ވ.އާރަށް ކުށްޔަށް ދިން މައްސަލާގައި ކުރީގެ ރައީސް ޔާމީން މައްޗަށް ކުށް ސާބިތުވެއްޖެއެވެ.

މިމައްސަލާގައި މިއަދު ޝަރީޢަތުގައި ގާޒީ ވިދާޅުވެފައިވަނީ ޔޫސުފް ނައީމަށް  އެއްމިލިއަން ޑޮލަރު ރައިސް ޔާމީނަ ދީފައިވާކަން ސާބިތުވާ ކަމަށެވެ. އެކަން ބޭންކް ސްޓޭޓްމަންޓްތަކުން އެނގޭ ކަމަށާއި، ޔާމީން ޔޫސުފް ނައީމްގެ ޗެކް ބަލައިގަތް ކަމާއިމެދު ސުވާލެއް ނެތް ކަމަށެވެ. މިހައިހިސާބުން ޝަރީއަތުން ބަލަން ޖެހެނީ ރައީސުލްޖުމްހޫރިއްޔާގެ މަގާމުގައި ހުންނަ މީހެއްގެ އެކައުންޓަށް މިހައި ގިނަ ފައިސާ ޖަމާވީ ކީއްކުރަންތޯ ކަމަށާއި، ގާނޫނު އަސާސީގައި ރައީސުލްޖުމްހޫރިއްޔާ ކޮށްގެން ނުވާނެ ކަންކަން ބަޔާން ކޮށްފައިވާކަމަށްވެސް މިއަދުގެ ހެނދުނު ދަންފަޅީގެ ޝަރީޢަތުގެ މަޖިލިހުގައި ހުކުމް އިއްވަމުން ގާޒީ ޝަކީލް ވިދާޅުވެފައި ވެއެވެ.

ރައީސް ޔާމީންގެ މައްޗަށް ދައުވާ ސާބިތުވާތީ މިހާރު ދަނީ އަދަބު ކަނޑައެޅުމުގެ މަރުހަލާ ހިނގަމުންނެވެ. ދައުލަތުން އެދިފައިވަނީ ދައުވާގައި ދެވޭ އެންމެ ބޮޑު އަދަބު ދިނުމަށެވެ.

މި މައްސަލާގައި ދައުވާ އުފުލާފައި ވަނީ ރައީސް ޔާމީންގެ އިތުރުން ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމުގެ މައްޗަށެވެ. އާރަށުގެ މައްސަލާގައި ޔާމީންގެ މައްޗަށް މަނީ ލޯންޑަރިންގެ ދައުވާ އާއި ރިޝްވަތު ގަބޫލު ކުރުމުގެ ދައުވާ ދައުލަތުން ކުރެއެވެ. އަދި، ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމަށް ރިޝްވަތު ހިފުމުގެ ދައުވާ ކޮށްފައިވެއެވެ.

މި މައްސަލާގެ އަޑުއެހުންތައް ނިންމާލީ ނޮވެމްބަރު މަހުގެ 30 ވަނަ ދުވަހުއެވެ. ޔާމީންގެ މައްޗަށް އުފުލި ދައުވާގައި ބުނެފައިވަނީ އާރަށް ކުށްޔަށް ދިނުމުން ރައީސް ޔާމީނަށް އެއް މިލިޔަން ޑޮލަރު ރިޝްވަތުގެ ގޮތުގައި ކުރީގެ މަޖިލިސް މެންބަރު ޔޫސުފް ނައީމް ދެއްވިކަމަށެވެ. އަދި މި މައްސަލާގައި ރައްޔިތުން މަޖިލީހުގެ ފެލިދޫ ދާއިރާގެ ކުރީގެ މެމްބަރުން ޔޫސުފް ނައީމްގެ މައްޗަށްވެސް ދައުލަތުން ވަނީ ރިޝްވަތު ދިނުމުގެ ދައުވާ އުފުލާފައެވެ.

މިއަދުގެ ޝަރީއަތުގައި ރައީސް ޔާމިންގެ މައްޗަށް ކުށް ސާބިދު ވުމާއި ގުޅިގެން މިހާރު ކުރިޔަށް ދަނީ އަދަބާއި ގުޅޭގޮތުން ދެފަރާތުން ވާހަކަ ދެއްކުމުގެ މަރުހަލާއެވެ.

އަދަބާއި ގުޅޭގޮތުން ވާހަކަ ދައްކަން ދިން ފުރުސަތުގައި ރައީސް ޔާމިންގެ ފަރާތުންވެސް އަދި ޔޫސުފް ނައީމްގެ ފަރާތުންވެސް އެދިފައިވަނީ ގާނޫނުގައި ކަނޑައަޅާފައިވާ އެންނެ ދިގު މުއްދަތު ކަމުގައިވާ 10 ދުވަހުގެ މުއްދަތެއް ދިނުމަށެވެ. ނަމަވެސް ގާޒީ ޝަކީލް ޝަރީއަތުގެ ހެނދުނު ދަންފަޅި ނިންމަވާ ލައްވަމުން ވިދާޅުވެފައިވަނީ މެންދުރުފަހު 2:00 ގައި ޝަރީއަތުގެ ދެވަނަ މަރުހަލާގައި އަލުން އަދަބާއި ގުޅެގޮތުން ވާހަކަ ދެއްކުމުގެ ފުރުސަތު ދެއްވުމަށްފަހު މިއަދު އަދަބު ކަނޑައަޅާ ހުކުމް އިއްވަވާނެ ކަމަށެވެ.

ތަފްސީލް އަންނަނީ….