ރައީސް ސާލިހާއި މިހާރު އެއްވެސް ގުޅުމެއް ނެތްކަމަށާއި، ފޯނުންވެސް ގުޅުއްވާ ދެބޭފުޅުން ވާހަކަ ނުދައްކަވާތާ މިހާރި އަހަރެއްހާ ދުވަސް ވެއްޖެ ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ މިއަދު ބޭއްވުނު ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.

މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނަޝީދު ވިދާޅުވީ، 6 މޭގެ ޓެރަރިސްޓް ހަމަލާއަށްފަހު ޖަރުމަނުގެ އޮންނެވިހާ ދުވަހުވެސް، އަދި އޭގެ ފަހުން އިނގިރޭސިވިލާތުގައި ހުންނެވިހާދުވަހުވެސް ރައީސް ސާލިހު އެމަނިކްފާނަށް ގުޅުއްވީ އެންމެ ފަހަރަކު ކަމުގައެވެ.

ރައީސުލްޖުމްހޫރިއްޔާ އަޅުގަނޑަށް ނުގުޅާތާ މިހާރު އަހަރެއްހާ ދުވަސް ވަނީ. ބޮމުގެ ހާދިސާގައި ވެސް އަޅުގަނޑު ޖަރުމަނުގައި އޮތް ހާ ދުވަހު އަދި އިނގިރޭސިވިލާތުގައި އޮތްހާ ދުވަހު ވެސް ރައީސުލްޖުމްހޫރިއްޔާ އަޅުގަނޑަށް ގުޅުއްވީ އެއް ދުވަހު. އަޅުގަނޑަކާ ރައީސުލް ޖުމްހޫރިއްޔާއަކާ ގުޅުމެއް ނެތް.

ނޫސްވެރިޔަކު ކުރި ސުވާލަކަށް ޖަވާބު ދެއްވަނުން ނަޝީދު ވިދާޅުވިއެވެ.

މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނަޝީދުވިދާޅުވީ ރައީސް ސާލިހު އުޅުއްވަނީ ތާކުންތާކު ނުޖެހޭ ފިކުރެއްގައު ކަމުގައެވެ. އަދި އިއްތިހާދާއި ގުޅުން ބޭއްވުމުގެ އިތުރުން އަމިއްލަފުޅަށް ފާހަގަ ވުމުގެ ބޭނުންފުޅުގައި ރައީސް ސާލިހުވަނީ ކަންކަމާއި މަޝްވަރާ ކުރެއްވުން އެކީ ހުއްޓަވާލައްވާފައި ކަމުގައިވެސް ނަޝީދު ވިދާޅުވިއެވެ.

އަދި ނަޝީދު ތުހުމަތު ކުރެއްވި ގޮތުހައި ރައީސް ސާލިހުގެ އަރިހުގައި ތިއްބެވި ބޭފުޅުންނަށް ހީވެގެން އުޅެނީ ރައީސް ނަޝީދާއި ގުޅުން ބާއްވައފިނަމަ، ރައީސް ސާލިހު "ޝައިން" ވާމިންވަރު ކުޑަވެގެން ހިގައިދާނެކަމަށް ކަަމަށެވެ.

ރައީސް ސާލިހާއި ނަޝީދާއި ދެބޭފުޅުންނަކީ އާއިލީ ގޮތުންވެސް ވަރަށްބޮޑު ގުޅުމެއް އޮންނަ ދެބޭފުޅުންނެވެ. މިގޮތުން ރައީސް ސާލިހު ކައިވެނި ބައްލަވައިގެން އުޅުއްވަނީ ނަޝީދުގެ ތިމާގެ ބޭފުޅަކާއެވެ. އޭގެ އިތުރުން ދެބޭފުޅުންވެސް ވިދާޅުވެފައިވަނީ ދެބޭފުޅުންނަކީ އެންމެ ކުޑައިރުއްސުރެ އެންމެގާތް ދެ އެކުވެރިންކަމުގައެވެ.

އެހެންނަމަވެސް ދެބޭފުޅުންގެ މެދުގައި ޚިޔާލުތަފާތުވެ، ގުޅުން ކެނޑި، އަދި ޕާޓީވެސް މިހާރުވަނީ ބައިބައިވެފައެވެ. އެންމެ ފަހުން ދެބޭފުޅުން މިހާރު ގެންދަވަނީ އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވުމަށް ވާދަކުރައްވަމުންނެވެ.