އެމްޑީޕީގެ ފާއިތުވި ރިޔާސީ ޕްރައިމަރީން ބިލިވުމަށްފަހު، އެޕާޓީގެ އެތެރޭގައި "ފިކުރެއްގެ ދިރުން" ނަމުގައި ގޮފިތައް ހައްދަވައިގެން ޕާޓީގެ އެތެރޭގައި އާ ސިޔާސީ ހަރަކާތެއް ހިންގުމަށް އެ ޕާޓީގެ ރައީސް މުހައްމަދު ނަޝީދު ނިންމަވާފައިވާ ނިންމެވުމުގެ ދަށުން، ނަޝީދަށް ތާއީދު ކުރާ ފަރާތްތަކުން، ގޮފި ރަޖިސްޓްރީ ކުރުމަށ ފޯމް ފުރަން ފަށައިފިއެވެ.
މިގޮތުން އެންމެ ފުރަތަމަ ފޯމު ފުރްވި ފަރާތްތަކުގެ ތެރޭގައި، ނަޝީދުގެ އަރިސް ބޭފުޅެއް ކަމުގައިވާ، ރައްޔިތުންގެ މަޖިލިހުގެ ނާއިބު ރައީސާ އީވާ އަބުދުﷲގެ އިތުރުން އެހެން ބައެއް މެމްބަރުންވެސް ހިމެނެއެވެ.
ދާދިފަހުން ދިވެހި ޗެނަލްއަށް ދެއްވި އިންޓަރވިއުއެއްގައި ނަޝީދު ވިދާޅުވެފައިވަނީ އެމްޑީޕީގެ އެތެރޭގައި އާ ސިޔާސީ ހަރަކާތެއް ހިންގުމަށް ނިންމަވާފައިވާ ނިންމުއާއެކު ކުރިޔަށް ވަޑައިގަންނަވާނެ ކަމަށާއި، ގޮފި ނުހަދަން ޕާޓީގެ ލީޑަރޝިލުން އެންގި ނަމަވެސް އެފަދަ އެންގެވުމަކަށް އަމަލު ނުކުރައްވާނެ ކަމުގައެވެ.
ދިވެހި ޗެނަލްގައި ވާހަކަ ދައްކަވަމުން ނަޝީދު ވިދާޅުވީ އެމްޑީޕީގެ މިހާރު ސެކެޓްރިއޭޓަށް ގޮތްޕެއް ނުހެދުމަށް އެމަނިކުފާނަށް އެންގިދާނެ ކަމަށާއި، އެހެންނަމަވެސް އެއީ އެމަށްޗަށް އަމަލުކުރާނެ އެންގުމެއް ނޫންކަމަށެވެ.
ނަޝީދު ވިދާޅުވެފައިވަނީ، ފިކުރެއްގެ ދިރުން ގޮފީގެ މަގުސަދަކީ، 39،000 މެމްބަރުން އެމްޑީޕީން ވަކިކުރުންފަދަ އަމަލެއް ދެން އެމްޑީޕީގެ އެތެރޭގައި ހިގައިގެން ދިޔަ ނުދިނުންކަމުގައެވެ.
ނަޝީދު ވިދާޅުވީ އަލަށް އުފައްދާ ފިކުރެއްގެ ދިރުން ގޮތްޕަށް ވަރަށް ގިނަ މެމްބަރުން ވަންނާނެ ކަމަށާއި، އޭގެ ތެރޭގައި އެމްޑީޕީގެ ދަފްތަކުން ވަކިކޮށްފައި ތިބި މެމްބަރުންގެ އިތުރުން ޕާޓީގެ މެމްބަރުންގެ ގޮތުގައި މިހާރު ތިބި މެމްބަރުންވެސް ހިމެނޭނެކަމަށެވެ. މިގޮތުން މި ގޮފީގައި ބައިވެރި ވުމުން، ފާއިތުވެދިޔަ ކެމްޕޭންގައި ރައީސް ސާލިހަށް ތާއިދުކުރި މެމްބަރުންވެސް މަހުރޫމް ވެގެން ނުދާނެކަމުގައިވެސް ނަޝީދު ވިދާޅުވިއެވެ.
ފިކުރެއްގެ ދިރުން ނަމުގައި ގޮފި ހައްދަވައިގެން އެމްޑީޕީގެ އެތެރޭގައި ވަކި ސިޔާސީ ހަރަކާތެއް ހިންގެވުމަށް ނަޝީދު ނިންމެވި ނަމަވެސް ޕާޓީގެ ލީޑަރޝިޕުން ވިދާޅުވަމުން ގެންދަވަނީ، ޕާޓީގެ މެމްބަރެއްގެ ގޮތުގައި ހުންނަވައިގެން ޕާޓީގެ އެތެރޭގައި ވަކި ސިޔާސީ ހަރަކާތެއް ހިންގަވާ، އަދި ޕާޓީގެ ރިޔާސީ ކެނޑިޑޭޓު ނޫން އެހެން ރިޔާސީ ކެނޑިޑޭޓަކަށް ތާއިދު ކުރަން ޕާޓީގެ އެއްވެސް މެމްބަރަކަށް އަސާސީ ގަވާއިދުން ޖާގަދޭ ކަމެއް ނޫން ކަމުގައެވެ.
