ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު (ޓޮމް) ގެ ބައްޕަ ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީއަށް ވެއްދި މައްސަލަ ފެންމަތިވެއްޖެއެވެ.

މެމްބަރު ތޯރިގުވަނީ އޭނާގެ ބައްޕަގެ 2021 ވަނަ އަހަރު އަދާލަތު ޕާޓީއަށް ވައްދާފައިވާކަން އެގޭ ލިޔުންތަކާއިއެކު ސޯޝަލް މީޑިއާގައި މިކަމުގައި ހުރި ކަންބޮޑުވުން ހިއްސާ ކުރައްވާފައެވެ.

ޓޮމް ވިދާޅުވީ އޭނާގެ ބައްޕަ އދ.މަހިބަދޫ، ކަންމަތީގެ، އިބްރާހިމް އާދަމްގެ އެއްވެސް ހުއްދައަކާއި ނުލައި އަދާލަތު ޕާޓީއަށް ވައްދާފައިވާކަމަށެވެ. މިމައްސަލަ ބަލައިދޭން އޭނާގެ ބައްޕަ މިހާރު ކަމާއިބެހޭ ފަރާތްތަކަށް ހުށަހަޅާފައިވާކަމަށް ޓޮމް ވިދާޅުވިއެވެ. އަދި މިފޯމުގައި ސޮއިކުރި މީހަކު ހޯދައި އަޅަންޖެހޭ ފިޔަވަޅު އަޅާނެކަމަށްވެސް މެމްބަރު ތޯރިގު ވިދާޅުވިއެވެ.

އަޅުގަނޑުގެ ބައްޕަ -އދ.މަހިބަދޫ، ކަންމަތީގެ، އިބްރާހިމް އާދަމްގެ ހުއްދައެއްނެތި އަދާލަތު ޕާޓީއަށް ވައްދާފައިވާތީ އެކަން ބަލައިދިނުމަށް ބައްޕަވަނީ އެދިލައްވާފައި. މީއީތޯ އަދާލަތު ޕާޓީއަށް މެންބަރުން އިތުރުކުރި ގޮތަކީ? ފޯމުގައި ސޮއިކުރި ފަރާތްތައް ހޯދާ، ފިޔަވަޅުއަޅާނަން.

– ޓޮމް ވިދާޅުވިއެވެ.

އަޅުގަނޑުގެ ބައްޕަ -އދ.މަހިބަދޫ، ކަންމަތީގެ، އިބްރާހިމް އާދަމްގެ ހުއްދައެއްނެތި އަދާލަތު ޕާޓީއަށް ވައްދާފައިވާތީ އެކަން ބަލައިދިނުމަށް ބައްޕަވަނީ އެދިލައްވާފައި. މީއީތޯ އަދާލަތު ޕާޓީއަށް މެންބަރުން އިތުރުކުރި ގޮތަކީ? ފޯމުގައި ސޮއިކުރި ފަރާތްތައް ހޯދާ، ފިޔަވަޅުއަޅާނަން. pic.twitter.com/nk1dDMNWnk

— Ahmed Thariq (@AhmedThaariq) February 16, 2023

އަދާލަތު ޕާޓީއަށް އޮޅުވާލައިގެން މެމްބަރުން ވައްދާ މައްސަލައަކީ މީގެ ކުރިންވެސް ފެންމަތިވެފައިވާ މައްސަލައެކެވެ. ނަމަވެސް އެޕާޓީން ވަނީ އެކަން ދޮގުކޮށްފައެވެ.

އަދުގެ ސަރުކާރުގެ ބޮޑު ހިއްސާއެއް އޮންނަ އަދާލަތަކީ މިހާތަނަށް މާބޮޑު ކާމިޔާބެއް ހޯދުނު ޕާޓީއެއް ނޫނެވެ. މިހާރު މިއޮތް 19 ވަނަ ރައްޔިތުންގެ މަޖިލީހުގައި ވެސް އެޕާޓީގެ އެންމެ މެންބަރަކު ވެސް ނެތެވެ. އެޕާޓީގެ މެންބަރުން ދައްކަވާ ވާހަކަތަކާއި ގުޅިގެން ބޮޑަށް އަމާޒުވަނީ ފާޑުކިޔުމެވެ.