މިއަހަރަށް ރައްޔިތުންގެ މަޖިލިސް ހުޅުވި ޖަލްސާގައި ރައީސް ޞާލިޙް ރިޔާސީ ބަޔާން އިއްވެވުމާ ދެކޮޅަށް އިދިކޮޅު ފަރާތްތަކުން ކުރި މުޒާހަރާ ކަވަރުކުރަން ދަނިކޮށް އަނިޔާވި ނޫސްވެރިޔާ އިތުރު ފަރުވާއަށް ސްރީ ލަންކާއަށް ފުރުވާލައިފިއެވެ.
ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު މިއަދު ރިޔާސީ ބަޔާން އިއްވަމުން ދަނިކޮށް އިދިކޮޅުން ކުރަމުންދިޔަ މުޒާހިރާ ފުލުހުންވަނީ ބާރުގެ ބޭނުންކޮށްގެން ރޫޅާލާފައެވެ. މުޒާހަރާ ރޫޅާލުމުގެ ތެރޭގައި ބައެއް މީހުންނަށް އެކިވަރުގެ ހާނީއްކަވެފައިވެއެވެ. އިދިކޮޅު ޕީޕީއެމްއިންވަނީ މި މުޒާހަރާގައި ބައެއް މީހުންނަށް ބޮޑެތި އަނިޔާތައް ވެފައިވާކަމަށް ބުނެފައެވެ. މީޑިއާގެ ވަސީލަތްތަކުން އެގޭ ގޮތުގައި އޭގެ ތެރޭގައި، ޗެނަލް13ގެ ނޫސްވެރިޔަކަށް އަނިޔާވެ އައިސީޔޫގައި ފަރުވާދެމުން އަންނަކަން އިދިކޮޅު ފަހުން ހާމަ ކޮށްފައިވެއެވެ.
އެހެންނަމަވެސް ނޫސްވެރިޔާ ފުރުވާލުމަށް އެއަރޕޯޓަށް ގެންދެވުނު މަންޒަރުތަކުން ފެންނާން ހުރި ގޮތުގައި އޭނާ ހޭ ރަގަޅަށް ހުރިކަމަށް އެގެން ހުރެއެވެ.
އިދިކޮޅު ޕީޕީއެމްގެ ބައެއް އިސް ފަރާތްތަކުންވެސް ހާމަ ކޮށްފައިވާ ގޮތުގައި، މިއަދު ހަވީރު ސްރީ ލަންކާއަށް ފުރި ޔޫއެލް ފްލައިންޓުން މި ނޫސްވެރިޔާއަށް އިތުރު ފަރުވާ ދިނުމަށް ސްރީ ލަންކާއަށް މިހާރުވަނީ ފުރުވާލާފައެވެ.
މިއަދުގެ މުޒާހިރާގައި ހަމަނުޖެހުން ހިގަމުންދަނިކޮށް، މަންޒަރުދުށް ބައެއް މީހުން ބުނިގޮތުގައި ޗެނަލް13ގެ ނޫސްވެރިޔާއަށް އަނިޔާވީ މުޒާހަރާ ރޫޅާލުމަށް ފުލުހުން ޝީލްޑް ހިފައިގެން މީހުންގެގަނޑުގެ ތެރެއަށް ވަދެގަތުމުގެ ތެރޭގައި ޝީލްޑުންނާއި ފުލުހުންގެ އަތުން ޖެހި އަނިޔާވެ ފިތި ވެއްޓިގެންނެވެ.
މިއަދުގެ މުޒާހަރާގެ ތެރެއިން 17 މީހަކު ހައްޔަރުކޮށްފައިވާކަމަށް ޕީޕީއެމްގެ ތަރުޖަމާނު ހީނާ ވަލީދު ވަނީ ވިދާޅުވެފައެވެ. މިކަމަގުޅިގެން ފުލުހުން އަދި ވަކިއެއްޗެއް ނުބުނެއެވެ.
