މިދިޔަ ޖޫން މަހުގެ 21ވަނަ ދުވަހު ޔޯގާ ދުވަސް ނފާހަގަކުރަން ގަލަޅު ދަނޑުގައި ކުރިއަށް ގެންދިޔަ ހަރަކާތާ ގުޅިގެން ހިނގި ހަމަނުޖެހުމުގައި އިދިކޮޅު ޕީޕީއެމްގެ ދައުރެއް ނެތްކަމަށް އިލެކްޝަންސް ކޮމިޝަނުން ނިންމައިފިއެވެ.

އިލެކްޝްންސް ކޮމިޝަނުގެ ރައީސް ފުވާދު ތައުފީޤާ ޙަވާލާ ދީ ބައެއް މީޑިއާތަކުން ރިޕޯޓުކޮށްފައިވާގޮތުގައި މިކަމާ ގުޅިގެން ބެލި މައްސަލާގައި ފާހަގަ ވެފައިވަނީ އެ ހަމަނުޖެހުމަކީ ޕީޕީއެމްގެ ބައިވެރިވުމެއް އޮތްކަމެއް ނޫންކަމަށެވެ. ޕީޕީއެމްއަށް ނިސްބަތްވާ ބައެއް މީހުން އެދުވަހުގެ ބައެއް ކަންކަމުގައި ބައިވެރިވިޔަސް އެކަމަށް ޕީޕީއެމްއިން ތާޢީދުކޮށްފައި ނުވާކަމަށްވެސް ފުވާދާ ހަވާލާދީ ބައެއް މީޑިއާތަކުގައި ވެއެވެ.

ޔޯގާ ހަރަކާތަކީ އިސްލާމްދީނާ ޚިލާފު ޝިރުގެ ޢަމަލެއްކަން ފާހަގަކުރައްވައި ދީނީ ޢިލްމުވެރިން އަޑުއުފުއްލަވަމުން ދަނިކޮށް ކިޙަރަކާތް ހިންގުމުން އެކަމާ ދެކޮޅަށް ޢާންމުންގެ ތެރެއިން އެތައްބަޔަކުވަނީ ނުކުމެ އެއްވެ އަޑުއުފުލާފައެވެ. އަދި އެޙަރަކާތް ހިންގި ގަލޮޅު ދަނޑުކައިރިއަށް އެއްވި މީހުން ވަނީ ދަނޑަށްވަ ޙަރަކާތް ހުއްޓުވާފައެވެ. އެއީ ބޮޑު ހަމަނުޖެހުމެއްކަމަށްބުނެ ފުލުހުން އެމައްސަލަ ބަލަންފެށިއެވެ. އަދި ބައެއް މީހުން ހައްޔަރުކުރިއެވެ. އެހެންނަމަވެސް އެކަމުގައި އެއްވެސް މީހަކަށް ހާނީއްކައެއްވެފައި ނުވެއެވެ.

މިހާދިސާގައި މަޝްހޫރު ދީނީ ޢިލްމުވެރިޔާ ޝައިޚް ނިޝާނާއި ޝައިޚް ފަޟުލޫން ހައްޔަރުކުރިއެވެ. އަދި ޢާންމުންގެ ބައެއް މީހުންނާއި ޕީޕީއެމްގެ ބައެއް މީހުންވެސް ހައްޔަރުކުރިއެވެ. އަދި މިހަމަނުޖެހުމުގައި ޕީޕީއެމްއިން ބައިވެރިވިކަމަށް ދޭހަވާ މޭރުމަކުން ފުލުހުން ވާހަކަދެއްކިއެވެ. ޕީޕީއެމްއިންއައީ އެ ތުހުމަތުތައް ދޮގުކުރަމުންނެވެ.