ނ.ވެލިދޫއަށް ރައީސް ނަޝީދު ކެމްޕެއިންގައި ކުރައްވާ ދަތުރާއި ދިމާކޮށް އެރަށުގައި އެމްޑީޕީ ދިދަ ޖަހަނިކޮށް، އެކަމަށް ވެލިދޫ ދާއިރާގެ މެމްބަރު މުހައްމަދު ހުރަސް އަޅުއްވައި ދިދަ ނެގިކަމުގައި ވީނަމަވެސް ވެލިދުއަށް އަރާނެކަމަށް ރައީސް ނަޝީދު ވިދާޅުވެއްޖެއެވެ.
ނ.އަތޮޅުގެ ރަށްތަކަށް ކެމްޕެއިންގައި ވަަޑައިގެން އުޅުއްވާ ރައީސް ނަޝީދު މިއަދު ކުޑަފަރީގައި ވާހަކަ ދައްކަވަމުން ވިދާޅުވީ އެމަނިކުފާނު ވެލިދޫއަށް ވަޑައިގެންނެވުމަށް ހަމަޖެހިފައިވާ ދަތުރާއި ދިމާކޮށް، މެމްބަރާއި އެރަށު ބައެއް މީހުން ހުރަސް އެޅުމަށް މަސައްކަތް ކުރަމުންދާކަމަށެވެ. އެގޮތުން ވެލިދޫގައި އެމްޑީޕީގެ ދިދަ ޖަހައި ތައްޔާރުކުރަނިކޮށް މެމްބަރު ދިދަ ނަގައި އެކަންކަމަށް ހުރަސް އަޅަމުންދާކަމަށެވެ.
ރޭގަ އަޅުގަނޑަށް އަޑުއިވުނީ، ވެލިދޫގައި ޖަހާފައި ހުރި އެމްޑީޕީ ދިދަ ވެލިދޫ މެމްބަރާއި އަދި އެހެން ދެތިން މީހުން އަޅުގަނޑު އަރާފާނެތީވެ ދިދަ ނަގައިފި. ސާބަހޭ އެހެންނު. އަޅެ ސާބަހެއްނެ. ލަދު ގަންނަންޏާ ގަންނާންވެސް ހުރީ އަޅުގަނޑު. އަޅުގަނޑަކަށް ނޭގޭ ލަދު ގަންނާންވެސް. މިދިދަ އަޅުގަނޑު އެރަށް އަރާތީވެ ނަގައިފިއޭ. ދެންކީކޭ އަޅުގަނޑު ބުނާނީ.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މިގޮތަށް ހުރަސް އަޅައިގެން އިންތިިޚާބު ކާމިޔާބު ވެދާނެކަމަށް ގަބޫލު ކުރުމަކީ ކުށް ހީއެއްކަމަށެވެ. އަދި ދިދަ ނަގައިފިނަމަ އެދިދަ ބަހައްޓަން ދާނެކަމަށާއި، ވެލިދޫއަށް ވަޑައިގެން މެމްބަރު އަތުލި ދިދަ އެރަށުގައި ނަންގަވާނެކަމަށް ރައީސް ނަޝީދު ވިދާޅުވިއެވެ.
އެހެންވީމާ މިދިދަ ނަގަން އަޅުގަނޑު ވެލިދޫއަށް ދާންޖެހޭ. ދާންޖެހޭ. އެކަނި އެކަނި އެކަނިވެސް ދާނަން. އަރާނަން އަދި އެދިދަވެސް ޖަހާނަން. އަޅުގަނޑުމެން ދުލެއް ނުކުރާނަން. އަދި މިއިންތިޚާބު އަޅުގަނޑު ކާމިޔާބުވެސް ކުރާނަން.
– ރައީސް ނަޝީދު ވިދާޅުވިއެވެ.
"Ekani ves Velidhoo ah araanan" KudaFari badhaluvumga Anni #FikureggeDhirun #Anni2023 pic.twitter.com/Y78kSvjIAD
— Mujoo (@mujookeynee) January 9, 2023
ވެލިދޫ ދާއިރާގެ މެމްބަރަކީ މިއިންތިޚާބުގެ ކުރިން ރައީސް ނަޝީދާއި ވަރަށް އަރިސް މެމްބަރެކެވެ. ނަމަވެސް ޕްރައިމަރީ ކެމްޕެއިނާއި ހަމައިން މެމްބަރު ވަނީ ރައީސް ޞާލިހަށް ތާއީދު ކުރައްވާފައެވެ. ވެލިދޫގައި ރައީސް ޞާލިހު ބައިވެރިވި ޖަލްސާގައި ވާހަކަ ދައްކަވަމުން މެމްބަރު މުހައްމަދު ވިދާޅުވީ ޑިމޮކްރަސީއަކީ ވިކީމަހަކު ގެނައި އެއްޗެއް ނޫންކަމަށެވެ. އަދި އޭގެ މެޑެލް އެންމެ މީހަކަށް ނުވެސް ޖެހޭނެކަމަށެވެ. ޑިމޮކްރަސީއަކީ ރާއްޖޭގެ އެތައް ބަޔަކު ކުރި މަސައްކަތުގެ ނަތީޖާކަމަށް އޭނާ ވަނީ ވިދާޅުވެފައެވެ.
