މުޒާހިރާތަކުގައި ނޫސްވެރިންނަށް އަނިޔާ ދިނުމުގެ އެއްވެސް ނިޔަތެއް ނޯންނާނެ ކަމުގައި ފުލުހުން ބުނެފިއެވެ.
ފުލުހުން ބައެއް މީޑިއާތަކަށް މައުލޫމާތު ދެމުން ބުނެފައިވަނީ، ރައީސުލްޖުމްހޫރިއްޔާ ރިޔާސީ ބާޔަން އިއްވި ޖަލްސައާއި ގުޅިގެން އިދިކޮޅުން ބޭއްވި މުޒާހިރާގައި ދެ ނޫސްވެރިޔަކަށް އަނިޔާވުމަކީ އެ މުވައްސަސާއިން ވަރަށް ބޮޑަށް ހިތަމަކުރާކަމެއް ކަމުގައެވެ.
އަދި ފުލުހުން ބުނެފައިވަނީ މިހާތަނަށް ބެލި ވެކުމުން، އަނިޔާވި ނޫސްވެރިންނަށް ގަސްތުގައި އަނިޔާކުރުމުގެ މަގުސަދުގައި އެއްވެސް ކަމެއް ފުލުހުން ކޮށްފައިވާކަމަށް ފެންނާން ނެތްކަމުގައެވެ.
އަދި ފުލުހުން ބުނެފައިވަނީ މިއަދުގެ މުޒާހިރާ ރޫޅާނެކަމަށް އިންޒާރުދެމުން، ޝީލްޑްތަކާއެކު ފުލުހުން ކުރިޔަށް ޖެހެމުން ދިޔައިރު، ބައެއް ނޫސްވެރިން ޝީލްޑުތަކުގައި އަޅާ ކޮށްޕުން ފަދަ ކަންކަން ހިގާ، އަދި މިފަދަ ބައެއް ހާދިސާތަކުގެ ތެރޭގައި ނޫސްވެރިން ބިންމައްޗަށް ވެއްޓިފައިވާކަމަށް ފާހަގަ ކުރެވިފައިވާ ކަމުގައެވެ.
ފުލުހުން ބުނެފައިވަނީ މިހާދިސާތައް ހިނގާފައިވާ ގޮތުގެ ފުރިހަމަ ރިވިއުއެއް އެ މުވައްސަސާގެ ޕްރޮފެޝަނަލް ސްޓަންޑަރޑްސް ކޮމާންޑުން މިހާރު ހަދަމުން ދާކަމުގައެވެ.
ރައްޔިތުންގެ މަޖިލިސް މިދައުރަށް ހުޅުވި ޖަލްސާގައި ރައީސް ޞާލިޙު ރިޔާސީ ބަޔާން އިއްވެވުމާ ދެކޮޅަށް އިދިކޮޅު ފަރާތްތަކުން ކުރި މުޒާހަރާ ކަވަރުކުރަން ދިޔަ ޗެނަލް 13ގެ ނޫސްވެރިޔަކަށް އަނިޔާވެ އައިސީޔޫގައި ފަރުވާދޭން ޖެހުނުކަަމަށް އިދިކޮޅު ފަރާތްތަކުން ބުނެފައި ވެއެވެ. އަދި މިއަދުގެ ހަވީރުގެ ވަގުތެއްގައި އެނޫސްވެރިޔާ ވަނީ އިތުރު ފަރުވާއަށް އަވައްޓެރި ސްރީ ލަންކާއަށް ފުރުވާލާފައެވެ.
މިއަދުގެ މުޒާހަރާ ރޫޅާލުމުގެ ތެރޭގައި ބައެއް މީހުންނަށް އެކިވަރުގެ ހާނީއްކަވެފައިވެއެވެ. އިދިކޮޅު ޕީޕީއެމްއިންވަނީ މި މުޒާހަރާގައި ބައެއް މީހުންނަށް ބޮޑެތި އަނިޔާތައް ވެފައިވާކަމަށް ބުނެފައެވެ. މިގޮތުން އަނިޔާވި ނޫސްވެރިޔާ އައިސީޔޫގައި ފަރުވާދދީފައިވާކަމަށާއި އޭނާ ހޭނާރާކަމަށްވެސް އިދިކޮޅު ފަރާތްތަކުން ބުނެފައި ވެއެވެ.
އެހެންނަމަވެސް ނޫސްވެރިޔާ ފުރުވާލުމަށް އެއަރޕޯޓަށް ގެންދެވުނު މަންޒަރުތަކުން ފެންނާން ހުރި ގޮތުގައި އޭނާ ހޭ ރަގަޅަށް ހުރިކަމަށް އެގެން ހުރެއެވެ.
މިއަދުގެ މުޒާހިރާގައި މީޑިއާ ފާސް އަޅައިގެން ތިބި ވީޑިއޯގްރާފަރަކާއި ފޮޓޯޖާނަލިސްޓަކަށް ފުލުހުން އަނިޔާ ކޮށްފައިވާކަމަށް ބުނެ، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިންވެެސް ވަނީ އެކަމާ ކަންބޮޑުވުން ފާޅުކޮށްފައެވެ.
މިއަދު ހިގައިދިޔަ މުޒާހިރާއަށްފަހު ފުލުހުންވަނީ 17 މީހަކު ހައްޔަރު ކޮށްފައެވެ.
ކޮމެންޓު ފޮނުވާ