ފުލުހުންނަށް ހުށަހެޅިފައިވާ މައްސަލައަކާ ގުޅިގެން ނޮޅިވަރަމްފަރުގެ ސަހަރާ ބަލައި ފާސްކޮށްފިއެވެ.
ފުލުހުން ވިދާޅުވެފައިވަނީ، ފުލުހުންނަށް ހުށަހެޅިފައިވާ މައްސަލައަކާ ގުޅިގެން ރޭގެ ވަގުތެއްގައި ނޮޅިވަރަންފަރުގެ ސަހަރާ ބަލައި ފާސްކޮށްފައިވާނެކަމަށެވެ. އެތަން ބަލައި ފާސްކުރީ ރަށުގެ ކައުންސިލުގެ އެހީތެރިކަމާއެކުކަމަށްވެސް ފުލުހުން ބުނެއެވެ. އަދި ހުށަހެޅިފައިވާ މައްސަލަ ފުލުހުން އަންނަނީ ތަހްޤީޤުކުރަމުންކަމަށްވެސް ފުލުހުން ބުނެއެވެ. އެހެންނަމަވެސް އެއީ ކޮން މައްސަލައެއްކަމެއް ފުލުހުން ނުބުނެއެވެ.
ނޮޅިވަރަމްފަރު ކައުންސިލްގެ ރައީސް އަބްދުﷲ ނަދީމާ ޙަވާލާދީ ބައެއް މީޑިއާތަކުގައި ވަނީ ރޭ 23:30 އެހާކަންހާއިރު ފުލުހުން ތިބެގެން އާންމުންގެ ބަޔަކު އެރަށު ސަހަރާ ކޮނެފައިވާ ކަމަށެވެ. އެކަން އެފަރާތްތަކުން ކޮށްފައިވަނީ "ރުގްޔާ" ކުރުމުގެ ނަމުގައި ކަމަށް ނަދީމް ވަނީ ވިދާޅުވެފައެވެ.
