އެމްޑީޕީގެ ރިޔާސީ ޕްރައިމަރީގައި ހުވަދު އަތޮޅުގެ ރައްތަކަށް ރައީސުލްޖުމްހޫރިއްޔާ ކުރައްވާ ދަތުރުފުޅުގައި މިއަދު ހަވީރު ގއ.ވިލިނގިއްޔަށް ވަޑައިގެންނެވުމުން އެރަށުން ރައީސަށް ހޫނު މަރުހަބާއެއް ދަންނަވައިފިއެވެ.
މިއީ އެދާއިރާގެ މެމްބަރު ސައުދު ހުސެއިން އެމްޑީޕީއަށް ސޮއިކުރި ފަހުން ރައީސުލްޖުމްހޫރިއްޔާ ވިލިނގިއްޔަށް ވަޑައިގެންނެވި ފުރަތަމަ ފަހަރެވެ. ވިލިނގިއްޔަށް ރައީސް ޞާލިހު ވަޑައިގެންނެވިއިރު އެރަށުގެ ބަނދަރުގެ ސަރަހައްދުގައި ގިނަ އަދަދެއްގެ ރައްޔިތުން ވަނީ ނިކުމެފައެވެ. ބަނދަރުގައި އެމަނިކުފާނު ރައްޔިތުންނާއި ސަލާން ކުރުމަށް އޮތް ސަފު ދިގުކަމުން ގިނަ ވަގުތުތަކެއް ސަލާންކުރެއްވުމުގައި ހޭދަކުރައްވަން ޖެހުނެވެ.
މިއީ ހުވަދު އަތޮޅަށް ރައީސް ކުރައްވާ ދަތުރުގައި މިހާތަނަށް ރަށަކުން ލިބުނު އެންމެ ހޫނު މަރުހަބާކަންވެސް ފާހަގަ ކޮށްލެވެއެވެ. ރައީސަށް މަރުހަބާ ދެންނެވުމުގައި އެންމެ އިސްކޮށް ހުންނެވީ މެމްބަރު ސައުދެވެ. އަދި ސައުދާއިއެކު ސައުދު ޓީމުން ކީ މަރުހަބާއަށް ރައީސް ވަނީ ޝުކުރު އަދާ ކުރައްވާފައެވެ.
އަންނަ ހޮހިރު ދުވަހު ވޯޓުލާއިރު ދެ ކެނޑިޑޭޓުންވެސް ދަނީ ވަރަށް ފޯރީގައި ކެމްޕެއިން ކުރައްވަމުންނެވެ. ރައީސް ޞާލިހުވެސް އަދި ރައީސް ނަޝީދުވެސް ވަރަށް އިތުބާރާއިއެކު ވިދާޅުވަމުންދަނީ މިއިންތިޚާބު ކާމިޔާބު ކުރާނެކަމަށެވެ.
#MDPKuriah https://t.co/9sv9c3b0wi
— Fathi Ibrahim (@Fathi3637) January 22, 2023
އެމްޑީޕީން ބުނީ އެ އިންތިޚާބުގައި 200އަށް ވުރެ ގިނަ ވޯޓު ފޮށި ބެހެއްޓުމަށް ނިންމާފައިވާކަމަށެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާއިރު، އަތޮޅުތެރޭގައި 194 ވޯޓު ފޮށި ބަހައްޓަން އެޕާޓިން ނިންމާފައިވެއެވެ.މި އިންތިޚާބުގައި ވޯޓުލުން ކުރިއަށްދާނީ 28 ވަނަ ދުވަހުގެ ހެނދުނު 9:00 އިން ހަވީރު 5:00 އަށެވެ.
މި އިންތިޚާބުގައި މޮނީޓަރުންގެ ގޮތުގައި ހަރަކާތްތެރިވާން ބޭނުންވާ މީޑިއާތަކަށް ވެސް މިހާރު ވަނީ އެ ފުރުސަތު ހުޅުވާލާފައެވެ. މި ފުރުސަތު ހުޅުވާލާފައި ވަނީ މި މަހުގެ 20 ވަނަ ދުވަހުގެ 12:00އާއި ހަމައަށެވެ. ކޮންމެ ވޯޓު ފޮއްޓެއްކައިރި އެއްވަގުތެއްގައި ހަރަކާތްތެރިވެވޭނީ ކޮންމެ ޕްރިންޓް އަދި އޮންލައިން މީޑިއާ އަކުން އެއްބޭފުޅަކަށާއި އަދި ކޮންމެ ޓީވީ ސްޓޭޝަނަކުން 2 މީހަކަށް އެ ޕާޓީން ބުންޏެވެ.
އެ ޕާޓީގެ ވޯޓާސް ލިސްޓުވެސް މިހާރު އާންމުކޮށްފައެވެ. އެ ލިސްޓުގައި ހިމެނެނީ 57،257 މީހުން ވޯޓު ލެވޭނެކަމަށް ބުނެފައިވެއެވެ.
