ކުރިޔަށްދާ އެމްޑީޕީގެ ރިޔާސީ ޕްރައިމަރީ މި ހިނގާ ޖެނުއަރީމަހުގެ 26 ވަނަ ދުވަހު ބޭއްވުމަށް ހަމަޖެހިފައިވާއިރު، ޕްރައިމަރީގައި ވާދަ ކުރައްވަމުން ގެންދަވާ އެ ޕާޓީގެ އެންމެ އިސް ދެލީޑަރުންވެސް މިހާރު ގެންދަވަނީ ޕްރައިމރީ ކެމްޕޭނުގައި އަވަދިނެތި ރަށްރަށަށް ދަތުރުކޮށް، ޕާޓީގެ މެމްބަރުންނާއި ބައްދަލު ކުރައްވަމުންނެވެ.

މިގޮތުން ކެމްޕޭން އިއުލާން ކުރުމާއެކު، ތާއީދު ފޯމު ޕާޓީއޮފީހަށް ހުށަހެޅުމަށްފަހު، އެމްޑީޕީގެ ރައީސް މުހައްމަދު ނަޝީދު ގެންދަވަނީ ރަށްރަށް ދަތުރުކޮށް ޕާޓީގެ މެމްބަރުންނާއި ބައްދަލު ކުރައްވަމުންނެވެ. އަދި މާލޭގައިވެސް ދޮރުން ދޮރަށް ހިގާ، މަގުމައްޗަށް ނިކުމެވަޑައިގެން، ނަޝީދުވެސް ގެންދަވަނީ ތާއީދު ހޯއްދެވުމަށް މަސައްކަތް ކުރައްވަމުންނެވެ.

އެއާއެކު، އާއަހަރުގެ ޗުއްޓީއަށްފަހު، ރައީސް ސާލިހުވެސް މިހާރުވަނީ ކެމްޕޭންގައި ތާއީދު ހޯއްދެވުމުގެ ގޮތުން ރަށްރަށަށް ދަތުރު ކުރައްވަން ފައްޓަވާފައެވެ. އަދި ޕާޓީގެ މެމްބަރުންނާއި ބައްދަލު ކުރައްވާ، ސަރުކާރުން ވައުދު ފުއްދެވުމަށް ކުރަމުންދާ މަސައްކަތްތަކުގެ މައުލޫމާތު ޕާޓީގެ މެމްބަރުންނާއި ހަމައަށް ގެންގޮސްދީ، ރައީސް ސާލިހުވެސް މިހާރުވަނީ ތާއީދު ހޯއްދެވުމުގެ މަސައްކަތް މެކުހައް ޖައްސަވާފައެވެ.

މިގޮތުން ފާއިތުވެދިޔަ 2 ހަފްތާއެއްހަ ދުވަހުގެ މުއްދަތުގައި، އެމްޑީޕީގެ ދެ ފެކްޝަނުން ކުރަމުންދާ ކެމްޕޭންގައި އެމްޑީޕީގެ ރައްޔިތުންގެ މަޖިލިހުގެ ބައެއް މެމްބަރުން ބައިވެރިވެ ވަޑައިގަންނަވަމުން ގެންދަވާއިރު، ބައެއް މެމްބަރުން ކޮޅު ބަދަލު ކުރައްވާ، އަދި އަނެއްބައި މެމްބަރުން އަދިވެސް ހަނު ތިއްބެވިތަން ދަނީ ފެންނަމުންނެވެ.

ކޮންމެއަކަސް، މިއީ ކުރިޔަށް އޮތް ރިޔާސީ އިންތިޚާބުގައި އެމްޑީޕީގެ ޓިކެޓްގައި ވާދަކުރާނޭ ކެނޑިޑޭޓަކު ހޮވުމަށް އެޕާޓީގެ އެތެރޭގައި ކުރިޔަށްދާ ކެމްޕޭނަކަށް ވެގެންދިޔަ ނަމަވެސް، މިއިންތިޚާބުގެ ނަތީޖާ ވެގެންދާނީ އިންތިޚާބުން ބަލިވާ ކެނޑިޑޭޓަކު ތަހައްމަލް ކުރާނެޖެހޭ އާދަޔާ ޚިލާފު ބޮޑު ބައްޔެއް ކަމުގައި ދަންނަވާން ޖެހެއެވެ.

