މިއަހަރުގެ ނޮވެމްބަރުމަހު ވެރިކަމާއި ހަވާލުވެވަޑައިގަތުމަށްފަހު، އައްޑު ސިޓީގައި 85 ގެސްހައުސް ތަރައްގީ ކުރުމަށްޓަކާ ކޮންމެ ގެސްޓު ހައުސްއަކަށް ލުއިލޯނު ދެއްވާނެކަމަށް އެމްޑީޕީގެ ރައީސް މުހައްމަދު ނަޝީދު ވައުދުވެ ވަޑައިގެންފިއެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި އައްޑޫ ސިޓީއަށް މިހަރު ކުރައްވަމުން ގެންދަވާ ކެމްޕޭން ދަތުރުފުޅުގައި އައްޑޫ ސިޓީގެ އެމްޑީޕީގެ ރައްޔިތުންނާ މުޚާތަބުކޮށް ވާހަކަ ދައްކަވަމުން ނަޝީދު ވިދާޅުވީ އައްޑޫގައި ގެސްޓު ހައުސްއެޅުމަށް ދޫކޮށްފައިވާ ބިންތަކުގައި ގެސްޓު ހައުސް ނޭޅިފައިވަނީ އެތަންތަން އިމާރާތް ކުރާނެ ފައިސާ ނެތުމުގެ ސަބަބުން ކަމުގައެވެ.
މިގޮތުން މިގެސްޓު ހައުސްތައް ތަރައްގީ ކުރުމަށް ބޭނުންވާނޫ 250 މިލިއަން ރުފިޔާ ނުވަތަ 15 ވަރަކަށް މިލިއަން ޑޮލަރު ކަމުގައެވެ.
އާދައިގެ ދިވެހި ވިޔަފާރި ވެރިއެއްގެ އެކައުން އެބަހުއްޓޭ އެއަދަދު. މި 85 ގެސްޓު ހައުސް މިތަނުގައި ހަދާފައި، އެމީހުންނަށް ލޯނެއް ދެވި އެމީހުންނަށް އެތަނުން މަންފާއާއި ފައިދާ ހޯދެން އެބައޮތް. އަޅުގަޑު ތިބޭފުޅުންނަށް ޔަގީންކޮށް އަރުވަން ނޮވެމްބަރުމަހު، މިއަހަރުގެ، އިރާދަ ކުރެއްވިއްޔާ 85 ގެސްޓު ހައުސް ހެދުމަށްޓަކާ، ކޮންމެ ގެސްޓު ހައުސްއަކަށް ލުއި ލޯނު ލިބޭނެ. އެއީކީއެއް އެއްގޮތަކަށްވެސް ތިބޭފުޅުން ޝައްކު ކުރައްވާންވީ ކަމެއް ނޫން. އަދި އެތަންތަން އިރާދަ ކުރެއްވިއްޔާ ހަދާ ނިމެންދެން، ކޮންމެ ދުވަހަކު ހެނދުނު އަޅުގަޑު ބަލަހައްޓައިގެން ހުންނާނަން.
އައްޑޫ ސިޓީގެ ހިތަދޫގައި ވާހަކަ ދައްކަވަމުން ނަޝީދު ވިދާޅުވުއެވެ.
މި އެއްވުމުގައި ވާހަކަ ދައްކަވަމުން ނަޝީދު ވިދާޅުވީ އެތަންތަނަށް ގެސްޓުންނަށް ވަދެވުނީމަ އައްޑޫ ރައްޔިތުންގެ ވަޒީފާތައް އިތުރުވެ އާމްދަނީ އިތުރުވެން ދާނެކަމުގައެވެ.
މިއެއްވުމުގައި ނަޝީދު ވިދާޅުވީ ޝަންގްރިއްލާ ރިސޯޓު ކުރިޔަށް އޮތް 2 މަސްދުވަހެއްގެ ތެރޭގައި ހުޅުވޭނެކަމުގައެވެ. ނަޝީދު ވިދާޅުވި ގޮތުގައި މި ރިސޯޓު މިހާތަނަށް ހުޅުވިގެން ގޮސްފައި ނުވަނީ މި ރިސޯޓުގައި އޮތް ސަރުކާރުގެ ހިއްސާ މިހާތަނަށްވެސް ސަރުކާރަށް ދޫކޮށް ނުލެވިގެން ކަމުގައެވެ. އެހެންނަމަވެސް ހިތް ނިޔަތް ޚަލާސް ކޮށްގެން އެކަން ކުރަން އުޅުނުނަމަ އެއީ ހަފްތާއެއްހާ ދުވަހުގެ ތެރޭގައި ކުރެވެން އޮތް ކަމެއްކަމުގައިވެސް ނަޝީދު ވިދާޅުވިއެވެ.
މިހާރު އައްޑު ސިޓީއަށް ކުރައްވަމުން ގެންދަވާ ދަތުރުފުޅަށްފަހު، މާދަމާ ނަޝީދު ވަޑައިތަގަތުމަށް ހަމަޖެހިފައިވަނީ ފުވައްމުލަކު ސިޓީއަށެވެ.
