ރަޝިއާއިން ޔޫކުރެއިންގައި ކުރަމުންދާ ހަނގުރާމަ ވަގުތީގޮތުން މެދު ކަނޑާލުމަށް ރަޝިއާއިން ހުށަހެޅި ހުށަހެޅުމަށް ޔޫކުރެއިން، ޖާމަނީ އަދި އެމެރިކާއިންވެސް ދެކޮޅު ހަދައިފިއެވެ.
ރަޝިއާއިން ޔޫކުރެއިން ކުރަމުންދާ ހަގުރާމަ 36 ގަޑިއިރަށް މެދުކަނޑާލުމަށް ބުރާސްފަތި ދުވަހު ހުށަހެޅީ އެގައުމުގައި ފާހަގަ ކުރާ އޯތޮޑޮކްސް ކުރިސްމަސްއާއި ގުޅިގެންނެވެ.
މިގޮތުން ރަޝިއާގެ ރައީސް ލާޑިމިރު ޕުޓިން ބުރާސްފަތި ދުވަހުވަނީ، މިފަހްތާގައި ރަޝިއާއާއި ޔޫކުރެއިންގައިވެސް ފާހަގަކުރާ އޯތޮޑޮކްސް ކުރިސްމަސްއާއި ގުޅިގެން، ވަގުތީގޮތުން ހަނގުރާމަ ހުއްޓާލުމަށް އެގައުމުގެ އަސްކަރިއްޔާއަށް އަމުރު ކޮށްފައެވެ.
މިއީ ފާއިތުވެދިޔަ އަހަރުގެ ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް ހަމަލަ ދޭން ފެށިފަހުން، ހަގުރާ ވަގުތީ ގޮތުން ނަމަވެސް ހުއްޓާލުމަށް ރަޝިއާއިން ނިންމި ފުރަތަމަ ފަހަރެވެ.
"ރަޝިއާއިން ޖެހޭނީ ޔޫކުރެއިންގެ ބިމުން އެކީ ފައިބާން. ވަގުތީ ގޮތުންވިޔަސް ހަގުރާމަ ހުއްޓާލުމަށް އަހަރެމެން އެއްބަސްވާން އޮތް ގޮތަކީ މިއީ. އަމިއްލަ ނަފްސަށް އޮޅުވާލިއްޔާ މާ ރަގަޅުވާނެ،" ކްރެމްލިންއިން ވަގުތީގޮތުން ހަނގުރާމަ ހުއްޓާލުމަށް އިއުލާން ކުރުމާއެކު، ޔޫކުރެއިންގެ ރައީސްގެ މުޝީރު މިޚައިލާ ޕޮޑޮލްޔަކް އޭނާގެ ޓުވިޓަރގައި ލިޔުއްވާފައި ވެއެވެ.
"މިއީ ޕްރޮޕަގެންޑާ ނޫން އެހެންއެއްވެސް އެއްޗެއް ނޫން،" އޭގެ ފަހުން ކުރި އެހެން ޓުވީޓެއްގައި ޕޮޑޮލްޔަކް ކިޔުއްވާފައި ވެއެވެ.
އެމެރިކާގެ ރައީސް ޖޯ ބައިޑްން ވިދާޅުވެފައިވަނީ ރަޝިއާއިން، އޯތޮޑޮކްސް ކުރިސްމަސް ފާހަގަ ކުރުމަށް ދެދުވަހަށް ހަގުރާމަ ހުއްޓާލުމަށް ހުށަހަޅާފައިވަނީ، އެމީހުން ހަމަނޭވާއެއް ލާން ވަގުތުކޮޅެއް ހޯދުމުގެ ބޭނުމުގައި ކަމުގައެވެ.
"ޑިސެމްބަރު 25ގައާއި، އާއަހަރު ފެށުނު ދުވަހުވެސް އޭނާ ހުރީ ހޮސްޕިޓަލްތަކަށާއި، ނާސަރީތަކަށް ބޮން އެޅުމަށް ތައްޔާރަށް،" ބައިޑްން ވިދާޅުވިއެވެ. "އަހަރެންނަށް ހީވަނީ އޭނާ މަަަސައްކަތް ކުރަނީ ކޮންމެވެސް ވަރަކަށް އޮކްސިޖަން ހޯދުމަށް ހެން."
ޖާރމަނީގެ ފޮރިންގ މިނިސްޓަރ އަންނާލިނާ ބާރބޮކް ވަނީ ވަގުތީގޮތުން ހަނގުރާމަ ހުއްޓާލުމަށް ރަޝިއާއިން އެދުނު އެދުމަށް ދެކޮޅު ހައްދަވަމުން، ހަނގުރާމަ ހުއްޓެން އޮތް ހަމައެކަނި ގޮތަކީ "ރަޝިއާ ސިފައިން އެބުރި ގައުމަށް ގެންދިއުން" ކަމަށް ވިދާޅުވެފައެވެ.
