އޯގަސްޓްމަހުގެ 7 ވަނަ ދުވަހުގެ ރޭ އަނިޔާވެރިގޮތަކަށް މަރާލާފައި އޮއްވާ ފެނުނު ޝިއާއު މުހައްމަދުގެ މަރުގެ މައްސަލާގައި ދައުވާކުރުމާމެދު މިމަހު ގޮތެއް ނިންމާނެކަމަށް ޕީޖީ އޮފީހުން ބުނެފިއެވެ. ޝިއާއުގެ މަރުގެ މައްސަލާގައި ދައުލަތުން ދައުވާކުރަނީ ފ. ނިލަންދޫ، ފިނިފެންމާގޭ، ޢުމުރުން 23 އަލީ ޝާހިލްއަށެވެ.
މުރުން 22 އަހަރުގެ ޝިއާއު މުހައްމަދު ސައީދު (ޝިއާ) މަރާލާފައި އޮތްވާ ފެނުނީ ހ. ޝީރީންވިލާގައި ހުރި އެޕާޓްމަންޓަކުންނެވެ. މިއީ ރާއްޖޭގައި ފަހުގެ ތާރީޚެއްގައި ހިންގި އެންމެ ރަހުމުކުޑަ ގަތުލުކަމަށް މަންޒަރު ދުށް ބައެއް ފަރާތްތަކުން ބުނެފައިވެއެވެ.
ޝިއާއު ސައީދުގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ފޮނުވީ އޯގަސްޓް މަހުގެ 11 ވަނަ ދުވަހުއެެވެ. ފުލުހުން ވިދާޅުވީ ޝިއާއުގެ ޕޯސްޓްމޯޓަމްގެ ވަގުތީ ރިޕޯޓް މިމަހުގެ 17 ވަނަ ދުވަހު ލިބިފައިވާކަމަށެވެ. އަދި ފޮރެންސިކް ތަހުލީލުތައް ދަނީ ކުރެވެމުންކަމަށް ފުލުހުން ވަނީ ވިދާޅުވެފައެ. މުޅި މައްސަލައިގެ ތަހުގީގް ނިންމައި ޝަރީއަތަށް ހުށަހެޅުމުގެ މަސައްކަތް ކުރަމުންދާކަމަށްވެސް ފުލުހުންވަނީ ވިދާޅުވެފައެވެ.
ޝިއާއުގެ މަރުގެ މައްސަލައިގައި އަލީ ޝާހިލް ވަނީ ޝަރީއަތް ނިމެންދެން ބަންދުކުރަން ކްރިމިނަލް ކޯޓުން ޢަމުރުކޮށްފައެވެ. ޝިއާއު މަރާލަން ބޭނުންކުރިކަމަށް ބެލެވޭ ހަތިޔާރުތަކެއް ހޯދާފައިވާކަމަށް ފުލުހުން ވަނީ މިމަރާއި ގުޅިގެން ބޭއްވި ނޫސްވެރިންގެ ބައްދަލުވުގައި ވިދާޅުވެފައެވެ.
މިމައްސަލައިގެ ތުހުމަތުގައި ޝާހިލް ހައްޔަރުކުރިއިރުވެސް އޭނާ ހުރީ މަސްތުގެ ހާލަތުގައިކަމަށާއި، އަދި މިމައްސަލައިގައި އޭނާ ނޫން އިތުރު މީހަކަށް ތުުހުމަތު ނުކުރެވޭކަމަށެވެ. ފުލުހުން ވަނީ ޝަހިލްގެ މައްޗަށް ކުށް ސާބިތުވާވަރަށް ހެކި ލިބިފައިވާކަމަށް ބުނެފައެވެ. ނަމަވެސް މަރުގެ މޯޓިވް އަދި ދެނެގަނެވިފައިނުވާކަމަށް ފުލުހުން ބުންޏެވެ.
