އެމްޑީޕީގެ ރައީސް މުހައްމަދު ނަޝީދު މިހާރު ކުރައްވަމުން ގެންދަވާ ޕްރަައިމަރީ ކެމްޕޭންގަ ރަށްރަށަށް ވަޑައިގަންވާއިރަށް އިސްތިގުބާލުގައި ތިބެނީވެސް، އަދި މަރުހަބާ ދެންނެވުމުގެ ގޮތުން ޕޯސްޓަރު ތަތްކުރުމާއި މަރުހަބާގެ ބެނަރތައް ދެމުމުގައިވެސް އުޅެނުން ދަނީ ޕީޕީއެމްގެ އެކްޓިވިސްޓުން ކަމުގައި ޑިފެންސް މިނިސްޓަރު މާރިޔާދީދީ ވިދާޅު ވެއްޖެއެވެ.
ކުރިޔަށްއޮތް އެމްޑީޕީގެ ޕްރައިމަރީ ކެމްޕޭންގައި ރޭ "އެމްޑީޕީ ކުރިޔަށް" ކެމްޕޭގެ ފަރާތުން އާރޓިފިޝަލް ބީޗް ސަރަހައްދުގައި ބޭއްވި ބޮޑު ޖަލްސާގައި ވާހަކަ ދައްކަވަމުން މާރިޔާ ވިދާޅުވީ މިހާރު މުޅިންވެސް އިވެމުންދަނީ، އިންޑިއާ އައުޓު ފިޔަވާ އެހެން ހުރިހާ ކަމެއްވެސް ރައީސް ޔާމީނާއި އެމަނިކްފާނު މުޅިންވެސް އެއްގޮތްކަމަށް ނަޝީދު ވިދާޅުވާ އަޑު ކަމަށެވެ.
އަދި މާރިޔާ ވިދާޅުވީ ރައީސް ނަޝީދު ރަށްރަށަށް ވަޑައިގަންނަވާއިރު އިދިކޮޅު ޕީޕީއެމްގެ އެކްޓިވިސްޓުން ނަޝީދަށް މަރުހަބާ ދެންނެވުމަށް ގިޑިގެ ހެދުމާއި މަރުހަބާ ދެންނެވުމަށް ތިބޭތަން ފެންނަމުންދާ ކަމުގައެވެ.
އަޅުގަޑުމެންނަށް މި އިވެނީ ރައީސް ޔާމީނަކީ ވިޝަނަރީ ލީޑަރަކޭ ވިދާޅުވަމުން ރައީސް ނަޝީދު ވަޑައިގަންނަވާ ތަން. ރަށްރަށަށް ވަޑައިގަތީމާ އެ ވަޑައިގަންނަވާއިރަށް ތަން ތައްޔާރު ކުރުމަށްޓަކާ ޕީޕީއެމްގެ އެކްޓިވިސްޓުން ނުކުމެ ޕޯސްޓަރުތަކާއި ބެނަރުތަކާއި ދަމާތަން. އަދި ރައީސް ނަޝީދު ރަށްރަށަށް އަރާ ވަޑައިގަންނަވާއިރު، ޕީޕީއެމްގެ ހަރަކާތްތެރިން އެމަނިކްފަނުގެ އިސްތިގުބާލުގައި ހުންނަ (ތިބޭ) ވާހަކަ.
ކުރިޔަށްދާ ކެމްޕޭންގައި ނަޝީދު ރަށްރަށަށް ވަޑައިގަތުމުން މަރުހަބާ ދެންނެވުމުގެ ކަންކަން ކުރަމުންދަނީ އިދިކޮޅު ޕީޕީއެމްގެ އެކްޓިވިސްޓުންކަމަށް ވިދާޅުވަމުން މާރިޔާ ވިދާޅުވިއެވެ.
އަދި މިހާރު ރައީސް ޔާމިނަކީ ވަރަށް ވިޝަނަރީ ލީޑަރެއްކަމަށް ނަޝީދު ވިދާޅުވަމުން ގެންދަވާ ކަމަށާއި، މިހާރު އެންމެ ބޮޑަށް ބިރުހީވަނީ ވެރިކަމަށް ވަޑައިގަތުމަށްޓަކާ ނަޝީދު ޔާމިންއާއި ކޯލިޝަން ހަދާފާނެތީ ކަމަށްވެސް މި ޖަލްސާގައި ވާހަކަ ދައްކަވަމުން މާރިއާ ވިދާޅުވިއެވެ.
މާރިޔާ ވިދާޅުވީ އެހެންނަމަވެސް ޔާމިން ރާއްޖޭގައި ކުރެއްވީ އަނިޔާވެރި ވެރިކަމެއް ކަމަށާއި، އެ ވެރިކަމުގައި އިދިކޮޅު ސިޔާސީ ހުރިހާ ވެރިން ނުހައްގުން ޖަލަށް ލެއްވި ކަމަށެވެ. އަދި އޭގެ އިތުރުން މުވައްސަސާތައް މުށުތެރެއަށް ލައްވާ، ސުޕްރީމް ކޯޓުގެ ފަނޑިޔާރުންނާއި، ޔާމީނާއި ޚިޔާލުތާފާތުވި މެމްބަރުން ޖަލަށްލާ، ޔާމިނު ތަންފީޒު ކުރި އަނިޔާވެރިވެރިކަމުގެ މަތިން ދިވެހިރައްޔިތުން ހަދާން ނުނެތޭނެ ކަމުގައިވެސް މާރިއާ ވިދާޅުވިއެވެ.
އަދި މާރިޔާ ވިދާޅުވީ، ޔާމިން ވެރިކަމަށް ވަޑައިގަތުމާއެކު ކުރެއްވި ކަމަކީ، ނަޝީދުވެސް ވިދާޅުވާފަދައިން، ނަޝީދަށް ހުކުމް ކުރެއްވީ ހަވާ ފަޓާސްބަރިއެއްހެން ކަމުގައެވެ.
މި ޖަލްސާގައި ވާހަކަ ދައްކަވަމުން މާރިޔާ ވިދާޅުވީ އެމްޑީޕީގެ ފިކުރު ދިރުވީވެސް, ދެމެހެއްޓީވެސް, ކުރިއަރަން އޮތީވެސް ޓިކެޓް ރައީސަށް ދީގެންކަމަަށާއި، ރައީސް ސާލިހު ގެެނެސްދެއްވަމުން ގެންދަވާ ތަރައްގީއަށްޓަކާވެސް ރައީސް ސާލިހަށް ވޯޓު ދޭން ޖެހޭ ކަމުގައެވެ.
