އިނގިރޭސި ޕްރިމިއާ ލީގުގައި ސައުތެމްޓަން އަތުން ޗެލްސީ ބަލިވެ އިތުރު ހާސް ކަމާއި ކުރިމަތިލާން ޖެހިއްޖެއެވެ.
ރޭ އަމިއްލަ ދަނޑުގައި ބަލިވި މެޗުގައި ސައުތެމްޓަންގެ ހަމައެކަނި ގޯލު އެ ޓީމަށް ޖަހައިދިނީ ހިލޭ ޖެހުމަކުން ޖޭމްސް ވޯޑް-ޕްރައުސްއެވެ. ޗެލްސީ އެންމެ ފަހުން ކުޅުނު 14 މެޗުގެ ތެރެއިން މޮޅުވީ އެންމެ ދެ މެޗުންނެވެ. ފަސް މެޗުން ބަލިވިއިރު، އެ ޓީމުގެ ކޯޗު ގްރަހަމް ޕޮޓާ އަށް އޮތް ޕްރެޝަރަށް ލުޔެއް ނެތެވެ.
މި މެޗުގައި ނަތީޖާ ހަމަހަމަ ކުރުމަށް ޗެލްސީން ވަނީ ވަރަށް ބޮޑަށް މަސައްކަތް ކޮށްފައެވެ. ނަމަވެސް އެ ޓީމްގެ ލިބުނު ހުސް ފުރުޞަތުތަކުގެ ބޭނުން ކުރެވިފައި ނުވެއެވެ. ޓްރާންސްފާގައި ކުރި ބޮޑެތި ޚަރަދުތަކާއި އެކު އަދިވެސް ޗެލްސީއަށް ހަމަނޭވާއެއް ލެވޭވަރެއް ނުވެއެވެ.
މި ނަތީޖާއާއެކު ޗެލްސީ މިވަގުތު އޮތީ ތާވަލުގެ 10 ވަނާގައެވެ. އެ ޓީމަށް 23 މެޗުން ލިބިފައި ވަނީ 31 ޕޮއިންޓެވެ. ޗެލްސީ އަތުން މޮޅުވެ ތާވަލުގެ ފުލުގައި އޮތް ސައުތެމްޓަން ވަނީ އުންމީދެއް ހޯދާފައެވެ. އެ ޓީމަށް 23 މެޗުން 18 ޕޮއިންޓް ވަނީ ލިބިފައެވެ.