ސަބަބަކީ، އެއީ ވެރިކަމުގެ ހުންނަވައިގެން، ޕާޓީގެ ރިޔާސީ ޕްރައިމަރީ ކާމިޔާބު ނުވެ ދިއުން ރައީސް ސާލިހުގެ 2023ގެ ހުވަފެންތަކަށް އެޅިގެންދާ ވަރަށްވެސް ބޮޑު ހިޔަންޏަކަށް ވެގެން ދާނޭކަމެވެ. އަދި މިއިންތިޚާބުން އެމްޑީޕީގެ ރައީސް މުހައްމަދު ނަޝީދު ބަލިވެގެން ހިގައްޖެނަމަ، އެ ނަތީޖާ ވެގެންދާނީ ރައީސް ސާލިހާއި ވާދަކޮށްގެން ނަޝީދު ކުރިމަތިލައްވަން ޖެހިވަޑައިގަންނަވާނެ 3 ވަނަ ބައްޔަށް ވެގެންދާނެތީވެސް މެއެވެ.

ޕްރައިމަރީ ކާމިޔާބު ނުވެއްޖެނަމަ، ނަޝީދު 3 ވަނަ ފަހަރަށް ބަލި!

ރައީސް ސާލިހުގެ ރިޔާސީ ދައުރުގެ މެދަކާއި ހަމައިން ނަޝީދާއި ރައީސް ސާލިހުއާއި ދެބޭފުޅުންގެ މެދުގައި އުފެދެންފެށި ޚިޔާލުތަފާތުވުންތައް އޭގެ ހައްދުން ނެއްޓި، މި ޚިޔާލުތަފާތުވުންތައް ސިޔާސީ ދެކޮޅުވެރިކަމަށް ބަދަލުވެ، ޕާޓީ ދެ ފެކްޝަނަކަށް ބެހި، އެންމެ ފަހުން ދެބޭފުޅުން މިވަނީ ދެބޭފުޅުންނާއި ވާދަކުރެއްވުމަށް ނިކުންނަވާފައެވެ.

އެހެންނަމަވެސް، މިހާރު ކުރިޔަށްދާ ރިޔާސީ ޕްރައިމަރީގެ ކުރިންވެސް، ޕާޓީގެ އެތެރޭގައި އުފެދިގެން ގޮސްފައިވާ ބައިބައިވުންތަކުގައި ދެފެކްޝަނުންވަނީ ދެ ފަހަރެއްގެ މަތިން ގަދަ ހިފުމަކަށް ގޮސްފައެވެ. އެއީ ދެފެކްޝަނުގެ މެދުގައި ހިގައިދިޔަ ވާދަވެރިކަމަކަށް ވިނަމަވެސް، ހުރިހާ ހައިސިއްޔަތަކުންވެސް، އެއީވެސް ސީދާ ރައީސް ސާލިހާއި ނަޝީދާއި ދެބޭފުޅުންގެ މެދުގައި ހިގައިދިޔަ ވާދެރިކަމެއްކަން އޮތީ ވަރަށްވެސް ސާފުކޮށް ފެންނާށެވެ.

މިގޮތުން، ފާއިތުވެދިޔަ މުއްދަތުގައި އެމްޑީޕީގެ އެތެރޭގައި، ރައީސް ސާލިހާއި ނަޝީދުއާއި ދެބޭފުޅުންގެ މެދުގައި އެންމެ ފުރަތަމަ ފެނިގެންދިޔަ ވާދަވެރިކަމަކަށް ވެގެން ދިޔައީ ފާއިތުވެދިޔަ އަހަރުގެ ކުރީކޮޅު އޮތް އެ ޕާޓީގެ ޗެއަރޕާސަން އިންތިޚާބެވެ. އެ އިންތިޚާބުގައި ރައީސް ސާލިހުގެ ފަރާތުން މިހާރުގެ ޗެއަރޕާސަން ފައްޔާޒް އިސްމާއިލް ވާދަ ކުރައްވާފައިވާއިރު، ނަޝީދުގެ ފަރާތުން ވާދަ ކުރެއްވީ ރައްޔިތުންގެ މަޖިލިހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއެވެ.

މިއިންތިޚާބުގައި 8 ހާސް ވޯޓުގެ ތަފާތުން ކުރި ހޯއްދަވާފައިވަނީ، ރައީސް ސާލިހުގެ ތާއީދާއެކު ވާދަކުރެއްވި ފައްޔާޒު އިސްމާއިލްއެވެ. އެމްޑީޕީގެ އެތެރޭގައި އުފެދި އާލާވަމުންދިޔަ ސިޔާސީ ވާދަވެރިކަމުގައި، މިއިންތިޚާބު ތަމްސީލުވެގެން ދިޔައީ އެޕާޓީގެ އެތެރޭގައި ދެ ރައީސުންގެ ތާއީދާއި، ބާރާއި ނުފޫޒު އޮތްގޮތް ތަމްސީލުކޮށްދިން ފުރަތަމަ އިމްތިހާނު ކަމުގައެވެ.

