ސްޕެނިޝް ލީގުގައި ރޭ ކަރީމް ބެންޒެމާގެ ދެ ގޯލުން 2-0 އިން ރެއާލް ވަލޮޑޮލިޑް ބަލިކޮށް އެންމެ ފަހުގެ ޗެމްޕިއަން، ރެއާލް މެޑްރިޑް ލީގުގެ އެއް ވަނަ އަށް ޖެހިލައިފިއެވެ.
އަނިޔާގެ ސަބަބުންނާއި, ކޯޗާ ޖެހުނު މައްސަލައެއްގެ ސަބަބުން ވަރލްޑްކަޕްގެ ފައިނަލްގައި ވާދަކުރި ފްރާންސް ޓީމުން ފަހުވަގުތު ފުރުޞަތު ގެއްލުނު ބެންޒިމާ ރެއާލް މޮޅުކޮށްދިނީ ފަހު ހަތް މިނިޓްގެ ތެރޭގައި ރެއާލް ވަލޮޑޮލިޑް ކޮޅަށް ދެ ގޯލް ޖަހައިގެންނެވެ.
ޤައުމީ ޓީމަށް ކުޅުން ހުއްޓާލިކަން އިއުލާންކޮށްފައިވާ ބެންޒިމާ ފުރަތަމަ ގޯލް ޖެހީ 83 ވަނަ މިނިޓްގައި ލިބުނު ޕެނަލްޓީއަކުންނެވެ. ޕެނަލްޓީ ދިނީ އޭރިޔާ ތެރެއިން ކުޅުންތެރިއަކު އަތުގައި ބޯޅަ ޖެހުމުންނެވެ. އެޕެނަލްޓީ ދިމުމުގެ ކުރިން ރެއާލް ވަލޮޑޮލިޑްގެ ލެއޯންއަށް ރެފްރީ ރަތްކާޑް ދައްކާފައިވާތީ އެޓީމުން މެޗު ފުރިހަމަކުރީ 10 ކުޅުންތެރިންނާއެކުއެވެ. ބެންޒިމާ ދެވަނަ ލަނޑު ޖެހީ ކަމަވިންގާ ތަނަވަސްކޮށްދިން ފުރުޞަތަކުން މެޗުގެ ފަހު މިނިޓްގައެވެ.
މިއީ އޮކްޓޫބަރު 19 ވަނަ ދުވަހުގެ ފަހުން ބެންޒެމާ ރަސްމީ މެޗެއްގައި ކުޅުނު ފުރަތަމަ ފަހަރެވެ. ގަތަރުގައި ކުރިއަށްދިޔަ ފީފާ ވޯލްޑް ކަޕްގެ ފްރާންސްގެ ސްކޮޑުގައި ހިމެނުނު ނަމަވެސް އަނިޔާގެ ސަބަބުން ބެންޒެމާ މެޗެއް ނުކުޅެއެވެ. ބެންޒެމާ ވަނީ ވޯލްޑް ކަޕަށް ފަހު ފްރާންސް ގައުމީ ޓީމުން ރިޓަޔާކޮށްފައެވެ.
ރެއާލް އެއް ވަނަ އަށް އެރީ 15 މެޗުން 38 ޕޮއިންޓް ހޯދައިގެންނެވެ. ދެ ވަނައިގައި އޮތް ބާސެލޯނާ އަށް 14 މެޗުން ވަނީ 37 ޕޮއިންޓް ލިބިފަ އެވެ. ބާސެލޯނާ އިން މިއަދު އެސްޕަންޔޯލާ ކުޅޭ މެޗުން މޮޅުވެގެން އަލުން އެއް ވަނަ އަށް އެރޭނެ އެވެ.
