ސަރުކާރުން މަސައްކަތް ކުރަމުންދަނީ މީހުން ދިރިނޫޅޭ ސަރަހައްދުތަކަށް ގަރާޖުތަކާއި، ގުދަންތައް ބަދަލު ކުރުންކަމުގައި ނައިބް ރައީސް ފައިސަލް ނަސީމް ވިދާޅުވެއްޖެއެވެ.
މާލޭ ނީކަން ފިހާރާގައި މިއަދު ހިނގި ނުރައްކާތެރި އަލިފާނުގެ ހާދިސާއާއި ގުޅިގެން އެސަރަހައްދަށް ވަޑައިގެން ނައިބް ނައިބް ރައީސް ވަނީ މީޑިއާތަކާއި ބައްދަލު ކުރައްވާފައެވެ. އަލިފާނުގެ ހާދިސާގައި ނީލަންފިހާރަ ވަނީ އަނދާ ހުލިވެފައެވެ. އަދި އެސަރަހައްދުގައި ދިރިއުޅެމުންދިޔަ ބިދޭސީން ދިރިއުޅެމުންދިޔަ ތަންތަންވެސް ވަނީ އަނދާ ހުލިވެފައެވެ.
މިހާދިސާއާއި ގުޅޭގޮތުން ނައިބް ރައީސް ވިދާޅުވީ މިހާރު އެންމެ ބޮޑު އިސްކަމެއް ދެއްވައިގެން ސަރުކާރުން މަސައްކަތް ކުރަމުންދަނީ ހާދިސާގައި އެއްވެސް މީހަކަށް ގެއްލުމެއް ލިބިފައިވޭތޯ ބެލުންކަމަށެވެ. އަދި އެއްވެސް މީހެއްގެ ފުރާނައަށް ގެއްލުމެއް ލިބިފައިވޭތޯ ބަލައި އެކަންކަން ކަށަވަރު ކުރުމުގެ މަސައްކަތް ކުރަމުންދާކަމަށް ނައިބް ރައީސް ވިދާޅުވިއެވެ.
ނައިބް ރައީސް ވިދާޅުވީ ސަރުކާރުުގެ އަމާޒަކީ މާލޭގައި ހުރި މިފަދަ ތަންތަނާއި، ގަރާޖުތައް މީހުންނާއި ދުރު ހިސާބުތަކަށް ބަދަލު ކުރުންކަމަށެވެ. އަދި އެމަސައްކަތް މިހާރުވެސް ކުރަމުންދާކަމަށެވެ. އަލިފާނުގެ ކޮންމެ ހާދިސާއަކާއި ގުޅިގެން ސަރުކާރުން މިވާހަކަ މިގޮތަކަށް ތަކުރާރު ކުރެއެވެ. ނަމަވެސް މިމަސައްކަތަށް މާބޮޑު އެދެވޭ ހައްލެއް ލިބިގެންދާތަނެއް ނުފެނެއެވެ.
އެމްއެންޑީއެފްއިން ވިދާޅުވީ ނީލަން ފިހާރައިގެ އުތުރުފަޅިން (ޢިމާދުއްދީން ސްކޫލްއާއި ދިމާ) ފެތުރެމުންދިޔަ އަލިފާންގަނޑު ކޮންޓްރޯލްކޮށްފައިވާކަމަށެވެ. އަދި މިހާރު މޯލްޑިވްސް އެއަރޕޯޓް ކޮމްޕެނީ ލިމިޓެޑްގެ އަލިފާން ނިއްވާ ލޮރީވެސް ދަނީ އެ ސަރަހައްދުގައި ހަރަކާތްތެރިވަމުންކަމަށް އެމްއެންޑީއެފްއިން ވިދާޅުވެއެވެ. އަލިފާންގަނޑުގެ 70 އިންސައްތަ މިހާރު ކޮންޓްރޯލް ކުރެވިފައިވާކަމަށްވެސް އެމްއެންޑީއެފްއިން ވިދާޅުވެއެވެ.
އެމްއެންޑީއެފްއިން ވިދާޅުވީ މި ހާދިސާގެ ރިޕޯޓް އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުނީ މިއަދު ހެނދުނު 5:43 ހާއިރުކަމަށެވެ. މި ހާދިސާ ހިނގަން މެދުވެރިވި ސަބަބެއް ނޭނގޭއިރު، ފުލުހުން ދަނީ އެ އެކަން ތަހުގީގްކުރަމުންނެވެ.
