ޓުވިޓާރގެ މިހާރުގެ ވެރިޔާ، އަދި ދުނިޔޭގަ ހުރި އެންމެ މުއްސަދި މަހުޖަނު އެލޮން މަސްކުގެ ޚަބަރުތައް ކަވަރު ކުރަމުންދާ އެމެރިކާގެ ގިނަ އަދަދެއްގެ ނުސްވެރިންތަކެއް ކުއްލި ގޮތަކަށް ޓުވިޓަރއިން ސަސްޕެންޑް ކުރިތާ 2 ދުވަސް ފަހުން ނޫސްވެރިންގެ އެކައުންޓްތައް އަލުން އެކްޓިވޭޓް ކޮށްފިއެވެ.

ކުއްލި ގޮތަކަށް ޓުވިޓަރއިން ދުނިޔޭގެ މަޝްހޫރު ބައެއް ނުސްވެރިންގެ ހޭންޑްލްތައް ސަސްޕެންޑް ކުރުމާއި ގުޅިގެން އެ ޕްލެޓްފޯމަށް ވަނީ ބޮޑެތި ފާޑުކިޔުންތަކެއް އަމާޒު ވެފައެވެ. މީގެ ތެރޭގައި ގައުމުތަކުގެ ސަރުކާރުތަކާއި، ސަރުކާރުތަކުގެ އޮފިޝަލުންނާއި، ނޫސްވެރިކަމުގެ ޖަމިއްޔާތައްވެސް ހިމެނެއެވެ. ގިނަ ބަޔަކު ބުނެފައިވަނީ ޓުވިޓަރއިން ޚިޔާލު ފާޅުކުރުމުގެ މިނިވަންކަމަށް ހުރަސް އަޅަމުންދާ ކަމުގައެވެ.

ކުރިން އިންޒާރު ދިނުމަކާ ނުލާ، މިހަފްތާގެ ބުރާސްފަތި ދުވަހު، ޓުވިޓަރއިން މި ނޫސްވެރިން ސަސްޕެންޑް ކޮށްފައިވަނީ، އޭނާ އުޅެމުންދާ ތަންތަނާއި ގުޅުންހުރި އަމިއްލަ މައުލޫމާތު (ޕްރައިވެޓް އިންފޮމޭޝަން) މި ނޫސްވެރިން އާންމު ކުރަމުން ދިއުމުގެ ސަބަބުން އޭނާގެ އާއިލާގެ ސަލާމަތަށް ނުރައްކާ ވެފައިވާކަމަށް މަސްކު ވިދާޅުވެއެވެ.

އެއަށްފަހު މަސްކުވަނީ، މި ނޫސްވެރިންގެ އެކައުންޓުތައް ސަސްޕެންޑް ކޮށްފައި ބާއްވަންވީ ކިހާ ދުވަހަކަށްތޯ ބެލުމަށް ޓުވިޓަރ ޕޯލްއެއް (ޚިޔާލު ހޯދުމުގެ ވޯޓެއް) ކުރިޔަށް ގެންގޮސްފައެވެ. މި ޕޯލްއިން ދެއްކި ގޮތުގައި، ގިނަބަޔަކު ބޭނުންވަނީ މި ނޫސްވެރިންގެ އެކައުންޓުތައް ވަގުތުން ވަގުތަށް އެކްޓިވޭޓް ކޮށްދިނުމަށެވެ.

އާންމުން އެމީހުންގެ ބަސް ބުނެފި. އަހަރެން ބޯކޮޅު ބަލަމުންދިޔަ ނޫސްވެރިންގެ އެކައުންޓްތައް އަލުން އެކްޓިވޭޓް ކުރެވޭނެ.

މަސްކު ހޮނިހިރުދުވަހު ކުރި ޓުވީޓެއްގައި ވިދާޅުވެފައި ވެއެވެ.

The people have spoken.

Accounts who doxxed my location will have their suspension lifted now. https://t.co/MFdXbEQFCe

— Elon Musk (@elonmusk) December 17, 2022

ޓުވިޓަރއިން ކުއްލި ގޮތަކަށް ސަސްޕެންޑް ކުރި ނޫސްވެރިންގެ ތެރޭގައި، ދަ ނިއުޔޯކު ޓައިމްސް، ދަ ވޮޝިންޓަން ޕޯސްޓު، ސީއެންއެން، ދަ އިންޓަރސެޕްޓް، ވޮއިސް އޮފް އެމެރިކާގެ ރިޕޯޓަރުން ހިމެނެއެވެ.

ޓުވިޓަރއިން ނޫސްވެރިންގެ އެކައުންޓުތައް ސަސްޕެންޑް ކުރުމާއި ގުޅިގެން މަސްކަށް ފާޑުކީ ގައުމުތަކުގެ ތެރޭގައި ޖާމަނީ، ފްރާންސް، އިނގިރޭސިވިލާތް އަދި ޔޫރަޕިއަން ޔޫނިއަން ހިމެނެއެވެ.

ޓުވިިޓަރއިން ނޫސްވެރިންގެ އެކައުންޓުތައް ސަސްޕެންޑް ކުރުމާއި ގުޅިގެން، ފްރާންސްގެ މިނިސްޓަރ އޮފް އިންޑަސްޓްރީ ރޮލާންޑް ލެސްކިއު ހުކުރު ދުވަހު ވިދާޅުވެފައިވަނީ އޭނާ ޓުވިޓަރގައި ހަރަކާތްތެރިވަމުން އަންނަ އައުން ނިމުމަކަށް ގެނައުމަށް ނިންމާފައި ވާކަމުގައެވެ.

މަސްކު ނޫސްވެރިންގެ އެކައުންޓުތައް ސަސްޕެންޑް ކުރުމާއި ގުޅިގެން އޭގެ އަސަރުވަނީ އޭނާގެ އިލެކްޓްރިކް ކާރު ކުންފުނި ޓެސްލާރއަށްވެސް ވަރަށް ނުރަގަޅުކޮށް ކޮށްފައެވެ. މިގޮތުން ޓެސްލާރގެ ޝެއަރ ހިއްސާގެ ބާޒާރުގައި ހުކުރުދުވަހުވަނީ 4.7 އިންސައްތަ ދަށަށް ގޮސްފައެވެ. މިއީ 2020 ވަނަ އަހަރުގެ މާރޗް މަަހަށްފަހު ކުންފުނީގެ ހިއްސާ އެންމެ ދަށަށްދިޔަ ހަފްތާއެވެ.