ނަފްސާނީ ސިއްޙަތާ ގުޅޭ ވަށައިޖެހޭ ސިޔާސަތުތަކެއްގެ ތެރެއިން މި ޚިދުމަތްތައް ލިބޭނެ ނިޒާމެއް ޤާއިމުކުރުމަށް ގޮވާލާ ރައްޔިތުންގެ މަޖިލީހަށް ޤަރާރެއް ހުށަހަޅައިފިއެވެ.
ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު ޢަބްދުﷲ ރިޔާޒު ހުށަހެޅުއްވި މި ޤަރާރުގައި ވަނީ، ރާއްޖޭގެ ރައްޔިތުންނަށް ނަފްސާނީ ދުޅަހެޔޮކަމާ ގުޅޭ ޚިދުމަތްތަކާއި ނަފްސާނީ ސިއްޙަތުގެ ފަރުވާ ދިނުމާބެހޭ ހަރުދަނާ އޮނިގަނޑެއް ނެތުމުގެ ސަބަބުން ހުށަހަޅާ ޤަރާރެއްކަމަށެވެ. އަދި ރާއްޖޭގެ އާބާދީއާ އެކަށޭނަ މިންވަރަކަށް މި ޚިދުމަތްތައް ލިބެން ނެތް މައްސަލައަށް ހައްލެއް ހޯދައިދިނުމަށް ސަރުކާރަށް ގޮވާލާ ހުށަހަަޅާ ޤަރާރެއްކަމަށްވެސް މިޤަރާރުގެ ދީބާޖާގައި ޢަބްދުﷲ ރިޔާޒް ވިދާޅުވެފައިވެއެވެ.
ޤަރާރުގައި ފާހަގަކުރާއްވާފާއިވާ ކަންތައްތަކުގެ ތެރޭގައި ރާއްޖޭގެ ނަފްސާނީ ބަލީގެ ޙާލަތާމެދު އެކަށީގެންވާ ސަމާލުކަމެއް ދެވިފައި ނުވާކަމަށާ، ސަރުކާރުން ހާމަކުރައްވާފައިވާ ސިޔާސަތުތަކާ އެއްގޮތަށް ޢަމަލީ ފިޔަވަޅުތަކެއް އެޅިފައި ނުވާކަން ފާހަގަކުރައްވާފައިވެއެވެ.
އެހެނކަމުން މިކަންކަން ޙައްލުކުރައްވައި ހަރުދަނާ ނިޒާމެއްގެތެރެއިން ނަފްސާނީ ސިއްހަތުގެ ޚިދުމަތްތައް އެކަށޭނަ ގޮތެއްގައި ލިބޭނެ ނިޒާމެއް ޤާއިމުކުރުމަށް ގޮވާލާފައިވެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައިވަނީ މި ޤަރާރަށް ބަޙުސްކޮށްފައެވެ.
