މަޖިލީގުގެ މިއަދުގެ ޖަލްސާގައި ރިޔާސަތާއި ޒުވާބުކޮށް، އަޑުގަދަ ކޮށް ހެދުމުން މާފަންނު ހުނޅަގު ދާއިރާގެ މެމްބަރު މުހައްމަދު ފަލާހާއި، ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓާގެ) ނަން އިއްވައި ތަޅުމުން ނެރެލައިފިއެވެ.
މަޖިލީހުގައި މިއަދު ކުރިއަށްދިޔަ ބަހުސްގައި ރިޔާސަތު ބަލަހައްޓަމުން ދިޔަ ވިފުށީ ދާއިރާގެ މެމްބަރު ހަސަން އަފީފަށް މެމްބަރުންގެ ރައީސް ޞާލިހަށް ނިސްބަތްވާ މެމްބަރުން ހޫނު ބަހުގެ ހަމަލާތަކެއް ވަނީ އަމާވެފައެވެ. މިކަން ހިނގައިދިޔައީ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ ބަހުސްގައި ރައީސް ނަޝީދުގެ ފެކްޝަނަށް ނިސްބަތްވާ އެމްޑީޕީ މެމްބަރުންނަށާއި، މަޖިލީހުގެ ރިޔާސަތަށް އަމާޒުކޮށް ބަހުގެ ހަމަލާތަކެއް ބަދަލު ކުރުމުންނެވެ.
ޣަފޫރު ވިދާޅުވީ ޕްރައިމަރީން ބަލިވުމުން އެމްޑީޕީއަށް ނިސްބަތްވާ ނަޝީދު ފަޅީގެ މެމްބަރުން ގެންދަވަނީ ސަރުކާރަށް ފާޑުވިދާޅުވެ ބަހުގެ ހަމަލާތައް ބަދަލު ކުރަމުންކަމަށެވެ. އިންތިޚާބުން ބަލިވުމުން ބަލި ގަބޫލުކޮށް މޮޅުވި މީހުންގެ ފަހަތަށް އެރުމަކީ ޑިމޮކްރަސީގެ ރީތި ގޮތްކަމަށް ޢަފޫރު ވިދާޅުވިއެވެ.
ޣަފޫރު ވަނީ ބަހުސްގައި ރިޔާސަތުގައި އިންނެވި އަފީފަށްވެސް ފާޑު ވިދާޅުވެފައެވެ. އޭނާ ވިދާޅުވީ އަފީފް މަޖިލިސް ހިންގަވަނީ ވަކި މެމްބަރުން ހިތްހަމަ ޖެހޭ ގޮތަކަށް ކަމަށެވެ. ޣަފޫރު މިހެން ވިދާޅުވުމުން ވާހަކަ ހުއްޓުވައި އަފީފް ވަނީ ހުށަހެޅިފައިވާ މައްސަލައަށް ބަހުސް ކުރުމަށް ވިދާޅުވެފައެވެ.
އަފީފްގެ ވާހަކަތަކާއި ގުޅިގެން ހިތްހަމަ ނުޖެހި ފަލާހު ވަނީ ބަހުގެ ހޫނު ހަމަލާތަކެއް އަފީފަށް ރައްދުކޮށްފައެވެ. ފަލާހު ވިދާޅުވީ އަފީފް މަޖިލިސް ހިންގަވަނީ ވަރަށް ހުދުމުހުތާރުކޮށް ކަމަށެވެ. ފަލާހުގެ ވާހަކަތަކާއި ގުޅިގެން އަފީފް ވަނީ ވަރަށް ބޮޑަށް ކޯފާވެ ނަން އިއްވައި ފަލާހު މަޖިލީހުން ނެރެފައެވެ.
ނަން އިއްވިފަހުންވެސް ގިނަ އިރުތަކެއް ވަންދެއް ފަލާހުގެ ބަހުގެ ހަމަލާތަކެއް އަފީފަށް ވަނީ އަމާޒުވެފައެވެ. ނަމަވެސް އަފީފް މަޖިލިސް ފެއްޓެވީ ފަލާހު ތަޅުމުން ނިކުތުމުންނެވެ.
އަފީފް ވަނީ އޭގެ ފަހުން މެމްބަރު މުހައްމަދު ނަޝީދު (މޮސްޓާ)ގެ ނަންވެސް އިއްވައި ތަޅުމުން ނެރެފައެވެ. މޮސްޓާ ވަނީ އަފީފް މަޖިލީހުގެ ރައީސްކަމުގެ މަގާމުން އިސްތިއުފާ ދެއްވުމަށް ގޮވާލާފައެވެ.
