އެފްއޭއެމްގެ 17 އަހަރުން ދަށުގެ އިންޓަރ ސްކޫލް ފުޓްބޯޅަ މުބާރާތުގައި ކ. ގުރައިދޫ ސްކޫލާއި ކަލާފާނު ސްކޫލް ބައްދަލު ކުރި މެޗްގައި ގުރައިދޫ ޓީމުގެ ކުޅުންތެރިންނާއި ބެލެނެވެރިން އަދި ޓީމުގެ އޮފިޝަލުންނަށް އެފްއޭއެމްއިން ފިޔަވަޅު އަޅައިފިއެވެ.
1-2 އިން ކަލާފާނު ސްކޫލު މޮޅުވި މެޗްގައި، ކ. ގުރައިދޫ ސްކޫލުގެ ޓީމާއި، ޓީމުގެ އޮފިޝަލުންގެ އިތުރުން ބެލެނެވެރިން ހިންގާފައިވާ ހަމަނުޖެހުންތަކާއި ގުޅިގެން އެމްއޭއެމްއިން އަޅާފައިވާ ފިޔަވަޅަކީ، އެ އެސޯއޭޝަނުން ހިންގާ އެއްވެސް މުބާރާތެއްގައި ބައިވެރި ނުވެވޭގޮތަށް ކުރިޔަށް އޮތް 1 އަހަރަށް، ގުރައިދޫ ޓީމުގެ ކުޅުންތެރިންނާއި އޮފިޝަލުން ސަސްޕެންޑް ކުރުމަށެވެ.
މީގެ އިތުރުން އެފްއޭއޭމްގެ ޑިސިޕްލިނަރީ ކޮމިޓީންވަނީ، ގުރައިދޫ ޓީމުގައި ހިމެނޭ 3 ކުޅުންތެރިއެއް ކަމަށްވާ ހުސެއިން ރަޒީންއާއި މޫސާ އައިލަމް އަދި ހަސަން ރަޒާން 2 އަހަރަށް ސަސްޕެންޑް ކުރުމަށްވެސް ނިންމާފައެވެ.
އޭގެ އިތުރުންވެސް ގުރައިދޫ ޓީމާ ދެކޮޅަށް އަޅާފައިވާ ފިޔަވަޅުތަކުގެ ތެރޭގައި، އެ ޓީމުން ބައިވެރިވާ އެއްވެސް މުބާރާތެއްގައި، 10 މެޗް ހަމަވަންދެން، އެއްވެސް މެޗަކަށް އެޓީމުގެ ސަޕޯޓަރުން ދަނޑަށް ވެއްދުންވެސް ޑިސިޕްލިނަރީ ކޮމިޓީން ވަނީ މަނާ ކޮށްފައެވެ.
އެފްއޭއިން ބުނެފަވަނީ މެޗްގެ އޮފިޝަލުންނަށް، ގުރައިދޫ ޓީމުގެ ކުޅުންތެރިންނާއި އަދި އޮފިޝަލުންވެސް ހަމަލާދޭން މަސައްކަތް ކޮށްފައިވާކަން އެނގެން ހުރިކަމުގައެވެ.
