އިދިކޮޅު މައި ޕާޓީ ޕީޕީއެމްގެ މީހުން މިހާރު އެމަނިކްފާނުދެކެ އެހާ ރުޅި ނާންނަކަމަށާއި، އެހެންކަމުން ކުރިމަގު ފެންނަނީ ވަރަށް އުއްމީދީ ގޮތަކަށް ކަމަށް، ކުރިޔަށް އޮތް އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާ އެޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭންގައި، ހއ. އަތޮޅު، ހދ. އަތޮޅު، ށ. އަތޮޅު އަދި ފުވައްމުލަކު ރައްޔިތުންނާއި ބައްދަލު ކުރުމަށް ކެންގަރޫ ކިޑްސް އިންޓަނޭޝަނަލް ޕްރީ ސްކޫލްގައި ބޭއްވި ބައްދަލުވުމުގައި ވާހަކަ ދައްކަވަމުން ނަޝީދު ވިދާޅުވީ، އެހެންޏާ ޕީޕީއެމް މީހުން އެމަނިކްފާނުގެ ދެކެ ދެދަތް ޖެހޭވަރަށް އަންނަ ރުޅި އަންނަ ކަމަށެވެ. އެހެންނަމަވެސް މިހާރު އެމީހުން އެވަރަށް ރުޅި ނާންނަ ކަމަށާއި، އެއީ ކޮން ސަބަބަކާ ހެދިކަން އެގިވަޑައި ނުގަންނަވާ ކަމަށެވެ.
އަޅުގަނޑަށް ފާހަގަވޭ އެހެންޏާވީއާ ޕީޕީއެމް މީހުން އަޅުގަނޑު ފެނުނުނީމަވެސް ދެދަތް ޖެހޭ ވަރަށް ރުޅި އާދޭ. މިހާރު އެ މީހުންވެސް އެހާ ރުޅިއެއް ނާދޭ. އަޅުގަނޑަކަށް ނޭނގެ ކޮން ސަބަބަކާ ހުރެގެން ކަމެއް. ދެން އަޅުގަނޑުވެސް ލަފާކުރަނީ އަޅުގަނޑު ދުވަސް ކޮޅެއްވެއްޖެ މިކަންކަމުގެ އުޅޭތާ. އެހެންވީމާ އެ މީހުންވެސް ކޮންމެވެސް ވަރަކަށް ފަރިތަވީ ކަމަށް އަޅުގަނޑަށް ލަފާކުރެވެނީ. އަޅުގަނޑަށް ވަރަށް އުއްމީދީ ގޮތަކަށް ކުރިއަށް އޮތްތަން ފެންނަނީ.
މި ބައްދަލުވުމުގައި ވާހަކަ ދައްކަވަމުން ނަޝީދު ވިދާޅުވިއެވެ.
މި ބައްދަލުވުމުގައި ވާހަކަ ދައްކަވަމުން ނަޝީދު ވިދާޅުވީ އިންތިޚާބުގެ ދެވަނަ ބުރެއްގައި ކޯލިޝަން ހަދާން ޖެހިއްޖެނަމަ ބަލާނީ ފުރަތަމަ ބުރުގައި ވޯޓު ލިބިފައިހުރި ޕާޓީތަކަށް ކަމުގައެވެ. އަދި އެނޫން ގޮތަކަށް ބަލައިގެން ކޯލިޝަން ހެދުމަކީ އިންސާފެއް ނޫންކަމުގައިވެސް ނަޝީދު ވިދާޅުވެފައިވެއެވެ.
