ރާއްޖޭގައި ހިނގާފައިވާ، އަދި ހިންގަމުންދާ ވައްކަމާއި ކޮރަޕްޝަންގެ ވާހަކަ އެމްޑީޕީއަށް ދެއްކުން ބަންދުކުރީ މިސަރުކާރުން ކަމުގައި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އަލްއުސްތާޛް އިންތިޔާޒް ފަހުމީ، އިންތި ވިދާޅުވެއްޖެއެވެ.
އޭނާ މިހެން ވިދާޅުވީ ރާއްޖޭގެ ތާރީޚުގައި ހިނގި ކޮރަޕްޝަންގެ އެންމެ ބޮޑު މައްސަލަކަމަށްވާ އެމްއެމްޕީއާރުސީގެ ޚިޔާނާތުގެ މައްސަލައާއި، މި ސަރުކާރުގައި ހިނގިކަމަށް ބުނާ ވެންޓިލޭޓަރުގެ ކޮރަޕްޝަންގެ މައްސަލަ ތަހްގީކޮށް ހުކުމް އިއްވުމުން ފައިސާއަށް ވީގޮތް އެނގޭނެކަމަށާއި، މިސަރުކާރަށް އެކަން ނުކުރެވުނުކަމަށް ވިދާޅުވެ އެމްޑީޕީގެ ރައީސް މުޙައްމަދު ނަޝީދު މިސަރުކާރަށް ވަރަށް ބޮޑަށް ފާޑުވިދާޅުވެ ކުރެއްވި ޓުވީޓަށް ތާއީދު ކުރައްވައި ކުރެއްވި ޓުވީޓެއްގައެވެ.
އިންތި ވިދާޅުވީ ވައްކަމާއި ކޮރަޕްޝަނަކީ އެމްޑީޕީން އަބަދުވެސް ވަކާލާތުކުރާ ބަސްބުނާނެ ކަންތައްތަކެއް ކަމަށެވެ. ނަމަވެސް މިސަރުކާރުން އެމްޑީޕީއަށްވެސް ވައްކަމުގެ ވާހަކަ ދެއްކުން ބަންދުކޮށްފައިވާކަމަށެވެ.
ކޮރަޕްޝަނާއި ވައްކަމުގެ ވާހަކަ ދެއްކުން އެމް.ޑީ.ޕީ. އަށް ބަންދުކުރި ސަރުކާރަކީ މި ސަރުކާރު!
– އިންތި ވިދާޅުވިއެވެ.
އެމްއެމްޕީއާރުސީގެ ޚިޔާނާތުގެ ފައިސާ ހޯދުމަކީ ރައީސް އިބްރާހީމް މުޙައްމަދު ޞާލިޙްގެ ރިޔާސީ ވަޢުދެކެވެ. ނަމަވެސް ސަރުކާރުގެ 4 އަހަރު ފާއިތުވީއިރުވެސް އެއްވެސް ފައިސާއެއް ހޯދިފައި ނުވާކަމަށްބުނެ ބައެއް ފަރާތްތަކުން އަންނަނީ ފާޑުކިޔަމުންވެ. އޭޣެ ތެރޭގައި އެމްޑީޕީގެ ރައީސް މުޙައްމަދު ނަޝީދުވެސް ހިމެނިވަޑައިގަންނަވައެވެ.
އެމްޑީޕީގެ އެތެރޭގެ ރިޔާސީ ޕްރައިމަރީގެ ވާދަވެރިކަން ބޮޑުވެފައިވަނިކޮށް ރައީސް ޞާލިހާއި މިސަރުކާރަށް ފާޑުވިދާޅުވެ އެމްޑީޕީގެ ރައީސް މުޙައްމަދު ނަޝީދު ވިދާޅުވީ އެމްއެމްޕީއާރުސީއާއި ވެންޓިލޭޓަރުގެ ޚިޔާނާތަށް ދަޢުވާކޮށް ހުކުމް އިއްވުމުން ފައިސާއަށް ވީގޮތް ސާފުވާނެކަމަށެވެ. ރައީސް ޞާލިޙްގެ ދައުރު މިހާރު ނިމެނީކަމަށާއި، އަދި މިއެއްވެސް ކަމަކަށް ކާމިޔާބު ތަހްގީގެއް ހިންގާ ދައުވާ އުފުލިފައިނުވާކަމަށް ރައީސް ނަޝީދު ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީއަށް ރައީސް ނަޝީދު ވަނީ މިހާރު ފޯމް ހުށައަޅުއްވާފައެވެ. އަދި ރައީސް ޞާލިޙްވެސް ވަނީ 20،000 މެމްބަރުންގެ ސޮޔާއިއެކު ފޯމް ހުށަހަޅުއްވާފައެވެ.
