ރާއްޖޭގައި ފަތުރުވެރިކަމުގެ ރިސޯޓް ހެދުމަށް ދޫކޮށްފައިހުރި ރަށްރަށުގައި 14 ހާހަށްވުރެ ގިނަ އެނދު އެބަހުރިކަން ޓޫރިޒަމްގެ ޤާނޫނަށް ހުށައެޅި އިޞްލާހުތަކުން ހާމަވެއްޖެއެވެ.
ފަތުރުވެރިކަމުން ދައުލަތަށް ލިބޭ އާމްދަނީ އިތުރުކުރުމަށްޓަކައި، ސަރުކާރުގެ ފަރާތުން ޓޫރިޒަމާ ބެހޭ ގާނޫނަށް މެދު ހެންވޭރު ދާއިރާގެ މެންބަރު އަދި މެޖޯރިޓީ ލީޑަރު ޢަލީ އާޒިމް އިޞްލާޙު ހުށައަޅުއްވަމުން ވިދާޅުވީ، 2012 ވަނަ އަހަރުން ފެށިގެން ރާއްޖޭގައި ރިސޯޓް ނުހެދި 85 ޓޫރިސްޓް ޕްރޮޕަޓީ އެބައޮތްކަމަށެވެ. އޭގެ ތެރެއިން 61 ރަށާއި 24 ފަޅާއި 14،650 ޓޫރިސްޓް އެނދު ނުހެދި ދައުލަތަށް ފައިސާ ނުލިބި އެބަހުރިކަމަށެވެ.
އާޒިމް މިހެން ވިދާޅުވެފައިވާއިރު ޓޫރިޒަމް މިނިސްޓްރީން ކުރިން ބުނެފައިވަނީ ރާއްޖޭގައި ނުހެދި އޮތީ 70 ރިސޯޓްކަމަށެވެ.
61 ރަށާއި 24 ފަޅާއި 14،650 ބެޑް ނުހެދި، ދައުލަތަށް ލިބެން ޖެހޭ ފައިސާ ނުލިބި ހުއްޓިފައި އެބަހުރި. މި ބާބުން އެފަރާތްތަކަށް ފުރުސަތު ލިބިގެންދޭ އިންޓަގްރޭޑެއް ޓޫރިޒަމަށް ބަދަލު ކުރެވޭނެ. އެހެންވީމަ ރަށުގެ އެއްބައި ނޫނީ އެއްފަޅި ވިއްކާލައިގެން ތަރައްގީ ކުރުމުގެ މަގު ފަހި ވެގެންދާނެ
-މެދު ހެންވޭރު ދާއިރާގެ މެންބަރު ޢަލީ އާޒިމް
ރާއްޖޭގައި އޮޕަރޭޓްކުރާ އޮތީ 156 ރިސޯޓެވެ. ޓޫރިޒމްގެ ޤާނޫނަށް އާޒިމް ހުށައަުއްވާފައިވާ އިޞްލާހުތަކަކީ އަންނަ އަހަރުގެ ބަޖެޓަށް ފައިސާ ހޯދުމަށް ހުށައަޅާފައިވާ އިޞްލާހުތަކެއްކަމަށް ވަނީ ވިދާޅުވެފައެވެ. މި އިޞްލާހުތަކުން ރިސޯޓު ތަރައްގީ ކުރަން މިހާރު ދޫކޮށްފައިހުރި ނަމަވެސް ނުހެދި ހުރި ރިސޯޓުތަކަށް އަވަސް ހައްލެއް ލިބޭނެކަމަށް އާޒިމް ވަނީ ވިދާޅުވެފައެވެ.
ކޮމެންޓު ފޮނުވާ