ކުރިޔަށް އޮތް ރިޔާސީ އިންތިޚާބަށް ރައީސް އިބުރާހިމް މުހައްމަދު ސާލިހާއެކު ކޯލިޝަން ހެދުމަށް އެމްޑީއޭގެ ކައުންސިލުން ނިންމާ، އަދި ކުރިޔަށްދިޔަ މަޝްވަރާތަކުގައިވެސް، އެމްޑީއޭގެ އިސް ބޭފުޅެއްގެ ގޮތުގައި ހުންނެވި އެޕާޓީގެ ޑެޕިއުޓީ ލީޑަރުގެ އިތުރުން، ޕީޖީ ލީޑަރުކަމާއި އަދި އިސްތަރުޖަމާންގެ މަގާމުގައިވެސް ހުންނެވި، ކުޑަހުވަދޫ ދާއިރާގެ މެމްބަރު އަހުމަދު އާމިރު ބައިވެވަޑައިގެންފައި ނުވާކަން ހާމަ ވެއްޖެއެވެ.

އެމްޑީއޭއިންވަނީ ކުރިޔަށް އޮތް ރިޔާސީ އިންތިޚާބަށް ކޯލިޝަން ހަދާނޭ އެންމެ ރަގަޅު ޕާޓީއެއް ކަނޑައެޅުމަށްޓަކާ، ވެރިކަންކުރާ ކޯލިޝަންގައި ހިމެނޭ އެމްޑީޕީގެ އިތުރުން އިދިކޮޅު ޕީޕީއެމްއާއެކުވެސް މަޝްވަރާ ކޮށްފައެވެ. އަދި އެމްޑީއޭއިން ބުނެފައިވަނީ، ޖުމުހޫރީ ޕާޓީންވެސް އެޕާޓީއާއެކު ކޯލިޝަން ހެދުމަށް މަޝްވަރާ ކޮށްފައިވާ ކަމުގައެވެ.

މިގޮތުން ކުރެވުނު އެއްވެސް މަޝްވަރާތަކުގައިވެސް އާމިރު ބައިވެރިވެވަޑައިގެންފައި ނުވާއިރު، ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، އެމްޑީޕީއާއެކު ކޯލިޝަން ހެދުމަށް ނިންމި، މިއަދުގެ ކައުންސިލް ބައްދަލުވުމުގައިވެސް އާމިރު ބައިވެރިވެވަޑައިގެންގައި ނުވެއެވެ.

އެމްޑީއޭއިން މުހިންމު ނިންމުންތަކެއް ނިންމި އިރު، އެޕާޓީގެ ޑެޕިއުޓީ ލީޑަރު، އަދި ޕީޖީ ލީޑަރުގެ އިތުރުން، އިސް ތަރުޖަމާންގެ މަގާމްވެސް ފުރުއްވަމުން ގެންދަވާ، މެމްބަރު އާމިރުގެ އެއްވެސް ދައުރެއް ފެނިގެން ގޮސްފައި ނުވަނީ ކޮން ސަބަބަކާހެދި ކަމެއް އަދި ޔަގީން ކުރެވިފައެއް ނުވެއެވެ.

އެމްޑީއޭއިން މިއަދު ބޭއްވި ކައުންސިލް ބައްދަލުވުމުގައި ބައިވެރިވެ ވަޑައިގެންނެވި މެމްބަރުންގެ ތަނަވަސް އަޣުލަބިއްޔަތުން ވަނީ ކުރިޔަސް އޮތް ރިޔާސީ އިންތިޚާބުގައި ރައީސް ޞާލިހަށް ތާއީދުކުރުމަށް ނިންމާފައެވެ. ރައީސް ޞާލިހާއެކު ކުރިއަށްދާން އެޕާޓީން މިއަދު ނިންމާފައިވަނީ، މިކަމަށް ކައުންސިލްގައި ނެގި ވޯޓުގައި ބައިވެރިވި 36 މެމްބަރުންގެ ތެރެއިން 34 މެމްބަރުންގެ ތާއީދާއެކުއެވެ. އެމްޑީޕީއާއެކު ކޯލިޝަން ހެދުމާއި ދެކޮޅަށް މި ބައްދަލުވުމުގައި ވޯޓު ދިނީ 2 މެމްބަރުންނެވެ.

އެމްޑީއޭއިން ހާމަކުރި ގޮތުގައި ދިވެހި ރައްޔިތުންގެ ލާބަޔާ މަންފާއަށްޓަކައި ދިވެހިރާއްޖޭގެ ސިޔާސީ ހަމަޖެހުން ގާއިމްކުރުމަށްޓަކައި އެމްޑީއޭގެ ކައުންސިލް މީޓިން އިން މިއަދު ނިންމާފައިވަނީ ރައީސް ޞާލިހަށް އިތުރު ދައުރެއް ދިނުމަށް މަސައްކަތް ކޮށްދިނުމަށް އެމްޑީޕީއާއެކު ކޯލިޝަން ހެދުމަށް ކަމަށެވެ.

އެމްޑީއޭގެ ނިންމުމަށް ރައީސް ސާލިހުވަނީ މަރުހަބާ ވިދާޅުވެފައެވެ.

އެމްޑީއޭއިން، ރިޔާސީ އިންތިޚާބުގައި ރައީސް ޞާލިހާއެކު ކުރިއަށްދާން ނިންމާފައިވާއިރު، އަދާލަތު ޕާޓީންވެސް ވަނީ ރިޔާސީ އިންތިޚާބުގައި އެމްޑީޕީއާއެކު ކޯލިޝަން ހެދުމަށް ނިންމާފައެވެ.