ސަރުކާރުން އަބަދުވެސް މަސައްކަތް ކުރާނީ މަސްވެރިންގެ ކަންބޮޑުވުންތަކަށް ހައްލު ހޯދައި މަސްވެރިންނަށް ލިބޭ ފައިދާ އިތުރު ކުރުމަށްކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
މިއަދު ފާހަގަކުރާ މަސްވެރިންގެ ދުވަހުގެ މުނާސަބަތުގައި ރައީސް ކުރެއްވި ޓްވީޓެއްގައި ވަނީ މަސްވެރިންގެ ދުވަހުގެ ތަހުނިޔާއާއި ހެޔޮއެދުންތައް މަސްވެރިންނާއި މި ސިނާޢަތުގައި ޙަރަކާތްތެރިވާ ހުރިހާ ފަރާތްތަކަށް އަރިސްކުރައްވާފައެވެ. ރައީސް ވިދާޅުވީ، ސަރުކާރުން އަބަދުވެސް މަސައްކަތް ކުރާނީ މަސްވެރިންގެ ކަންބޮޑުވުންތަކަށް ހައްލު ހޯދައި މަސްވެރިންނަށް ލިބޭ ފައިދާ އިތުރު ކުރުމަށްކަމަށެވެ.
މަސްވެރިންގެ ދުވަހުގެ ތަހުނިޔާއާއި ހެޔޮއެދުންތައް މަސްވެރިންނާއި މި ސިނާޢަތުގައި ޙަރަކާތްތެރިވާ ހުރިހާ ފަރާތްތަކަށް އަރިސްކުރަން.ސަރުކާރުން އަބަދުވެސް މަސައްކަތް ކުރާނީ މަސްވެރިންގެ ކަންބޮޑުވުންތަކަށް ހައްލު ހޯދައި މަސްވެރިންނަށް ލިބޭ ފައިދާ އިތުރު ކުރުމަށް.
— Ibrahim Mohamed Solih (@ibusolih) December 10, 2022
މަސްވެރިންގެ ދުވަހުގެގޮތުގައި ފާހަގަކުރަނީ ކޮންމެ އަހަރެއްގެ ޑިސެމްބަރު މަހުގެ 10 ވަނަ ދުވަހެވެ. މި ދުވަސް ކޮންމެ އަހަރަކުވެސް އަންނަނީ ކުލަގަދަކޮށް ފާހަގަކުރަމުންނެވެ. އެގޮތުން މިދުވަސް މިއަހަރު ޤައުމީ ފެންވަރުގައި ފާހަގަކުރަނީ ގދ.ފަރެސްމާތޮޑާގައެވެ. އެދުވަސް ފާހަގަކުރުމަށް ރައީސް މާދަމާ ފަރެސްމާތޮޑާއަށް ވަޑައިގަންނަވާނެއެވެ.
މަސްވެރިންގެ ދުވަސް ފާހަގަކުރާއިރު މަސްވެރިންގެ އެންމެ ބޮޑު ކަންބޮޑުވުމަކީ، ސަރުކާރުން ވަޢުދުވިގޮތަށް މަހަށް ހަމައަގު ނުލިބުމެވެ. ޚައްޞަކޮށް ދެކުނުގެ އަތޮޅުތަކަށް މަސްވެރިކަން ރަނގަޅުވެ، ބާނާ މަސްކޮޅު ނުކިރުވި އުކާލަންޖެހުމުގެ ކަންބޮޑުވުން މަސްވެރިން އަންނަނީ ފާޅުކުރަމުންނެވެ.
ސަރުކާރުން އަންނަނީ އެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ފެލިވަރާއި ކޫއްޑޫގެ ކެޕޭސިޓީ އިތުރުކުރުމުގެ މަޝްރޫޢު ދަނީ ހިންގަމުންނެވެ. އަދި އައިސްޕްލާންޓްތައް ހެދުމުގެ މަޝްރޫޢުވެސް ދަނީ ހިންގަމުންނެވެ.
ކޮމެންޓު ފޮނުވާ