އަންނަ މަހުގެ 24 ގައި ސިނަމާތަކަށް ގެންނަށް ތާވަލް ކޮށްފައިވާ އަކްޝޭ ކުމާރުގެ ފިލްމް "ސެލްފީ" ގައި އޭނާގެ މަޝްހޫރު ލަވައެއް ކަމުގައިވާ "މޭ ކިލާޅީ ތޫ އަނާޅީ" ގެ ރިމޭކް އެއް ހިމަނައިފިއެވެ.
"މޭ ކިލާޅީ ތޫ އަނާޅީ" މި ލަވަ އަކީ ހަމަ މި ނަމުގައި 1994 ވަނަ އަހަރު ގެނެސްދިން ފިލްމްގެ ލަވައެކެވެ. ފޯރިގަދަ ނެށުން ތަކެއް ފެނިގެންދާ މި ލވައިގައި ފެނިގެން ގޮސްފައި ވަނީ އަކްޝޭ ކުމާރު އާއި ސައިފް އަލީ ހާން އެވެ. އެ ފިލްމްގެ ދެބަތަލާ އިންނަކީ ރާގެޝްވަރީ އަދި ޝިލްޕާ ޝެޓީއެވެ.
މި ލަވައިގެ އާވަޝް އަކީ އަކްޝޭގެ ކުރިއަށް އޮތް ފިލްމް "ސެލްފީ" ގައި ހަމަ މި ނަމުގައި ހިމަނާފައިވާ ލަވައެކެވެ. މިފަހަރު ލަވައިގައި ފެނިގެންދަނީ އަކްޝޭ އާއި އެކުގައި އިމްރާން ހާޝިމީއެވެ. ސެލްފީގެ ލީޑު ބަތަލާއިންގެ ގޮތުގައި ފެނިގެންދާނީ ޑިއާނާ ޕެންޓީ އާއި ނުޝްރަތު ބަރޫޗާއެވެ. މީގެ އިތުރުން މި ފިލްމްގެ މުހިންމު ރޯލަކުން މުރްނާލް ޓާކުރްވެސް ފެނިގެން ދާނެއެވެ.
"ސެލްޕީ" އަކީ އަކްޝޭއާއެކު 2019 ގައި "ގުޑް ނިއުޒް" ގެނެސްދިން ޑައިރެކްޓަރ ރާޖް މެހެތާ ޑައިރެކްޓް ކުރާ ފިލްމެކެވެ. މިއީ 2019 ގައި ގެނެސްދިން ކާމިޔާބު މަލަޔާލަމް ފިލްމު "ޑްރައިވިންގ ލައިސެންސް"ގެ ހިންދީ ރިމޭކެކެވެ.
"ސެލްފީ" ގައި ދައްކުވައި ދޭނީ މަޝްހޫރު ފިލްމީ ތަރިއަކާއި ފުލުހެއްގެ މެދުގައި ހިނގާ ކަންތައްތަކެވެ. އަކްޝޭ ފިލްމީ ތަރީގެ ގޮތުގައި ފެނިގެންދާ އިރު، ފުލުސް ކެެރެކްޓާ ކުޅެފައި ވަނީ އިމްރާނެވެ.
މިއީ ދަރްމާ ޕްރޮޑަކްޝަންސްގެ އިތުރުން، ޕްރިތުވިރާޖް ޕްރޮޑަކްޝަންސް، މެޖިކް ފްރޭމްސް، އަދި ކޭޕް އޮފް ގުޑް ފިލްމްސް ގުޅިގެން ގެނެސްދޭ ފިލްމެކެވެ.