އެއަށްފަހު ދެން ކުރިމަތި ލާންޖެހުނީ އެމްޑީޕީގެ ކޮންގްރެސްއާއެވެ. މި ކޮންގްރެސްގައި ނަޝީދުވަނީ ބަރުލަމާނީ ނިޒާމެއް ރާއްޖެއަށް ތައާރަފް ކުރުމަށް ކޮންގްރެސްއިން ފާސްކުރުމަށް، ގަދަބަސް ވިދާޅުވެ، ގަދައަޅާ މަސައްކަތްވެސް ކުރައްވާފައެވެ. އެހެންނަމެވެސް އޭގެ ކުރިންވެސް ރައީސް ސާލިހުވަނީ، ބަރުލަމާނީ ނިޒާމެއް ރާއްޖެއަށް އަލުން ތައާރަފްކުރުމަށް ތާއީދު ނުކުރައްވޭނޭކަން ހާމަ ކުރައްވާފައެވެ.

އޭގެ ނަތީޖާއަކަށް ވެގެން ދިޔައީ، ބަރުލަމާނީ ނިޒާމަކަށް ރާއްޖޭގެ ވެރިކަމުގެ ނިޒާމު ބަދަލުކުރުމަށް ކޮންގްރެސްއިން ގަރާރެއް ފާސްކުރުމަށް ނަޝީދު ކުރައްވަމުން ގެންދެވި މަސައްކަތްތައް ނާކާމިޔާބުވެގެން ދިއުމެވެ. އަދި ރައީސް ސާލިހަށްވެސް އެންމެ ފަހުން ޖެހިވަޑައިގަތީ ނަޝީދަށް "ފޭސް ސޭވިންގ ފޯމިއުލާ"އެއް މި ކޮންގްރެސްގައި ހޯއްދަވާ ދެއްވާށެވެ.

މިގޮތުން، މި ކޮންގްރެސްގެ ނިންމުމުގެ ޖަލްސާގައި، އެންމެ ފަހުން ނަޝީދު ވިދާޅުވެފައިވަނީ، ހުށަހެޅުއްވި ގަރާރު އަނބުރާ ގެންދަވަން ނިންމެވީ ކަމަށާއި، ބޭނުންފުޅުވަނީ ބަރުލަމާނީގެ މަޝްވަރާތައް ކޮންގްރެސްއަށްފަހުވެސް ކުރިޔަށް ގެންދެވުމަށް ކަމަށެވެ.

އެހެންނަމަވެސް، އެމްޑީޕީގެ ކޮންގްރެސްގައި ބައިވެރިވި މަންދޫބުންގެ ފަރާތުން ނަޝީދަށް ކުރިމަތިވެގެންދިޔަ ފުރައްސާރައާއި، ނަޝީދުގެ ހުށަހެޅުއްވުންތަކަށް ކުރިމަތިވި ބޮޑެތި ގޮންޖެހުންތަކުން ސާފުވެގެން ދިޔަ އެއްކަމަކީ، ޗެއަރ ޕާރސަން އިންތިޚާބެކޭ އެއްފަދައިން، ކޮންގްރެސްގައިވެސް ފެނިގެންދިޔަ ދެރައީސުންގ ގަދަ ހިފުމުގައިވެސް ބޮޑު ބައްޔަކާއި ނަޝީދށް ކުރިމަތިލައްވަން ޖެހިވަޑައިގަތް ކަމެވެ.

އެންމެ ފަހުގެ ގަދަ ހިފުން!

ވެރިކަންކުރާ މައި ޕާޓީ، އެމްޑީޕީގެ އެތެރޭގައި، ދެރައީސުންގެ މެދުގައި އުފެދިގެން ގޮސްފައިވާ ސިޔާސީ ވާދަވެރިކަމުގައި، ފާއިތުވެދިޔަ ތަނުގައި ދެފަހަރެއްގެ މަތިން، ދެރައީސުންގެ މެދުގައި ތަމްސީލު ވެގެންދިޔަ ގަދަ ހިފުމުގައި ނަޝީދަށް ކުރިމަތިލާން ޖެހުނު ނާކާމިޔާބީއާއެކު، މިފަހަރުގެ ޕްރައިމަރީ ފާހަގަވެގެން ދަނީ، މިއީ ރައީސް ސާލިހުއާއި ނަޝީދުއާއި ދެބޭފުޅުން ގަދަ ހިފުމަކަށް ނިކުންނަވާ 3 ވަނަ ފަހަރު ކަމުގައެވެ.

