ކުރިއަށް އޮތް އެމްޑީޕީގެ ޕްރައިމަރީގައި ވާދަކުރައްވާ އެމްޑީޕީގެ ރައީސް މުހައްމަދު ނަޝީދު އެޕާޓީގެ މެމްބަރުންނާއި ބުދަ ދުވަހުގެރޭ ބައްދަލު ކުރެއްވުމަށް ހަމަޖެހިއްޖެއެވެ.
އަންނަ މަހުގެ 24 ވަނަ ދުވަހު ބޭއްވުމަށް ހަމަޖެހިފައިވާ ޕްރައިމަރީއަށް ހުޅުވާލީވެސް ރައީސް ނަޝީދު ރާއްޖޭގައި ނޫޅުއްވަނިކޮށެވެ. ޕްރައިމަރީގައި ވާދަކުރައްވާނެކަން އިއުލާންކޮށް، ފޯމުވެސް ރައީސް ނަޝީދުވަނީ ހުށަހަޅުއްވާފައެވެ. ބުދަ ދުވަހުގެރޭ ރައީސް ނަޝީދާއިއެކު ބާއްވާ މިބައްދަލުވުން އޮތީ ސަލްޓަމްޕާކުގައި އެރޭ 20:30 ގައެވެ.
28th December. 8:30pm. Sultan Park. With President @MohamedNasheed
You are invited. #Anni2023 #MDP pic.twitter.com/bQlH16NWUK
— Eva Abdulla 🎈❓ (@evattey) December 26, 2022
މިޕްރައިމަރީގައި ރައީސް ނަޝީދާއި، ވާދަކުރައްވަނީ އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުއެވެ. މިއީ މިހާތަނަށް މިދެބޭފުޅުން ވާދަވެރި އިންތިޚާބެއްގައި ވާދަކުރާ ފުރަތަމަ އިންތިޚާބެވެ. ވެރިކަމުގެ ދައުރު ހަމަވެ، ރިިޔާސީ އިންތިޚާބާއި ކުރިމަތިލާއިރު، ރައީސް ނަޝީދު ގެންދަވަނީ މިސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ. އަދި ރައީސް ޞާލިހާއި އޮތް ގުޅުމަށް ވަރަށް ބޮޑަށް ހީނަރުކަން އައިސް ފެބޭފުޅުންނަށް އެކީގައި މަސައްކަތް ނުކުރެވޭ ވަރަށް ވަނީ ދުރުވެފައެވެ.
އެމްޑީޕީގެ ޕްރައިމަރީގައި ވާދަކުރެއްވުމަށް ނިންމަވައި، އެކަން ރައީސް ނަޝީދު ރަސްމީކޮށް އިއުލާންކުރެއްވީ މި މަހުގެ 18 ވަނަ ދުވަހު އެމްޑީޕީގެ ޕްރައިމަރީގައި ވާދަކުރައްވާ ފަރާތްތަކަށް ފޯމު ހުށަހެޅުމަށް ހުޅުވާލުމުންނެވެ. ރައީސް ނަޝީދު ކެންޑިޑެންސީ ފޯމު ހުށަހަޅުއްވާފައިވާކަން ހާމަކުރެއްވީ ހެންވޭރު ހުޅަނގު ދާއިރާގެ މެމްބަރު ޙަސަން ލަތީފް ކުރެއްވި ޓުވީޓެއްގައެވެ. ޕްރައިމަރީގައި ވާދަކުރައްވަން ފޯމު ހުށަހަޅަން ޖެހެނީ 500 މެމްބަރުންގެ ތާއިދާއެކުއެވެ.
ރައީސް ނަޝީދާއި، އެމަނިކުފާނަށް ތާއީދު ކުރާ މެމްބަރުން ވިދާޅު ވަމުންދަނީ މިއިންތިޚާބު ފަސޭހަ ކަމާއިއެކު ކާމިޔާބު ކުރާނެކަމަށެވެ. ނަމަވެސް ރައީސް ނަޝީދު ވަނީ އެމްޑީޕީގެ ވޯޓުލާ ދަފްތަރާއިމެދު ގިނަ ކަންބޮޑުވުންތަކެއް ފާޅު ކުރައްވާފައެވެ. ރައީސް ޞާލިހު ޕްރައިމަރީގައި ވާދަކުރުމަށް ހުށަހަޅުއްވާފައިވަނީ 20،000 މެމްބަރުންގެ ފޯމާއި އެކުގައެވެ.
