ކުރީގެ ރައީސް ޔާމީންގެ ވެރިކަމަކީ އަނިޔާވެރި ވެރިކަމެއް ކަމަށާއި، އެވެރިކަމުގައި ގޮތްނޭގޭ އެތައް މަރެއް ހިނގާފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ޕްރައިމަރީ ކެމްޕެއިންގައި ރ.މީދޫއަށް ވަޑައިގެން އެރަށުގައި ރޭ ބޭއްވި ޖަލްސާގައި ވާހަކަ ދައްކަވަމުންނެވެ. ރައީސް ޞާލިހު އެރަށަށް ވަޑައިގެންނެވިއިރުވެސް އަދި ރޭގެ ޖަލްސާ ހިނގަމުންދިޔަ އިރުވެސް އިދިިކޮޅު ޕީޕީއެމްއަށް ތާއީދުކުރާ ގިނަ އަދަދެއްގެ މެމްބަރުން ދިޔައީ އަޑުގަދަކޮށް ޝުއޫރު ފާޅު ކުރަމުންނެވެ.

ރައީސް މީދޫއަށް ވަޑައިގަތުމުން އެރަށުގެ ރައްޔިތުން ވަނީ މީދުގެ ޒުވާނެއްކަމުގައިވާ އަނަސްގެ މަރާއި ގުޅިގެން އިންސާފު ހޯދުމަށް ގޮވާލާފައެވެ. އަދި އެމަރަށް އިންސާފު ހޯދައި ދިނުމަކީ މިސަރުކާރުގެ ވައުދެއްކަމަށް ދިޔައީ ބުނަމުންނެވެ. ރޭގެ ޖަލްސާގައި ރައީސް ވިދާޅުވީ ނިމިދިޔަ ރައީސް ޔާމީނުގެ ސަރުކާރަކީ އަނިޔާވެރި ސަރުކާރެއް ކަމަށާއި އެ ސަރުކާރުގެ ގޮތް ނޭނގޭ ގިނަ މަރުތަކެއް ހިނގި ކަމަށެވެ. އޭގެތެރެއިން އެއް ހާދިސާއެއް ގޮތުގައި ރައީސް ފާހަގަކުރެއްވީ އަނަސްއަށް ހަމަލާދީ މަރާލި މައްސަލައެވެ.

އަނަސްގެ މަރު އެއީ ހަނދާން ނައްތާލެވޭނެކަމެއް ނޫން. އެފަދަ ދެވަނަ ހާދިސާއެއް އެއްވެސް ޒުވާނަކަށް ކުރިމަތިވުމަކީ އަޅުގަނޑު އެދޭނެ ކަމެއް ނޫން. އެ ސަބަބަށްޓަކައި އަޅުގަނޑުމެން އެނބުރި އެ ހާލަތަށް ދާން ބޭނުން ނުވަނީ.

– ރައީސް ވިދާޅުވިއެވެ.

އަނަސް މަރާލި މައްސަލައިގައި އަށް މީހެއްގެ މައްޗަށް ކޯޓުގައި ޝަރީއަތް ހިނގަމުން ދާކަން ރައީސްގެ ވާހަކަފުޅުގައި ފާހަގަކުރެއްވިއެވެ. އޭގެ ތެރެއިން އެކެއްގެ މައްޗަށް ހައިކޯޓު މަރުހަލާގައި ކުށް ސާބިތުވެފައިވާކަމަށް ވެސް ވިދާޅުވިއެވެ. ރައީސް ވިދާޅުވީ މަރު ކޮމިޝަނުން މިހާރު ވެސް އެ މަސައްކަތް ކުރަމުން ގެންދާ ކަމަށެވެ. ނަމަވެސް އެ މައްސަލައަކީ ކޯޓުގައި އޮތް މައްސަލައަކަށް ވާތީ ނުފޫޒު ނުފޯރާނެ ގޮތަށް ވަރަށް ކައިރިން ބަލަމުން ތަހުގީގު ކުރަމުންދާ ކަމަށް ވިދާލުވިއެވެ. އަދި ކަން ހިނގައިދިޔަ ގޮތް ސާފުވެގެންދާނެ ކަމަށް ވެސް ވިދާޅުވިއެވެ.

އަނަސްގެ މަރާލާފައިވަނީ 2017ވަނަ އަހަރުގެ ޖުލައިމަހުގެ 31ވަނަ ދުވަހުގެ ރޭ ސައިކަލުތަކެއްގައި އައިބަޔަކަށް ފިލަން އޭނާ ދުވެފައިގޮސް ހެންވޭރު ލިޓަސް ގަރާޖަށް ވަނުމުން ބިންމައްޗަށް ވައްޓާލުމަށްފަހުގައެވެ. އަނަސްގެ ހަށިގަނޑުގެ 25 ތަނަކަށް ޙަމަލާދީފައިވާއިރު އަނަސް ހޮސްޕިޓަލަށް ގެންދިޔައިރުވެސް މަރުވެފައިވާކަމަށް ފުލުހުންވަނީ ވިދާޅުވެފައެވެ.