ފަނޑިޔާރުންނަށް ފްލެޓް ދިނުމާބެހޭ ސްކީމެއް ނެތް މައްސަލާގައި އިހްތިޖާޖަށް ނިކުތުމަށް ހިތްވަރުދޭ މޭރުމުން ވާހަކަދެއްކެވި ޑްރަގް ކޯޓުގެ ޤާޟީ މުހައްމަދު ނައީމަށް ނަސޭހަތްދޭން ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފިއެވެ.
ޖޭއެސްސީން ވިދާޅުވީ ގިނަ އަދަދެއްގެ ފަނޑިޔާރުން ހިމެނޭ، ފަނޑިޔާރުންގެ މެދުގައި ހިންގާ ވައިބަރ ގްރޫޕެއްގައި، ފޮނުއްވި މެސެޖްތަކަކީ ފަނޑިޔާރު ލިޔެ އެ ގްރޫޕަށް މެސެޖްތަކެއް ފޮނުވިކަމަށް ޤާޟީ އަލްއުސްތާޛު މުޙައްމަދު ނަޢީމް އެއްބަސްވެފައިވާކަމަށެވެ. ޤާޟީ މުޙައްމަދު ނަޢީމް ފޮނުއްވި މި މެސެޖުތަކުގެ ބަސްމަގު ހުރިގޮތުން، ވެރިންނަށް ކުރަން ޖެހޭ އަދަބު އިޙުތިރާމު ކަނޑުވައިލެވި ގަދަރު ކުޑަކުރެވިފައިވާކަމަށްވެސް ޖޭއެސްސީން ވިދާޅުވެފައިވެއެވެ.
އަދި ގާޟީ މުޙައްމަދު ނަޢީމްގެ މި ޢަމަލަކީ، ޤާނޫނު ނަންބަރު 2010/13 (ދިވެހިރާއްޖޭގެ ފަނޑިޔާރުންގެ ޤާނޫނު)ގެ 32 ވަނަ މާއްދާގެ (ހ)ގެ 9 ވަނަ ނަންބަރާއި، ފަނޑިޔާރުންގެ ސުލޫކީ މިންގަނޑުގެ 4.1 ވަނަ ނަންބަރުގައި ކަނޑައަޅާފައިވާ މިންގަނޑާ ޚިލާފު ޢަމަލެއްކަމަށްވާތީ، ޤާނޫނު ނަންބަރު 2008/10 (ޖުޑީޝަލް ސަރވިސް ކޮމިޝަންގެ ޤާނޫނު) ގެ 1-32 ވަނަ މާއްދާގެ (ހ)ގެ 1 ވަނަ ނަންބަރުގެ ދަށުން، ގާޟީ މުޙައްމަދު ނަޢީމަށް ނަޞޭޙަތްދިނުމަށް ފެންނަކަމަށް 2023 ފެބްރުއަރީ 19 ވަނަ ދުވަހު ބޭއްވި އެކޮމިޝަންގެ 13 ޖަލްސާގައި ވަނީ ނިންމަވާފައިކަމަށްވެސް ޖޭއެސްސީން ވިދާޅުވެއެވެ.
