ޑައިރެކްޓަރު އިމްތިޔާޒް އަލީގެ ކުރިއަށް އޮތް ފިލްމު "ޗަމްކިލާ" އަށް ބަތަލާ ޕަރިނީތީ ޗޯޕްޅާ އާއި ލަވަކިޔުންތެރިޔާ އަދި އެކްޓަރު ދިލްޖީތު ދޮސަންޖާ ހަމަޖައްސައިފިއެވެ.
މީޑިއާ ޕޯޓަލެއްގައި ރިޕޯޓްކޮށްފައިވާ ދިލްޖީތު އާއި ޕަރިނީތީ ވަނީ އެކުގައި ގިނަ ވޯކްޝޮޕްތަކެއް ވެސް ނިންމާފައެވެ. މި ފިލްމުގެ ޝޫޓިން ދެ މަސް ދުވަހުގެ މުއްދަތަށް ކުރިއަށް ގެންދާނެއެވެ. ދެމީހުން ވެސް ވަނީ މި ފިލްމް އަށް ވަރަށް ބޮޑަށް ތައްޔާރު ވެފައިއެވެ.
މި ފިލްްމަކީ އިންޑިއާގެ ކުރީގެ ޕަންޖާބީ ލަވަކިއުންތެރިޔާ އަމަރް ސިންގް ޗަމްކީލާގެ ބަޔޮޕިކެކެވެ. އަމަރް ސިންގް އަކީ ލަވަ ކިއުމުގެ އިތުރުން ލަވަ ލިޔެ އަދި ލަވަ ކޮމްޕޯޒްވެސް ކުރި ކުޅަދާން ލަވަ ކިއުން ތެރިއެކެވެ.
1988 ވަނަ އަހަރު އަމަރް ސިންގް އާއި އޭނާގެ އަންހެނުން މަރްޖޯތާއި އެމީހުންގެ ބޭންޑްގެ ދެ މެމްބަރަކު ވަނީ މަރާލާފައެވެ. މިހާތަނަށްވެސް ފުލުހުންނަށް ވަނީ އެކަން ކުރި މީހުން އަތުލައި ގަނެވޭގޮތް ނުވެފައެވެ.
މިއީ ޕަރީނިތީ އާއި އިމްތިޔާޒް އެކުގައި މަސައްކަތް ކުރާ ފުރަތަމަ ފިލްމެވެ. ޕަރިނީތީ އެންމެ ފަހުން ފެނިގެން ގޮސްފައިވަނީ މިއަހަރު ރިލީޒް ކުރި ފިލްމް "އުޗާއީ" އިންނެވެ.
ކޮމެންޓު ފޮނުވާ