އަންނަ މަހުގެ 28 ވަނަ ދުވަހު ބާއްވާ އެމްޑީޕީ ރިޔާސީ ޕްރައިމަރީގައި ވާދަކުރެއްވީ، އިންތިޚާބު ކާމިޔާބުވާނެ ކަމުގެ ޔަގީންކަން އޮތުމުން ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޕްރައިމަރީ އަންނަމަހުގެ 28 ވަނަ ދުވަހު ބޭއްވުމަށް ހަމަޖެހިފައިވާއިރު، އެ ޕާޓީން މިހާރު ވަނީ ޕްރައިމަރީގައި ވާދަކުރައްވާ ކެނޑިޑޭޓުންގެ ނަންތައް އިއުލާންކޮށްފައެވެ. އެމްޑީޕީގެ ޕްރައިމަރީގައި ވާދަކުރައްވާ ކެނޑިޑޭޓުންގެ ނަންތައް ތަރުތީބުކޮށް އިއުލާންކުރިއިރު، ކެނޑިޑޭޓް ނަމްބަރު 1 ލިބިވަޑައިގަތީ ރައީސް ނަޝީދަށެވެ. އަދި ރައީސް ސާލިހުއަށް ލިބިވަޑައިގަތީ ކެނޑިޑޭޓް ނަމްބަރު 2އެވެ.
ޕްރައިމަރީގެ ކެމްޕެއިންގެ ހަރަކާތުގެ ތެރެއިން ރޭ މާލޭގައި "ކުރެއްގެ ދިރުން" މިޝިއާރުގެ ދަށުން ބޭއްވި ބައްދަލުވުމުގައި ރައީސް ނަޝީދު ވަނީ ބައިވެރިވެ ވަޑައިގެން މިއިންތިޚާބުގައި އެމަނިކުފާނު ވާދަކުރައްވާ ސަބަބާއި، އިންތިޚާބާއިމެދު ދެކޭ ގޮތުން ހާމަކުރައްވާފައެވެ. ރައީސް ނަޝީދު ވިދާޅުވީ ދުވަސްކޮޅަށް ޗުއްޓީގައި އުޅުއްވުމަށްފަހު މިހާރު ހުރިހާ ވަގުތެއް ހުސްކުރައްވައިގެން ހުންނެނީ މިއިންތިޚާބަށް ކަމުގައެވެ. އަދި މިއިންތިޚާބު ކާމިޔާބު ވާނެކަމުގެ ފުރިހަމަ ޔަގީންކަން އެބައޮތް ކަމަށް ނަޝީދު ވިދާޅުވިއެވެ.
މި އިންތިޙާބަށް އަޅުގަނޑު ކުރިމަތިލީ ކާމިޔާބުވާނެކަން ޔަޤީންވީމަ. ދެން އަޅުގަނޑު މިކަމުގަ ނިކުމެ އުޅޭނަން. އެންމެ ދުވަހެއްވެސް ހުއްޓާނުލާނަން.
– ރައީސް ނަޝީދު ވިދާޅުވިއެވެ.
ރޭގެ ބައްދަލުވުމުގައި ރައީސް ނަޝީދު ވަނީ ބަހުގެ ހަމަލާތަކެއް އެމަނިކުފާނާއި ވާދަކުރައްވާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ދެއްވާފައެވެ. ރައީސް ނަޝީދު ވިދާޅުވީ ވެރިކަމެއް ބަލިކަށި ވެގެންދަނީ ވެރިކަމުގައި ހުންނަ ފަރާތުގެ މައްޗަށް އޭނާގެ އާއިލީ ނުފޫޒު އިންތިހާއަށް ފޯރުމުންކަމަށެވެ. މިވެރިކަންވެސް ފެނިގެންދަނީ އެއުސޫލުންކަމަށް ރައީސް ނަޝީދު ވިދާޅުވިއެވެ.
ޣާޒީ ރަދުން ޒަމާނުއްސުރެ ވެރިންގެ ޅިޔަން ފަހަރިންނާއި އެމީހުންގެ ފިރިން/އަނބިންގެ ބާރު ފޯރުވުން ވެރީންގެ މައްޗަށް އޮވޭ. އަދި މިގޮތަށް ފޯރުވާ ބާރުވެރިކަން ވަކީން ބޮޑުވެދޭ ވެރިއެއްގެ ޝަޚުޞިއްޔަތުގެ ބަލިކަށިކަމުން.
– ރައީސް ނަޝީދު ވިދާޅުވިއެވެ.
މާދަމާ ނަޝީދު ޕްރައިމަރީ ކެމްޕެއިންގައި ފުރަތަމަ ދަތުރު ފައްޓަވާނެއެވެ. ކުރިއަށް އޮތް ތިން ދުވަހަށް ނަޝީދު ވަޑައިގަތުމަށް ހަމަޖެހިފައިވަނީ ބޮޑުތިލަދުންމައްޗަށެވެ. އެގޮތުން, ހއ, ހދ އަދި ށ.ގެ ރަށްތަކަށް ވަޑައިގަންނަވާނެއެވެ.
Campaign team thakaa badhalukollun. #Anni2023 pic.twitter.com/Qk83SUfUVL
— Mujoo (@mujookeynee) December 27, 2022
ޕްރައިމަރީއާ ހަމައަށް އެމްޑީޕީ ވާސިލުވިއިރު, އެ ޕާޓީގެ ތެރެ ވަނީ ވަރަށް ބޮޑަށް ފަޅިވެފައެވެ. ރައީސް ސޯލިހުގެ ކޮންޓްރޯލް ރައްޔިތުންގެ މަޖިލީހާއި އެމްޑީޕީގެ ގައުމީ މަޖިލީހުގައި ވަރުގަދައަށް އޮތްއިރު, ނަޝީދަށް ވަނީ ޕާޓީން ތެރޭން ހުރަސްތަކާ ކުރިމަތިވެފައެވެ. އަދި އިންތިހާބާ މެދު ގެންދަވަނީ ތުހުމަތުތައް ކުރައްވަމުންނެވެ.
އެގޮތުން, ޕްރައިމަރީގެ އިންސާފުވެރިކަމާ މެދު ނަޝީދާއި އެމަނިކުފާނަށް ތާއިދު ކުރައްވާ ބޭފުޅުން ގެންދަވަނީ ސުވާލު އުފައްދަވަމުންނެވެ. އެންމެ ބޮޑު ސުވާލެއް އޮތީ ވޯޓުލެވޭ އެމްޑީޕީގެ މެންބަޝިޕް ރަޖިސްޓްރީއާ މެދުއެވެ. ނަޝީދު ތުހުމަތު ކުރައްވާ ގޮތުން, އެ ޕާޓީގައި ފެށުނު ދުވަހުން ފެށިގެން ތިބި ގިނަ މެންބަރުންތަކެއް, ސޯލިހަށް ވޯޓު ނުލާނެތީ, ވަނީ ވަކިކޮށްފައެވެ.
