ޗެމްޕިއަން މެންޗެސްޓަރ ސިޓީއަށް އެވަޓަން އަތުން މޮޅުނުވެވި, އެއްވަނައަށް ދާން އަނެއްކާވެސް ހުރަސްތަކެއް ކުރިމަތިވެއްޖެއެވެ.
ސިޓީ ދަނޑުގައި ރޭ ކުޅުނު މެޗުގައި އެ ޓީމަށް ލީޑުނަގައިދިނީ އާލިން ބްރައުޓް ހާލަންޑްއެވެ. މެޗުގެ 24 ވަނަ މިނިޓްގައި ރިޔާދު މާރޭޒް ނެގި ހުރަހަކުން އޭރިއާތެރޭގައި ހުރެފައި، ހާލަންޑް އެއް ފަހަރުން ޖެހި ބޯޅަ އަމާޒުވީ ގޯލުގެ ތެރެއަށެވެ. މިއީ ލީގުގައި ހާލަންޑް ޖެހި 21 ވަނަ ގޯލެވެ. މުޅި ސީޒަނުގެ ޖުމްލަ އަކީ 27 ގޯލެވެ.
އެވަޓަން އިން ވަނީ ސިޓީ އިތުރު ގޯލެއް ޖެހިޔަނުދީ ހިފަހައްޓައިފައެވެ. ލިބޭ ފުރުސަތުތަކުގައި ގޯލެއް ޖެހޭތޯ ބަލަމުންދިޔަ އެވަޓަން އިން އެއްވަރުކުރި ލަނޑު ޖެހީ މެޗުގެ 64 ވަނަ މިނިޓްގައެވެ. ސިޓީގެ މިޑްފީލްޑަރު ރޮޑްރީ އަތުން ގެއްލުނު ބޯޅައެއް ހޯދައި، އެވަޓަންގެ އިދްރީސާ ގާނާ ގޭއި، އެ ޓީމުގެ ޑެމަރާއި ގްރޭ އަށް ދިން ބޯޅަ ހިފަައިގެންގޮސް، އޭނާ ވަނީ ގޯލުގެ މަތީ ކަނަށް ބޯޅަ ފޮނުވާލައިފައެވެ. އެ ބޯޅަ ހުއްޓުވަން ސިޓީގެ ކީޕަރު އެޑަސަން މޮރާއެސް އަށް އެއްވެސް ކަމެއް ނުކުރެވުނެވެ.
މިނަތީޖާގެ ސަބަބުން އެއްވަނާގައި އޮތް އާސެނަލްއަށް ފަރަގު ހަތް ޕޮއިންޓަށް ބޮޑުކުރުމުގެ ފުރުސަތު ލިބުނީއެވެ. އާސެނަލްއަށްވުރެ އިތުރަށް މެޗެއް ކުޅެގެންވެސް ސިޓީއާއި އާސެނަލްއާ ދެމެދު ހަތަރު ޕޮއިންޓްގެ ފަރަގެއް އެބައޮތެވެ. އެވަޓަން އޮތީ 15 ޕޮއިންޓާއެކު 16 ވަނާގައެވެ. ރެލިގޭޝަނާ ދެމެދު އޮތީ ދެ ޕޮއިންޓްގެ ފަރަގެކެވެ.
