މި ސަރުކާރުން ކުރިޔަށް ގެންދާ ތަރައްގީގެ އެއްވެސް ޕްރޮޖެކްޓެއް އެކަށީގެންވާ ގޮތެއްގައި ކުރިޔަށް ނުދާކަމަށާއި، ކުޑަ ޕްރޮޖެކްޓެއް ބޮޑު ޕްރޮޖެކްޓެއް ތަފާތު ކުރުމެއްނެތި، ތަރައްގީގެ ހުރިހާ ޕްރޮޖެކްޓެއްވެސް އޮތީ "އަންނަނީ އަންނަނީ"ގައި ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީ ކެމްޕޭނުގައި، ރާޅުގަޑު ސަރަހައްދުގައި ނަޝީދުގެ "ފިކުރެއްގެ ދިރުން" ކެމްޕޭން ޖަލްސާގައި ވާހަކަ ދައްކަވަމުން ނަޝީދު ވިދާޅުވީ ތަރައްގީގެ މަޝްރޫއުތައް ހުރީ "އަންނަނީ އަންނަނީ"ގައި ކަމުގައެވެ.
ސަރުކާރުގެ ސްލޯގަންއަކީ، ޝިއާރަކީ، އޮލިމްޕަހުގައި އަޅުވާނެ އަންނަނީ، އަންނަނީ، އަންނަނީ، އަންނަނީ، ދެން އަންނަނީ، ދެން އަންނަނީ، އަންނަނީ، މިއަންނަ ކުއާޓަރުގައި އަންނަނީ، އަނެއް ކުއާޓަރުގައި އަންނަނީ، އަންނަނީ.. މި ފިލްމެއް ނުއެއް ފެނުނު. ހަމަ އަންނަނީ. އޮލިމްޕަސް ހުޅުވާ ވާހަކަ އަންނަތާ 5 އަހަރު. މިއީ ރައީސް އިބުރާހިމް ނާސިރު ހަދާ ފައްކާ ކޮށްފަ ހުރި ތަނެއް. ކުލަ ލާފައި އެތާގައި ބޮކި ދިއްލާލާފައި އެތަން އަންނަނީ އަންނަނީގައި މިދަނީ 5 އަހަރު.
ތަރައްގީގެ މަޝްރޫއުތަކުގެ ދުވެލި އާދަޔާއި ޚިލާފަށް މަޑުކަމަށް މޭރުން ކުރައްވަމުން ނަޝީދު ވިދާޅުވިއެވެ.
މި ޖަލްސާގައި ވާހަަކ ދައްކަވަމުން ނަޝީދު ވިދާޅުވީ ކުރިމަތީގައި އޮތް އެއަރޕޯޓުވެސް އަދި އޮތީ ހަމަ އޮތް ގޮތަށް ކަމަށާއި، އެއީ 2014 ވަނަ އަހަރު އެމްޑީޕީގެ ސަރުކާރުން ދައުލަތުން އެއްވެސް އެއްޗެއް ނުގޮސް ހަދާ ނިންމަން އެކީގައި ކޮންޓްރެކްޓް ކޮށްފައި އޮތް ތަނެއް ނަމަވެސް، މިހާރު 1.4 މިލިއަން ޑޮލަރުގެ ދަރަނި އަރާ އަދި އެއަރޕޯޓު އޮތީ "އަންނަނީ"ގައި ކަމުގައެވެ.
ނަޝީދު ވިދާޅުވީ ބޮޑު މަސައްކަތެއް ކުޑަ މަސައްކަތެއް ބަލާނެ ކަމެއް ނެތްކަމަށާއި، އަމީނީ މަގުވެސް އޮތީ "އަންނަނީ"ގައި ކަމުގައެވެ. ނަޝީދު ވިދާޅުވީ އަމީނީމަގު ރީތިކޮށް އޮއްވާ މިހާރު އޮތީ މާރަގަޅު ފެންވަރަކަށް ހަދާލާފައި ކަމުގައެވެ.
ރަގަޅު ފެންވަރަކަށް އެތައް ހެދި ހެދީނުން މިހާރު އެތަނުގައި ތާރައެއް ނެތް. ގަލެއް ނެތް. ދެން އަޅުގަޑު އެބަ ދެކެން ޔޫރަޕުންވެސް މިހާރު މާބޮޑަށް ތަރައްގީ ވީމާ، ހުރި ތާރުނަގާ މަގުތަކުގަ. ނަގާފައި ހިގާބިގާވެ އެބަ އުޅޭ. އަޅުޑުމެން އަމީނީ މަގު ދެއަހަރު ވަންދެން އެތާ ބައްތިއެއް ދިއްލާލާފައި ރަތް ދިދައެއް ނަގާފައި އަންނަނީ، އަންނަނީ، އަންނަނީ، އަނެއް ކުއާޓަރުގައި އަންނަނީ އެތަނުގައި ހަފާއި އިންނަ ބޯޑެއް ބައިންދާ ގޮތަށް މިހާރު އެކަން އެއޮތީ.
އަމީނީ މަގުގެ މަސައްކަތް ސިފަކުރައްވަމުން ނަޝީދު ވިދާޅުވިއެވެ. ނަޝީދު ވިދާޅުވީ ވަޑައިގަންނަވާ ހުރިހާ ރަށެއްގައިވެސް ހުރީ ވެލި ފުނިތައް ޖަހާފައި ކަމަށާއި، ތަރައްގީގެ މަޝްރޫއުތައް އެރަށްރަށުގައި ކުރިޔަށް ނުދާ ކަމުގައެވެ. ނަޝީދު ވިދާޅުވީ އެއިން އެއްވެސް ރަށެއްގައި ކަމެއް ވެފައެއް ނެތްކަމުގައެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ ރައީސް ސާލިހާއި ނަޝީދުއާއި ދެބޭފުޅުންނެވެ. ރިޔާސީ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 28ވަނަ ދުވަހުއެވެ.
