އެމްޑީޕީ ރިޔާސީ ޕްރައިމަރީގައި ވާދަކުރެއްވި އެޕާޓީގެ ރައީސް މުހައްމަދު ނަޝީދު ބަލި ގަބޫލުކުރައްވައިފިއެވެ. ބަލި ގަބޫލުކުރައްވާ، ނަޝީދު މިއަދު ހެނދުނު އެމްޑީޕީގެ ވަޓްސްއަޕް ގުރޫޕަކަށް ކުރެއްވި މެސެއްޖެގައި ވިދާޅުވީ، އިންތިޚާބުގައި ހިނގާފައިވާ އޮޅުވާލުންތައް އެއްކައިރި ކޮށްފިނަމަ، ރައީސް ސާލިހަށް ލިބިގެންދިޔަ ވޯޓުގެ ބޮޑުބަޔަކީ އެމްނިކުފާނަށް ލިބިލައްވާނެ ވޯޓެއް ނޫން ކަމުގައެވެ. އަދި ވޯޓާސް ލިސްޓަށް ބަލަނަމަ ކުޑަފަރަގަކުން ރައީސް ސާލިހު ކުރި ހޯއްދަވާފާނެކަމަށްވެސް ނަޝީދު ވިދާޅުވިއެވެ.

އެހެންނަމަވެސް، ރިޔާސީ ޕްރައިމަރީ ކާމިޔާބު ނުކުރެއްވޭނެކަމަށް އެއްބަސްވަމުން މި މެސެޖުގައި ނަޝީދު ވިދާޅުވެފައިވަނީ، ރިޔާސީ ޕްރައިމަރީ ކާމިޔާބު ކުރެވުނު ނަމަވެސް، ރައީސް ސާލިހަށް ރިޔާސީ އިންތިޚާބު ކާމިޔާބު ނުކުރެއްވޭނެ ކަމުގައެވެ.

ނަޝީދު ވިދާޅުވީ އެމަނިކްފާނުގެ ހުށަހެޅުއްވުމަކަށްވީ "ފިކުރެއްގެ ދިރުން" ނަމުގައި އެމްޑީޕީގެ ގޮފިތައް ހުރިހާ ރަށެއްގައިވެސް އަލުން ހަދާ، ކަނޑާލި 39،000 އަށްވުރެ ގިނަ މެމްބަރުންވެސް އަލުން އެމްޑީޕީއަށް ވައްދާ އަދި އެ މީހުންނާއެކީ ދެން ފެންނަ ގޮތެއް ނިންމުމަށް ކަމުގައެވެ.

އަޅުގަނޑު ހުށަހަޅަނީ 'ފިކުރެއްގެ ދިރުން' ނަމުގައި އެމްޑީޕީގެ ގޮފިތައް ހުރިހާ ރަށެއްގައި ވެސް އަލުން ހަދައި، ކަނޑާލި 39،000 އަށް ވުރެ ގިނަ މީހުން އަލުން އެމްޑީޕީއާ ގުޅި، އެ މީހުންނާ އެކު އަޅުގަނޑުމެންނަށް ފެންނަ ގޮތް ނިންމުން.

އެމްޑީޕީގެ ވަޓްސްއަޕް ގުރޫޕަށް ފޮނުއްވި މެސެޖުގައި ނަޝީދު ވިދާޅުވިއެވެ.

އެމްޑީޕީގެ ވަޓްސްއަޕް ގުރޫޕުގައި ނަޝީދު ވިދާޅުވީ "ފިކުރެއްގެ ދިރުން" ކެމްޕޭނުން ތާއީދުކުރާނެ ރިޔާސީ ކެނޑިޑޭޓަކު ނިންމާނީ އަދި ފަހުގެ ތާރީޚެއްގައި ކަމުގައެވެ.

ނަޝީދުގެ މެސެޖަށް ރައްދު ދެއްވަމުން އެމްޑީޕީގެ ޗެއަރޕާސަން ވަޓްސްއަޕް ގުރޫޕުގައި ލިޔުއްވަމުން އެދިވަޑައިގަތީ އެ ނިންމެވުމާއި އަލުން ނަޝީދު ވިސްނަވާ ވަޑައިތަގުމަށެވެ.

ޕާޓީގެ އުސޫލާއި ގަވައިދު ބަދަލު ނުކޮށް ތިގޮތަށް ކުރެވޭނެ ކަމަކަށް ގަބޫލެއް ނުކުރެވޭ. ޓިކެޓް ކާމިޔާބުކުރާ ފަރާތަކީ ޕާޓީގެ ރިޔާސީ ކެންޑިޑޭޓް.

ފައްޔާޒު އިސްމާއިލް ވަޓްސްއަޕް ގުރޫޕުގައި ލިޔުއްވާފައި ވެއެވެ.

އެމްޑީޕީގެ ވަޓްސްއަޕް ގުރޫޕުގައި، ނަޝީދު ބަލި ގަބޫލު ކުރައްވާފައިވި ނަމަވެސް، އެކަން އަދިވެސް ނަޝީދު ސަޕޯޓަރުންނާއ ހިއްސާ ކުރައްވާފައެއް ނުވެއެވެ. އަދި ދެން ކުރިޔަށްދާނެ ގޮތެއްވެސް ހިއްސާ ކުރައްވާފައެއް ނުވެއެވެ.

އެމްޑީޕީން މިހާރު އިއުލާން ކޮށްފައިވާ ވަގުތީ ނަތީޖާގައި ވާގޮތުން ރައީސް ސާލިހަށް މި އިންތިޚާބުގައި ލިބިލެއްވީ 24،573 ވޯޓެވެ. ރައީސް ސާލިހާއި ވާދަކުރެއްވި އެ ޕާޓީގެ ރައީސް މުހައްމަދު ނަޝީދަށް ލިބިލެއްވީ 15،631 ވޯޓެވެ.

އިންތިޚާބާބެހޭ ކޮމިޓީން އާންމު ކުރި ވަގުތީ ނަތީޖާގައި ވާގޮތުން މި އިންތިޚާބުގައި ވޯޓު ލާފައިވަނީ 40،887 މެމްބަރުންނެވެ. އެއީ ވޯޓު ލުމުގެ ހައްގު ލިބިފައިވާ މެމްބަރުން 71.41 އިންސައްތަ މީހުންނެވެ.

މި އިންތިޚާބުގައި 680 ބާތިލް ވޯޓު ލާފައިވާއިރު ސައްހަ ވޯޓުގެ ގޮތުގައި ލާފައިވަނީ 40،207 ވޯޓެވެ.

އިންތިޚާބުގެ ނަތީޖާއަށް ބަލާއިރު، ރައީސް ސާލިހުއަށް ލިބިލެއްވީ 61.10 އިންސައްތަ ވޯޓެވެ. ނަޝީދަށް ލިބިލެއްވީ 38.9 އިންސައްތަ ވޯޓެވެ.