އެމްޑީޕީގެ ފުރަތަމަ ސަރުކާރުގައި، ނަޝީދުގެ ވެރިކަމުގައި ސޮއިކޮށްފައިވަނީ ފެނުގެ އެންމެ މަޝްރޫއެއްގައި ކަމަށާއި، ނަރުދަމާގެ ނިޒާމް ގާއިމް ކުރުމަށް 2008 އިން 2012 އާ ދޭތެރޭ ސޮއިކުރެވިފައި އިނީ އެންމެ 8 ރަށުގައި ކަމަށް ރައީސުލްޖުމްުހޫރިއްޔަ އިބުރާހިމް މުހައްމަދު ސާލިހު ވިދާޅުވިއެވެ.

ރޭ އެމްޑީޕީގެ މައި ޖަގަހައިގައި "ކުރިޔަށް" މި ނަމުގައި ބޭއްވުނު ރައީސް ސާލިހުގެ ފެކްޝަންގެ އެމްޑީޕީ ޕްރައިމަރީގެ ފުރަތަމަ ރަސްމީ ބައްދަލުވުމުގައި ވާހަކަ ދައްވަމުން ރައީސް ސާލިހު ވިދާޅުވީ އެމަނިކްފާނު ވެރިކަމަށް ވަޑައިގެންނެވިއިރު ރައްޖޭގެ 90 އިންސައްތައަށްވުރެ ގިނަ ރަށުގައި ލިބެން ހުރީ ނަޖިސްފެން ކަމުގައެވެ.

ތަފާސް ހިސާބުތަކުން ފެންނަން އެބަހުރި. އަޅުގަޑުމެންގެ ފުރަތަމަ ސަރުކާރުގައި، 2008 އިން 2012 އަށް އޮތް ސަރުކާރުގައި ހަމައެކަނި ފެނުގެ ސޮއި ކުރެވިފައި އިނީ އެންމެ ޕްރޮޖެކްޓެއްގައި. އެންމެ ރަށެއްގައި ފެނުގެ ނިޒާމް ގާއިމް ކުރެވިފައި އިނީ. ނަރުދަމާގެ ނިޒާމް ގާއިމް ކުރުމަށް 2008 އިން 2012 އާއި ދޭތެރޭގަ ސޮއި ކުރެވިފައި އިނީ އެންމެ 8 ރަށުގަ.

ރައީސް ވިދާޅުވީ، އެހެންނަމަވެސް، 2018ގައި އުފެދުނު އެމްޑީޕީގެ ވެރިކަމުގައި 141 ރަށުގައި ގެންދަނީ ފެނާއި ނަރުދަމާގެ ނިޒާމު ގާއިމް ކުރަމުން ކަމުގައެވެ.

އެމްޑީޕީގެ ގިނަ އަދަދެއްގެ މެމްބަރުން ހާޒިރުވި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ. ރައީސް ސާލިހު ވިދާޅުވީ މާލެ ސަރަހައްދުގައި ބޯހިޔާވަހިކަން ފޯރުކޮށް ދިނުމަށް މިހާރުވެސް 8،782 ފްލެޓްގެ މަސައްކަތް އަމަލީގޮތުން ހިގަމުން ދާކަމުގައެވެ. އަދި މިހާތަނަށް އެއްވެސް ސަރުކާރަކަށް، އެސަރުކާރަކުން ފެށި ފްލެޓް މަޝްރޫއެއް ނިންމާ، ރައްޔިތުން އެ ފްލެޓްތަކަށް ވެއްދިފައި ނުވާކަމަށް ވިދާޅުވަމުން ރައީސް ސާލިހު ވިދާޅުވީ މި ސަރުކާރުގެ މި 5 އަހަރު ނިމޭއިރު، ސަރުކަރުން އަޅަމުންދާ ފްލެޓްތަކުން ބަޔަކަށް މާލޭގެ ރައްޔިތުންނަށް ވަދެވި، ދިރިއުޅެވޭވަރު ކޮށްދެއްވާނެ ކަމުގައެވެ.

އޭގެ އިތުރުން މާލޭގެ ރައްޔިތުންނަށް ގޯތި ދިނުމަށްޓަކާ އަޅުގަޑު ވީވައުދު، 5،000 ގޯތި ދިނުމުގެ ވައުދު އިރާދަކުރެއްވިއްޔާ ކަޑަޖަހާ، ބިންވަކިކޮށް، ރޯނުދަމާ، މާލޭގެ ރައްޔިތުންނަށް މިއަަހރު ތެރޭގައި އެކަން ކޮށްދޭނަން. އަޅުގަޑު މިކަން ކުރާނީ ކުރެންދޫ ރައްޔިތުންނަށް ކަނޑުން އެއްހާސް ގޯތި ދިން ގޮތަކަށް ނޫން.