ބާރުގަދަ ބިންހެލުމެއް އައިސް، ގިނަ އަދަދެއްގެ މީހުން މަރުވެ، އުމްރާނީ ބޮޑެތި ގެއްލުންތަކެއް ލިބިފައިވާ ތުރުކީގައި މިވަގުތު ތިބީ 14 ދިވެހިންކަމަށާއި، ހުރިހާ އެންމެންގެ ހާލުވެސް ރަގަޅުކަމުގައި ފޮރިންގ މިނިސްޓްރީން ބުނެފިއެވެ.
ފޮރިންގ މިނިސްޓްރީން ބައެއް މީޑިއާތަކަށް މައުލުމާތު ދީފައިވާ ގޮތުގައި، މި ހަފްތާގެ ހޯމަދުވަހު ތުރުކީއާއި ސީރިއާއަށް އައި ބާރުގަދަ ބިންހެލުމަށްފަހު އެ މިނިސްޓްރީން ދަނީ މި ދެގައުމުގައި ތިބި ދިވެހިންގެ ހާލުވެސް ގާތުން ބަލަމުންނެވެ. މިގޮތުން ޖެނީވާގައި ހުންނަ ރާއްޖޭގެ ދާއިމީ މިޝަންގައި މިހާތަނަށް ރަޖިސްޓްރީ ކޮށްފައިވަނީ 14 ދިވެހިންކަމަށްވެސް ފޮރިންގ މިނިސްޓްރިން ހާމަ ކޮށްފައި ވެއެވެ.
އަދި މިނިސްޓްރީންވަނީ ތުރުކީގެ ބިންހެލުމުގެ ސަބަބުން އެއްވެސް ބާވަތެއްގެ އެހީތެރިކަމަކަށް ބޭނުންވެއްޖެ ނަމަ އެ މިނިސްޓްރީގެ ހޮޓްލައިން 7983400 އަށް ގުޅުމަށް އިލްތިމާސް ކޮށްފައެވެ. އަދި ވީއެންމެ އަވަހަކަށް ޖެނީވާގައި ހުންނަ ރާއްޖޭގެ ދާއިމީ މިޝަންގައި ރަޖިސްޓްރީ ވުމަށްވެސް މިނިސްޓްރީން އިލްތިމާސް ކުރެއެވެ.
ތުރުކީއަކީ ވިޔަފާރީގެ ބޭނުންތަކުގެ އިތުރުން، މަތީ ތައުލީމަށާއި އަދި ޗުއްޓީ ހޭދަކުރުމަށްވެސް ގިނަ އަދަދެއްގެ ދިވެހިން ގޮސްއުޅޭ ގައުމެކެވެ.
މިންގަޑުން 7.8ގެ ބާރުމިނުގައި ތުރުކީއަށް އައި ބިންހެލުމުގައި، ތުރުކީއާއި ސީރިއާއިން މިހާތަނަށް 19،000 އަށްވުރެ ގިނަ މީހުންވަނީ މަރުވެފައެވެ. އައި މި ބިންހެލުމުގައި މި ސަރަހައްދުތަކުގެ ގިނަ ގެތައް ވަނީ ބިމާއި ހަމަވެފައެވެ. ބިންހެލުން އައިސްފައިވަނީ ތުރުކީގެ ގިޒައިންޓެޕަށް، ހޯމަ ދުވަހުގެ ރޭގެ ދަންވަރު މީހުން ގަދަ ނިދީގައި ތިއްބައެވެ.
ބިންހެލުމުގެ ސަބަބުން ބިމާ ހަމަވެފައިވާ އިމާރާތްތަކުގެ ދަށުން މީހުން ސަލާމަތް ކުރުމަށް، ފިނި ގަދަވުމާއި އަދި ސްނޯ ފައިބަމުން ދިއުމުގެ ސަބަބުން ބޮޑެތި ގޮންޖެހުންތަކާއި ކުރިމަތިވަމުން ދާއިރު، ދުނިޔޭގެ ގައުމުތަކުން ދަނީ މީހުން ސަލާމަތް ކުރުމަށް ކުރިޔަށްދާ އޮޕަރޭޝަންތަކަށް އެހީ ފޯރުކޮށްދެމުންނެވެ.
