ޖާރމަނީންވެސް ޔޫކުރެއިންއަށް ޕެޓްރިއޮޓް އެއަރ ޑިފެންސް މިސައިލް ބެޓަރީ ފޯރުކޮށް ދިނުމަށް ހަމަޖެހިފައިވާކަމަށް ވައިޓްހައުސްއިން ބުރާސްފަތި ދުވަހު އިއުލާން ކޮށްފިއެވެ.
އެމެރިކާއިން މިކަން އިއުލާން ކޮށްފައިވަނީ، އެމެރިކާގެ ރައީސް ޖޯ ބައިޑްންއާއި ޖާރމަނީގެ ޗާންސެލަރ އޮލާފް ޝޯލްޒްގެ ދެމެދުގައި އޮތް ފޯލް ކޯލަކަށްފަހު، ދެގައުމުން ގުޅިގެން ނެރުނު ބަޔާނެއްގައެވެ.
އެމެރިކާއިން ވަނީ، އެގައުމުން މިހާތަނަށް ޔޫކުރެއިންއަށް ފޯރުކޮށްދޭ ހަތިޔާރުގެ ޕެކޭޖްގެ ގޮތުގައި، ޔޫކުރެއިންއަށް އެއް ޕެޓްރިއޮޓް އެއަރ ޑިފެންސް ސިސްޓަމް ދިނުމަށް ހަމަޖައްސާފައި ވާކަމަށް ބުނެފައެވެ.
ބުރާސްފަތި ދުވަހު ދެގައުމުގެ ލީޑަރުންވެސްވަނީ، ރަޝިއާއިން ޔޫކުރެއިންއަށް ދެމުންދާ މިސައިލް އަދި ޑްރޯން ހަމަލާތަކާއި ގުޅިގެން ޔޫކުރެއިންއަށް މިހާރުން މިހާރަށް ބޭނުންވެފައިވާ ވައިގެ ދިފާއީ ގާބިލްކަން އިތުރު ކުރުމަށް އެހީތެރިކަން ފޯރުކޮށް ދިނުމަށް އެއްބަސްވެފައެވެ.
"އެމެރިކާއެކޭ އެއްފަދައިން، ޖާރމަނީންވެސް ވަނީ ޔޫކުރެއިންއަށް އިތުރު ޕެޓްރިއޮޓް އެއަރ ޑިފެންސް ބެޓަރީއެއް ފޯރުކޮށް ދިނުމަށް ހަމަޖައްސާފަ،" ދެ ގައުމުން ގުޅިގެން ނެރުނު ނޫސް ބަޔާނުގައި ވިދާޅުވެފައި ވެއެވެ.
އަދި އޭގެ އިތުރުންވެސް، އެމެރިކާއާއި ޖާމަނީންއިން ޔޫކުރެއިންއަށް ބްރޭޑްލީ އިންފެންޓްރީ ފައިޓިންގ ވެހިކަލްއާއި، މާރުޑަރ އިންފެންޓްރީ ފައިޓިންގ ވެހިކަލް ފޯރުކޮށް ދިނުމަށްވެސް ވަނީ ހަމަޖެހިފައެވެ.
އެމެރިކާގެ އޮފިޝަލުންނާއި ހަވާލާދީ ދަ އެސޯޝިއޭޓް ޕްރެސްގެ އިން ރިޕޯޓު ކޮށްފައިވާ ގޮތުގައި، ޔޫކުރެއިންއަށް 2.85 ބިލިއަން ޑޮލަރުގެ ހަތިޔާރުގެ އާ ޕެކޭޖެއް އެމެރިކާއިން ހުކުރު ދުވަހު އިއުލާން ކުރާނެއެވެ. އަދި މިއީ ޕެންޓަގަންގެ ހަތިޔާރު ގުދަނުން މިހާތަނަށް އެއްފަހަރާ ފޯރުކޮށްދޭ އެންމެ ގިނަ އަދަދެއްގެ ހަތިޔާރަށް ވެގެން ދާނެއެވެ.
އެސޯޝިއޭޓް ޕްރެސްއިން ރިޕޯޓު ކޮސްފައިވާ ގޮތުގައި މިފަހަރު ފޯރުކޮށްދޭ ހަތިޔާރުގެ ތެރޭގައި ހުމްވީސް އާއި، މައިން ރެސިސްޓަންޓް އެމްބުޝް ޕްރޮޓެކްޓެޑް ވެހިކަލްއާއި، މިސައިލްގެ އިތުރުން އެހެނިހެން ބާވަތްތަކުގެ ހަތިޔާރުތައްވެސް ހިމެނޭނެއެވެ.
