ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ވާދަކުރައްވާ އެޕާޓީގެ ރައީސް މުހައްމަދު ނަޝީދަށްވެސް ޕްރައިމަރީ އިންތިޚާބުން ބަލިވާނެކަން މިހާރު ޔަގީންވާނެ ކަމުގައި ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.
ޑރ.އިޔާޒު މިހެން ވިދާޅުވީ ރައީސް މުހައްމަދު ނަޝީދަށް ތާއީދުކުރާ މެމްބަރުންނަށް ސަރުކާރުން ބިރު ދެއްކުމާއި ދަތިކުރުމުގެ ފިޔަވަޅު އަޅަމުންދާ ކަމުގެ ތުހުމަތުކޮށް ނެރުނު ބަޔާނާއި ގުޅިގެންނެވެ. މުވައްޒަފުންނަށް ބިރު ދެއްކުން ހުއްޓާލަން ގޮވާލައި ނަޝީދުގެ ކެމްޕެއިން ޓީމުން ނެރުނު ބަޔާނެއްގައި ބުނީ އެ ޕާޓީގެ މެމްބަރުންނާއި ސަޕޯޓަރުންގެ ބުރަ މަސައްކަތުން 2018 ގައި ނުކުމެ ވެރިކަން ބަދަލުކުރަން ވޯޓުލީ އެތައް ކަމެއް އަލުން އިޔާދަވަމުންދާކަމުގެ ކަންބޮޑުވުން މެމްބަރުން ފާޅުކުރަމުން އަންނަ ކަމަށެވެ.
ނަޝީގެ ޓިމުން ނެރުނު ބަޔާނާއި ގުޅިގެން ޑރ.އިޔާޒު ވިދާޅުވީ ތިމާގެ ނުފޫޒުން ވަޒީފާގެ ބިރުދައްކައިގެން ކަންކަން ކުރި އުސޫލުން އެހެން މީހުން ކަންކަން ކޮށްފާނެކަމަށް ދެކުމަކީ ކުށްހީއެއް ކަމަށެވެ. އިންތިޚާބުގައި ބަލިވާނެކަން ޔަގީންވުމުން އެކި ބަހަނާ ދެއްކުމަކީ އަބަދުވެސް ވާނެގޮތެއްކަމަށާއި، މިއިންތިޚާބުން ނަޝީދު ބަލިވާނެކަން ޚުދު އެމަނިކުފާނަށްވެސް މިހާރު ޔަގީންވާނެކަމަށް ޑރ.އިޔާޒު ވިދާޅުވިއެވެ.
ތިމާ ކުރިކަންތައް އެހެންމީހުންވެސް ކޮށްފާނެކަމަށް ހީކުރުމަކީ ކުށްހީއެއް. މާތް ރަސްކަލާންގެ ރަޙްމަތާއި އެކު މަނިކްފާނު ފެއިލްވާނެކަން އަމިއްލައަށް ވެސް މިހާރު ޔަޤީންވާނެ. ބަލިވާންހެދީމާ ބަހަނާ ދައްކަވަން ނޫޅުއްވާ މަނިކްފާނުގެ އަޢުވާނުން ގާތަށް ވަޑައިގަންނަވާ.
– ޑރ.އިޔާޒު ވިދާޅުވިއެވެ.
އެމްޑީޕީން ވަޒީފާގެ ބިރު ދައްކާކަމަށް ނަޝީދުގެ ފަރާތުން ދެއްކެވި ވާހަކަތަކާއި ގުޅިގެން ޑރ.އިޔާޒު ވިދާޅުވީ އެމްޑީޕީގެ ބައެއް ބޭފުޅުންނަކީ މީގެ ކުރިން ބައެއް މީހުންނަށް ވަޒީގެ ބިރު ދައްކައި ހެދި މީހުންކަމަށެވެ. އެގޮތުން ޚުދު އޭނާވެސް ވަޒީފާއިން ކަނޑާލިކަމަށެވެ. އަދި ނަށަން ދަސްކޮށް ނުދީގެންނާއި، އެނޫން ސަބަބުތަކާއި ހެދިވެސް ވަޒީފާއިން ކަނޑާލާފައިވާ މީހުންވެސް އެބަތިބިކަމަށެވެ.
މަލާމާތެއް ނަމަވެސް އެމްޑީޕީގެ ބައެއް މެމްބަރުންގެ ނުފޫޒުން އަޅުގަނޑުގެ ވަޒީފާވެސް ގެއްލުވާލި. ނަށަން ދަސްކޮށްނުދީގެން ސަސްޕެންޑުކުރި އަދި ކަނޑާލި ޓީޗަރުންވެސް އެބަތިބި. ވީމާ، އެއީ ޤަބޫލުކުރަންޖެހޭ ހިތި ޙަޤީޤަތް.
– ޑރ.އިޔާޒު ވިދާޅުވިއެވެ.
ނަޝީދުގެ ފަރާތުން ނެރުނު ބަޔާނުގައި ބުނީ ރައީސްގެ ކެމްޕެއިން ޖަލްސާތަކުގައި ބައިވެރިވުމަށް ސަރުކާރު ހިއްސާވާ ކުންފުނިތަކުގެ މުވައްޒަފުންނަށް އެ ކުންފުނިތަކުގެ އިސްވެރިން އަންގަމުންދާ ކަމަށާއި ހަރަކާތްތަކުގައި ބައިވެރިނުވާ ނަމަ، އެ މުވައްޒަފުންނާ މެދު ފިޔަވަޅު އަޅާނެކަމުގެ އިންޒާރުވެސް ދެމުންދާ ކަމަށެވެ.
ނަޝީދުގެ ކެމްޕެއިން ޓީމުން ވަނީ ރައީސްގެ ކެމްޕެއިން ހަރަކާތްތައް ހިންގުމަށް ސަރުކާރުގެ އޮފީސްތައް ބޭނުންކޮށް ސަރުކާރުގެ އިދާރާތަކުގެ އިސް ބައެއް ވެރިން މަގާމުގެ ނާޖާއިޒް ބޭނުންހިފަމުންދާ ކަމުގެ ޝަކުވާތައް ވެސް ލިބޭ ކަމަށް ބުނެފައެވެ.
އެ ޓީމުން ބުނީ މިހާރު ސަރުކާރުން ފެންނަމުންދާ މި އަމަލުތަކަކީ 2008 ވަނަ އަހަރުގެ ރިޔާސީ އިންތިހާބުގެ ކުރިން އޭރުގެ ރައީސް މައުމޫނު އަބްދުލްގައްޔޫމްގެ ސަރުކާރުން ފެށިގެން އައި ކަންކަން ކަމަށެވެ. އެކަމަކު 2008 ގައި އެމްޑީޕީގެ ވެރިކަން އައުމަށް ފަހު އެކަން ނައްތާލިޔަސް ޔާމީންގެ ވެރިކަމުގައި އަލުން ވުޖޫދުވި އެކަން މި ސަރުކާރުން ވެސް ދަމަހައްޓަމުންދިއުމަކީ ކަންބޮޑުވާކަމެއް ކަމަށް ބުންޏެވެ.
