މިހަފްތާގެ ހޯމަދުވަހު ތުރުކީގެ ދެކުނުގެ ސަރަހައްދަށާއި، އަދި ސީރިއާގެ އުތުރަށް އައި ވަރުގަދަ ބިންހެލުމުގައި މަރުވީ މީހުންގެ އަދަދު މަތިވަމުން ދާއިރު، މި ބިންހެލުމުގެ އަސަރު އެންމެ ބޮޑަށް ކޮށްފައިވާ ތުރުކީގެ 10 ސަރަހައްދެއްގައި އެގައުމުގެ ރައީސް ތައްޔިބު އެރެދޮގާން ކުއްލި ހާލަތު އިއުލާން ކޮށްފިއެވެ.
ތުރުކީގެ ރައީސް އެރެދޮގާން ވިދާޅުވެފައިވަނީ، އެގައުމުގެ ދެކުނުގެ މެދުތެރެއަށް އައި މި ވަރުގަދަ ބިންހެލުމުގައި މަރުވީ މީހުންގެ އަދަދު 3,549 އަށް އަރާފައިވާ ކަމުގައެވެ. އެއާއެކު މި ބިންހެލުމުގައި ސީރިއާގެ އުތުރުގެ ސަރަހައްދުގައި މަރުވީ މީހުން އަދަދު އެއްކޮށްލުމުން، ބިންހެލުމުގައި މަރުވީ މީހުންގެ ޖުމްލަ އަދަދު މިހާރު ވަނީ 5،000 އަށްވުރެ މަތި ވެފައެވެ.
މިންގަޑުން 7.8ގެ ބާރުމިނުގައި އައި މި ބިންހެލުމުގައި މި ސަރަހައްދުތަކުގެ ގިނަ ގެތައް ވަނީ ބިމާއި ހަމަވެފައެވެ. ބިންހެލުން އައިސްފައިވަނީ ތުރުކީގެ ގިޒައިންޓެޕަށް، ހޯމަ ދުވަހުގެ ރޭގެ ދަންވަރު މީހުން ގަދަ ނިދީގައި ތިއްބައެވެ.
އަދި އެއަށްފަހު ހޯމަދުވަހުގެ ތުރުކީގެ ގަޑިން މެންދުރު 13:30ގައިވެސް ވަނީ މި ސަރަހައްދުތަކަށް މިންގަޑުން 7.5ގެ ބާރުމިނުގައި ވަރުގަދަ ބިންހެލުމެއް އައިސްފައެވެ. އޮފިޝަލުން ވިދާޅުވެފައި ވަނީ މިއީ "އާފްޓަރ ޝޮކް"އެއް (ކުރީގެ ބިންހެލުމުގެ އަސަރެއް) ނޫން ކަމަށާއި، މިއީވެސް ވަރުގަދަ ބިންހެލުމެއް ކަމުގައެވެ.
ބިންހެލުމުގެ ސަބަބުން ބިމާ ހަމަވެފައިވާ އިމާރާތްތަކުގެ ދަށުން މީހުން ސަލާމަތް ކުރުމަށް، ފިނި ގަދަވުމާއި އަދި ސްނޯ ފައިބަމުން ދިއުމުގެ ސަބަބުން ބޮޑެތި ގޮންޖެހުންތަކާއި ކުރިމަތިވަމުން ދާއިރު، ދުނިޔޭގެ ގައުމުތަކުން ދަނީ މީހުން ސަލާމަތް ކުރުމަށް ކުރިޔަށްދަ އޮޕަރޭޝަންތަކަށް އެހީ ފޯރުކޮށްދޭނެކަމަށް ބުނަމުންނެވެ.
ބޭރުގެ މީޑިއާތަކުން ރިޕޯޓު ކޮށްފައިވާ ގޮތުގައި މި ބިންހެލުމުގައި، ތުރުކީގެ ގާނޫނުހަދާ މަޖިލީހުގެ މެމްބަރެއްގެ އިތުރުން އޭނާގެ މުޅި އާއިލާ ވަނީ މަރުވެފައެވެ. އެ މެމްބަަރަކީ އެގައުމުގެ ރައީސް ރެސެޕް ތައްޔިބު އެރެދޮގާންގެ ޖަސްޓިސް އެންޑް ޑިވެލޮޕްމަންޓް ޕާޓީގެ ޔަކުޕް ޓާސް ނަމަކަށް ކިޔާ މެމްބަރެކެވެ.
ރަސްމީ ފަރާތްތަކުން މައުލޫމާތު ދީފައިވާ ގޮތުގައި އޭނާގެ ހަށިގަޑު ފެނިފައިވަނީ އޭނާގެ އަންހެނުންގެ އިތުރުން، ދައްދައާއި، ފަހަރިއާއި އަދި އޭނާއަށް ބޮޑުބޭބެ ކުޔާ ފިރިހެން ކުއްޖަކާއި، އޭނާއަށް ބޮޑުބޭބެ ކިޔާ އަންހެން ކުއްޖަކާއި، އޭނާގެ ކާފަ ދަރިއަކާއެކު، ތުރުކީގެ އަޑިޔަމަން ޕްރޮވިންސްއިންނެވެ. އޭނާއާއި އައިލާ އެކީގައި މަރުވެފައި ވަނިކޮށް ފެނިފައިވަނީ މީހުން ސަލާމަތް ކުރުމަށް ހަރަކާތްތެރިވަމުން ދިޔަ ޓީމަކަށެވެ.
ޓަސް އޭނޭގެ ދާއިރާއަށް ގޮސްފައިވަނީ އޭގެ ކުރީދުވަހު އޮތް ޖަނާޒާއެއްގައި ބައިވެރި ވުމަށެވެ. އޭނާގެ އުފަސް ޕްރިވިންސަކީވެސް އަޑިޔަމަން ޕްރޮވިންސްއެވެ. 1959 ވަނަ އަަހަރުގެ ޖޫންމަހުގެ 16 ވަނަ ދުވަހު އުފަންވި ޓަސް ގާނޫނުހަދާ މަޖިލިހުގައި ޚިދުމަތް ކުރަމުންދާތާ 27 އަހަރުވަނީ ވެފައެވެ. އަދި އޭނާގެ 6 ކުދިން ތިބެއެވެ.
