލަށް ހިނގައިގަނެގެން ދާ ތަން ފެނުމުން އެ ތަނުގެ ކައުންޓަރުގައި އިން ފިރިހެނަކު އެތެރެއަށް ވަންނަ ތަނެވެ. އޭރު އެ ސަރަހައްދު ބޭރުގައި މިހުން ވެސް ތިއްބެވެ.
ދެ މީހުން އެތެރެއަށް ވަނުމަށްފަހު، އެ މޭޒު މަތީގައި ބަހައްޓާފައި ހުރި އެއްޗެހިތަކެއް ބިން މައްޗަށް އުކާލައި މަރުތޭލުން އެކި ތަންތަނުގައި ތަޅަ އެވެ. އެ ވަގުތު މީހަކު ހަޅޭލަވާ އަޑު ވެސް އިވެއެވެ.
އެ މީހުން ކެފޭއިން ދިއުމުގެ ކުރިން، އެ ތަނުން އެކަކު އެކައުންޓަރުގެ ވަތްގަނޑުން އެއްޗެހިތަކެއް ނަގައިގެން ޖީބަށް ލަ އެވެ. އަދި ސައިކަލުގައި ދެ މީހުން ދިއުމުން އެ ސަރަހައްދާ ދިމާލަށް ބަޔަކު ދުވެފައި ދާތަން ވީޑިއޯއިން ފެނެއެވެ.
