ރާއްޖޭގެ ގައުމީ އެއާލައިން، މޯލްޑިވިއަން އަށް މުޅިން އަލަށް ގެންނަ ދެ ބޯޓު މާދަމާ ރާއްޖެ އަށް އަންނާނެ ކަމަށް އެ ކުންފުނިން ބުނެފިއެވެ.
މޯލްޑިވިއަނުން ބުނީ އެ ކުންފުނިން ގެންނަ އޭޓީއާރު 72 މަރުކާގެ 2 ބޯޓު މިހާރު ފްރާންސްގެ ޓުލޫސްއިން ފުރައިގެން ރާއްޖެ އައުމުގެ މަގުމަތީގައިވާކަމަށެވެ. އަދި މި 2 ބޯޓަށް ރާއްޖެ އާދެވޭނީ މާދަމާކަމަށް މޯލްޑިވިއަނުން ބުނެއެވެ. މޯލްޑިވިއަންގެ ބޯޓުތައް މާދަމާ ގެންނާތީ އެއަރޕޯޓުގައި ހާއްސަ ހަރަކާތްތަކެއްވެސް ބޭއްވުމަށް ވަނީ ނިންމާފައެވެ.
މި މަހުން ފެށިގެން އެތެރޭގެ އުދުހުންތަކުގައި މި ދެ ބޯޓު ބޭނުންކުރަން ފަށާއިރު މިއީ އެތެރޭގެ އުދުހުންތަކުގައި ބޭނުންކުރާ ބޯޓުތަކުގެ ފްލީޓް އާ ކުރުމަށް ގެންނަ ބޯޓުތަކެއް ކަމަށް މޯލްޑިވިއަނުން ބުނެއެވެ. އައިލެންޑް އޭވިއޭޝަނުގެ ފަރާތުން އޭޓީއާރު މަރުކާގެ ތިން ބޯޓު ހޯދުމުގެ މަސައްކަތް ފަށާފައި ވަނީ މިދިޔަ އަހަރުގެ ތެރޭގައެވެ. އެއީ އޭޓީއާރު 72 މަރުކާގެ ދެ ބޯޓާއި އޭޓީއާރު 42 މަރުކާގެ އެއް ބޯޓެވެ.
އަލަށް ގެންނަ މި ބޯޓުތަކަކީ ތެޔޮ ހަރަދު ކުޑަ އަދި މަރާމާތުގެ ހަރަދުވެސް ކުޑަ ބޯޓުތަކެއް ކަމަށް އެކުންފުނިން ބުނެއެވެ. އެ ކުންފުނިން އިތުރަށް ބުނެފައިވަނީ މި ދެ ބޯޓުގެ އިތުރުން، އިތުރު ބޯޓެއް ވަރަށް އަވަހަށް ރާއްޖެ އަށް ގެނައުމަށް މަސައްކަތް ކުރަމުންދާ ކަމަށެވެ.
We are thrilled to share with you that two of our brand new ATR 72-600 aircraft have departed from Toulouse, France today and is scheduled to arrive to Maldives on 04th January 2023. #itscominghome#maldivian pic.twitter.com/nCAh2aCI5m
— MaldivianAero (@MaldivianAero) January 2, 2023
ސްކޫލް ބަންދު ދުވަސްވަރު އެތެރޭގެ އުދުހުންތަކަށް އޮންނަ ޑިމާންޑް އިތުރުވާތީ މޯލްޑިވިއަނުން ވަނީ "ވެޓް ލީސް" އެއާ ކްރާފްޓެއް ވެސް މިދިޔަ މަހު ރާއްޖެ އަށް ގެނެސްފައެވެ. މޯލްޑިވިއަންގެ ފްލީޓުގައި 23 ބޯޓު އޮތް އިރު، އޭގެ ތެރޭގައި ހިމެެނެނީ ބައިނަލްއަގުވާމީ ދަތުރުތަކުގައި ބޭނުންކުރާ އެއާބަސްގެ ދެ ބޯޓާއި އެތެރޭގެ އުދުހުންތަކުގައި ބޭނުންކުރާ 10 ބޯޓުގެ އިތުރުން 11 ސީޕްލޭން ބޯޓެވެ.
