ތާރުގަނޑު ކަނޑާ މައްސަލާގައި އަސްލަމް ވިދާޅުވީ އެއީ އެކަން ކުރާ ގޮތްކަމަށް

ތާރުގަނޑު ކަނޑާ މައްސަލާގައި އަސްލަމް ވިދާޅުވީ އެއީ އެކަން ކުރާ ގޮތްކަމަށް

އަމީނީ މަގުގެ ތާރު އެޅި ބައިގެ ބައެއް ސަރަހައްދުތަކުން ތާރު ކަނޑާ ނަގަނީ އެކަން އެގޮތަށް ކުރަންޖެހޭތީ ކަމަށާއި، އެއީ އެމަސައްކަތް ކުރާ ގޮތްކަމަށް ޕްލޭނިން މިނިސްޓަރ މުހައްމަދު އަސްލަމް ވިދާޅުވެއްޖެއެވެ.

މިނިސްޓަރ އަސްލަމް މިހެން ވިދާޅުވީ އަމީނީ މަގުގެ މަސައްކަތް ހިނގާ ގޮތާއިމެދު ހުރި ކަންބޮޑުވުންތައް ފާހަގަކުރައްވައި ރައީސް ނަޝީދު ދެއްކެވި ވާހަކަތަކަށް ދެއްވި ރައްދުގައެވެ.

ތާރު އެޅުމަށް ފަހު އަނެއްކާ މައިން ހޯލްތައް، ކާނުތައް މަތީން ތާރު އަޅާފައިވާތީވެ އެބަ ކޮނެ ކަނޑައިގެން އެބަ ނަގާ.

– ރައީސް ނަޝީދު ވިދާޅުވިއެވެ.

ރައީސް ނަޝީދުގެ ވާހަތަކަށް ޖަވާބު ދެއްވަމުން އަސްލަމް ވިދާޅުވީ އަމީނީ މަގުގެ ތާރު މަސައްކަތް ކުރި ސަރަހައްދުތަކުން ތާރުތައް ކަނޑާ ނަގަނީ އެސަރަހއްދުގައި ހުރި ޖަންގްޝަން ހިމެނޭ ސަރަހައްދުގައި އަޅާފައިވާ ތާރުތައް ކަމަށެވެ. އެއީ އާންމުކޮށް ތާރު އަޅާއިރު އަަމަލުކުރާ ގޮތްކަމަށް ވިދާޅުވެ އަސްލަމް ވަނީ ރައީސް ނަޝީދަށް ރައްދު ދެއްވާފައެވެ.

އަމީނީ މަގުގައި ތާރު ކަނޑަނީ ތާރު އަޅާ ނިމޭއިރު ހުރި ޖަންގުޝަންތަކުގެ މަތީގައި އެހުންނަ ކޮންކްރީޓްބައި، ތާރު އަޅަމުންދާއިރު ތާރުއަޅާ ޕޭވަރު ދާނީ އޭގެވެސް މަތިން. އެއީ މަސައްކަތް ކުރާގޮތް. އޭތިކޮޅު ކަނޑާ ނަގާނެ. އެއީ ތުނިތުނިކޮށް ޕޭވަރުހެދިފަ ހުންނަ ތާރުކޮޅެއް. އެތަންކޮޅު ނަގާނެ. އެއީ މަގުގައި ތާރު އަޅާގޮތް.

– އަސްލަމް ވިދާޅުވިއެވެ.

އޭގެ ފަހުން އެހެން މެންބަރަކު ކުރެއްވި ސުވާލަކަށް ޖަވާބު ދެއްވުމަށް ފަހު އަސްލަމް ވަރަށް ހިތްހަމަނުޖެހިވަޑައިގެން ނަޝީދަށް ރައްދު ދެއްވިއެވެ. އެގޮތުން އަމީނީ މަގުގައި ތާރު ކަނޑަނީ މިހާރު ހުރި ޖަންކްޝަންތަކުގެ މަތީގައި ހުރި ކޮންކްރީޓުތަކުގެ މަތި ކަމަށާއި ތާރުގަނޑު ދަނީ އޭގެ ވެސް މަތިން ކަމަށް ވާތީ ކަމަށެވެ.

މާލޭގެ އެންމެ މައި ދެ މަގުގެ ތެރޭގައި ހިމޭނޭ އަމީނީ މަގު، ތާރު އަޅައިގެން ޒަމާނީ ފެންވަރަށް ތަރައްޤީކުރުމުގެ މަސައްކަތް ފެށީ މިދިޔަ އަހަރުގެ އޮގަސްޓުމަހުއެވެ. މި މަސައްކަތް ކުރިއަށްގެންދަނީ ރޯޑް ޑިވެލޮޕްމަންޓް ކޯޕަރޭޝަން އާރްޑީސީންނެވެ. އެގޮތުން މިހާރު އެ ކުންފުނިން ކުރަމުން އަންނަނީ މަގުގެ 4ވަނަ ސެގްމަންޓްގެ މަސައްކަތެވެ.

ފުރަތަމަ 3 ސެގްމަންޓްގައި ހިމެނެނީ، ހެންވޭރުކޮޅުން ފަށައިގެން ސްޓެލްކޯއާއި ހަމައަށެވެ. މި ތިން ސެގްމަންޓްގައި ތާރު އެޅުން ފިޔަވާ ހުރިހާ މަސައްކަތްތައް އާރްޑީސީން ފުރިހަމަކޮށްފައިވެއެވެ. މުޅި މަޝްރޫއުގެ މަސައްކަތް ކުރިއަށްގެންދަނީ، 13 ސެގްމަންޓަކަށް ބަހާލައިގެނެވެ. އާރްޑީސީން މަޢުލޫމާތު ދިން ގޮތުގައި މަގުގެ ބާކީ ސަރަޙައްދުތަކުގައި ތާރު އަޅާނީ އެ ކުންފުނިންނެވެ.

ހިޔާލުފާޅު ކުރައްވާ!

Leave a Reply

Your email address will not be published. Required fields are marked *