އަދި، އެހެން ފަހަރުތަކާއި ޚިލާފަށް މި ގަދަ ހިފުމުގައި ދެބޭފުޅުންވެސް ގެންދަވަނީ، ކެމްޕޭނަށް ނިކުމެވަޑައިގެން ސީދާ ގޮތުން ދެބޭފުޅުން ދެބޭފުޅުނަށް ފާޑު ވިދާޅުވެ، ހަމަލާ ބަދަލު ކުރައްވަމުންނެވެ. އޭގެ ނަތީޖާއެއްގެ ގޮތުން މިއިންތިޚާބުގެ ނަތީޖާ ނިކުމެގެން ދާ ގޮތެއްގެ މައްޗަށް ގިނަ ބައެއްގެ ނަޒަރު ހުއްޓިގެން ގޮސްފައިވާއިރު، މިއިންތިޚާބުގެ ނަތީޖާއިން ދެބޭފުޅުންކުރެ ކޮންމެ ބޭފުޅަކަށް ނާކާމިޔާބީއާއި ކުރިމަތިލައްވަން ޖެހިވަޑިގަތަސް، އެ ނަތީޖާއެއް ވެގެންދާނީ، އެބޭފުޅެއްގެ ސިޔާސީ ހަޔާތަށް އެޅިގެންދާ ވަރަށްވެސް ބޮޑު ހިޔަންޏެއްކަމީ ކަށަވަރުވެ ޔަގީންވާން އޮތް ކަމެކެވެ.

ހަމަ އެއާއެކު، އެމްޑީޕީގެ އެތެރޭގައި އުފެދިފައިވާ ސިޔާސީ ވާދަވެރިކަމުގައި، އެޕާޓީގެ ޗެއަރޕާސަން އިންތިޚާބާއި، އަދި ފާއިތުވެދިޔަ ޕާޓީގެ ކޮންގްރެސްގައިވެސް، ރައީސް ސާލިހާއި ވާދަކުރައްވާ ނަޝީދަށް ނާކާމިޔާބީއާއި ކުރިމަތިލައްވަން ޖެހިވަޑައިގެންފައިވާއިރު، ކުރިޔަށްދާ ރިޔާސީ ޕްރައިމަރީގެ އިންތިޚާބުގައި ނަޝީދަށް ނާމާކާމިޔާބީއާއި ކުރިމަތިލައްވަން ޖެހިވަޑައިގެންފިނަަ، އެ ނާކާމިޔާބީ ވެގެންދާނީ ރައީސް ސާލިހާއި ވާދަކޮށް، ނަޝީދު ވެގެންދާނެ 3 ވަނަ ބަލި ކަމުގައެވެ.

އަދި މިހާރު ކުރިޔަށްދާ ޕްރައިމަރީގެ ކެމްޕޭންގައި އެމްޑީޕީގެ ރައްޔިތުންގެ މަޖިލިހުގެ ގިނަ އަދަދެއްގެ މެމްބަރުންނާއި، އޭގެ އިތުރުން ގައުމީ މަޖިލީހުގެވެސް ބޮޑު މެޖޯރިޓީއެއްގެ ތައީދު ރައީސް ސާލިހަށް އޮތުމުގެ އިތުރުން، އިންތިޒާމް ކުރެވި، މުޅި ރާއްޖޭގައި ރައީސް ސާލިހުގެ ޓީމުން ކުރިޔަށްގެންދާ ކެމްޕޭނަށް ރަގަޅަށް ނަޒަރެއް ހިންގާލާއިރު، ގިނަ ބަޔަކު ގަބޫލުކުރާ ގޮތުގައި ނަޝީދު ކުރައްވަމުން ގެންދަވާ ކެމްޕޭގައި ކެމްޕޭން ޓީމުން އަމަލީގޮތުން ކުރަމުންދާ މަސައްކަތްތަކަށްވުރެ ބޮޑަށް އިސްކަން ދީފައިވަނީ، ނަޝީދުގެ ދަތުރުތަކާއި ފޮޓޯތައް ސޯޝަލް މީޑިއާގައި ޕްރޮމޯޓު ކުރުމަށެވެ.

މިގޮތުން އިންތިޚާބު ބޮޑު ތަފާތަކުން ކާމިޔާބު ކުރުމުގެ ފުރުސަތު ރައީސް ސާލިހަށް ބޮޑު ކަމުގައި ގިނަބަޔަކު ދަނީ ބުނަމުންނެވެ.