ފަލަސްޠީނުގައި ހުންނަ މުސްލިމުން ފުރަތަމަ ޤިބުލަ މާތްވެގެންވާ މަސްޖިދުލް އަޤުޞާގެ ހަރިންމަ ތެރެއަށް، ޔަހޫދީ ދައުލަތް އިސްރާއީލުގެ ނެޝަނަލް ސެކިއުރިޓީ މިނިސްޓަރ، މި މަހުގެ 3 ވަނަ ދުވަހު ވަދެފައިވާ މައްސަލާގައި ބޭއްވި އޯއައިސީގެ ބައްދަލުވުމުގައި ރާއްޖެއިން ބައިވެރިވެއްޖެއެވެ.
ދިވެހި ސަރުކާރުން ވިދާޅުވީ މިމައްސަލައާއި ފަލަސްތީނުގެ ރައްޔިތުންގެ ޙައްޤުތަކަށް އަރައިގަނެ، އިތުރު ފިއްތުންތައް ކުރިމަތިކުރުވަމުންދާތީ، އެކަމާމެދު މަޝްވަރާކުރުމަށްޓަކައި ސަޢޫދީ އަރައްބިއްޔާގެ ޖިއްދާގައި ހުންނަ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ.) ގެ މައި މަރުކަޒުގައި މިއަދު ބޭއްވި އޯ.އައި.ސީ. އެގްޒެކެޓިވް ކޮމިޓީގެ އޯޕަން- އެންޑެޑް ބައްދަލުވުމުގައި ދިވެހިރާއްޖޭގެ ފަރާތުން އޯ.އައި.ސީ. އަށް ކަނޑައަޅުއްވާފައި ހުންނަވާ ޕާމަނަންޓް ރެޕްރެޒެންޓޭޓިވް އަދި ދިވެހިރާއްޖޭގެ ފަރާތުން ސައުދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު އަލްފާޟިލް މުޙައްމަދު ޚަލީލް ބައިވެރިވެ ވަޑައިގެންފައިވާކަމަށެވެ.
މި ބައްދަލުވުމުގައި އަލް-އަޤްސާ މިސްކިތަށް އިސްރާއީލުން މެދުނުކެނޑި ދެމުންގެންދާ އުދުވާނީ އަމަލުތައް ދިވެހިރާއްޖެއިން ކުށްވެރިކުރައްވައި، އެމަނިކުފާނު ވަނީ ވާހަކަފުޅުދައްކަވާފައެވެ. އަދި އެ މަނިކުފާނުގެ ތަޤްރީރުގައި ފަލަސްތީނުގެ ބިންތަކަށް އިސްރާއީލުން ވެރިވެގަތުން ނިމުމަކަށް ގެނެސް، ފަލަސްތީނުގެ މިނިވަން ދައުލަތެއް ޤާއިމްކޮށް، 1967 ވަނަ އަހަރުގެ ކުރީގެ ބޯޑަރާ ހިސާބަށް އިސްރާއީލުން ފަހަތަށް ޖެހުމަށް ބާރުއަޅާ، ފަލަސްތީނުގެ ދައުލަތުގެ ވެރިރަށުގެ ގޮތުގައި އިރުމަތީ ޤުދުސް އޮންނަން ޖެހޭ ކަމުގައި ވަނީ ވިދާޅުވެފައެވެ. އަދި ދިވެހި ސަރުކާރާއި ރައްޔިތުންގެ ފުރިހަމަ އެއްބާރުލުން ފަލަސްތީނުގެ ސަރުކާރާއި ރައްޔިތުންނަށް އަބަދަށް ދެމިއޮންނާނެ ކަމުގެ ޔަޤީންކަން ވަނީ ދެއްވާފައެވެ.
ކޮމެންޓު ފޮނުވާ