އަލަށް ހުޅުވުމަށް ސަރުކާރުން ތައްޔާރުވަމުންދާ ފަރެސްމާތޮޑާ އެއަރޕޯޓު ހުޅުވުމުން ރާއްޖޭގެ ދެކުނުގެ އަތޮޅުތަކުގެ އިގްތިސާދަށް ބޮޑު ކުރިއެރުމެއް އަންނާނެކަމުގައި ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ސައުދުﷲ އަހުމަދު ވިދާޅުވެއްޖެއެވެ.
ސައުދު ކުރެއްވި ޓުވީޓެއްގައި ވިދާޅުވެފައިވަނީ، ފަރެސްމާތޮޑާ އެއަރޕޯޓު ހުޅުވުމުން މި އެއަރޕޯޓުގެ އެންމެ ބޮޑު ފައިދާއެއް ކުރާނީ ކުދި އަދި މެދުފަންތީގެ ވިޔަފާރިތަކަށް ކަމަށާއި، ޚާއްސަ ގޮތެއްގައި ހުވަދޫ އަތޮޅުގައި ފުޅާވަމުން އަންނަ ގެސްޓު ހައުސް ވިޔަފާރިއަށް ބޮޑެތި ފަސޭހަތަކެއްލިބި އެ ވިރަފާރިއަށް ބޮޑު ކުރިއެރުމެއް އައިސް ވަޒީފާގެ އަދަދު ވަރަށް ބޮޑުތަނުން އިތުރުވެގެން ދާނެކަމުގައެވެ.
Faresmaathodaa airport hulhuvumaai ekee Gdh iguthisaadh ah bodethi kuri erun libigendhaane.Kudhi adhi medhu fanthee viyafaari thakaai,midhaairaage alah fulhaavamun anna guest house viyafaari bodethi faseyhathakaai kuri erun libi vaxeefaage market boduthanun ithuruvegen dhaane.
— Saudulla Ahmed (@saudullaahmed1) February 5, 2023
ގދ. ފަރެސްމާތޮޑާ އެއަރޕޯޓް ތަރައްޤީ ކުރުމުގެ މަޝްރޫޢުގެ މަސައްކަތުގެ ކުރިޔަށް ގެންދާ އެމްޓީސީސީން ދާދިފަހުން ބުނެފައިވަނީ މިހާރު އެ އެއަރޕޯޓުގެ 85 ޕަސެންޓް ނިމިފައިވާ ކަމުގައެވެ. އަދި ރަންވޭއާއި ޓެކްސީވޭއާއި އޭޕްރަން މަސައްކަތްތަކުގެ 93 ޕަސެންޓް ވަނީ ނިމިފައިކަމަށްވެސް އެމްޓީސީސީން ބުނެފިއެވެ.
މިއީ ދެކުނުގެ އަތޮޅުތަުގެ ތެރެއިން ހުވަދު އަތޮޅުގެ ވަރަށްގިނަ ރައްޔިތުންގެ އުންމީދުތަކާ ގުޅިފައިވާ އެއަރޕޯޓަކަށް ވާއިރު، މި އެއަރޕޯޓުގެ މަސައްކަތް ވަރަށްބޮޑަށް ލަސްވެފައިވާކަމުގެ ޝަކުވާ ފާއިތުވެދިޔަތަނުގައި ގދ. އަތޮޅުގެ ރައްޔިތުން ވަނީ ކޮށްފައެވެ. އެހެންނަމަވެސް ފަހަކަށް އައިސް މަސައްކަތުގެ ސްޕީޑް ހަލުވިވެ އެދެވޭ ކުރިއެރުންތަކެއް އައިސް، ދާދިއަވަކަށް މަސައްކަތް މުޅިން ނިމި އެއަރޕޯޓު ހުޅުވޭނެކަމުގެ އުންމީދު ވަނީ ބޮޑުވެފައެވެ.
ގދ. ފަރެސްމާތޮޑާ އެއަރޕޯޓް ތަރައްޤީ ކުރުމުގެ މަޝްރޫޢުގެ މަސައްކަތުގެ 85 ޕަސެންޓް ނިމިއްޖެ. އަދި ރަންވޭ، ޓެކްސީވޭ، އޭޕްރަން މަސައްކަތްތަކުގެ 93 ޕަސެންޓް ވަނީ ނިމިފައި. #MTCCProjects #RayyithungeKunfuni pic.twitter.com/qDjasBeh1e
— MTCC Plc (@MTCCPlc) December 27, 2022
ފަރެސްމާތޮޑާ އެއަރޕޯޓްގެ ޢަމަލީ މަސައްކަތް ފަށާފައިވަނީ 2021 ވަނަ އަަހރުގެ އަހަރުގެ ޖެނުއަރީ މަހުއެވެ. މި އެއަރޕޯޓް ތަރައްޤީކުރަނީ ކައިރީގައި ހުރި ކުދި ރަށްތަކެއް ހިއްކައިގެންނެވެ. އެއީ 19.9 ހެކްޓަރުގެ ބިމުގެ ސަރަޙައްދެކެވެ. ބިން ހިއްކުމުގެ މަސައްކަތް 2019ވަނަ އަހަރު ނިންމި ނަމަވެސް، ދިގު މުއްދަތެއްވަންދެން އެއަރޕޯޓްގެ ޢަމަލީ މަސައްކަތް އޮތީ ނުފެށިއެވެ. އެއަރޕޯޓްގެ ޢަމަލީ މަސައްކަތް ކުރުމަށް އެމްޓީސީސީއާ ހަވާލުކުރީ 2021ވަނަ އަހަރުގެ އަހަރުގެ ނޮވެމްބަރުމަހުއެވެ.
އެމްޓީސީސީން ޢަމާޒު ހިފާފައިވަނީ އެއަރޕޯޓްގެ ޢަމަލީ މަސައްކަތްތައް މުޅިން ނިންމާ، މިއަހަރުގެ ޖުލައި މަސް ތެރޭގައި ސަރުކާރާއި އެއަރޕޯޓް ހަވާލުކުރުމަށެވެ. އެއަރޕޯޓް ތަރައްޤީކުރަނީ އެތެރޭގެ އުދުހުންތަކަށް ޚާއްސަކޮށްގެންނެވެ. ރަންވޭއަކީ 1200 މީޓަރުގެ ދިގު ރަންވޭއެކެވެ. ފަރެސްމާތޮޑާ އެއަރޕޯޓްގެ ޓަރމިނަލްވެސް ތަރައްޤީކުރަނީ ތަފާތު ސްޓްރަކްޗަރއަކަށެވެ. މިއީ ޕްރީ ފެބްރިކޭޓެޑް އިމާރާތަކެވެ.
މި ޕްރޮޖެކްޓަކީ ސަރުކާރުން 144.8 މިލިއަން ޚަރަދުކޮށްގެން ކުރިއަށްގެންދާ މަޝްރޫޢެކެވެ.
