ޓައިމްސް މެގަޒިންއިން މިއަހަރު ހޮވާ، އަހަރުގެ ޝަޚުސިއްޔަތަކަށް ޔޫކުރެއިންގެ ރައީސް ލޮޑޮމީރު ޒެލެންސްކީ ހޮވައިފިއެވެ. ޒެލެންސްކީ ގެންދަވަނީ 2019ވަނަ އަހަރުން ފެށިންގެ ޔޫކުރެއިންގެ ރައީސްކަމުގެ މަގާމުގައި ހުންނަވަމުންނެވެ.

ކުރިން ހެއްވާ މަޖާބައި ކުޅެމުން އައި ކޮމޭޑިއަން، ޒެލެންސްކީއަކީ ވާހަކަ ލިޔުންތެރިއެއްގެ އިތުރުން އެކްޓް ކުރުމާއި ޕްރޮޑިއުސަރއެއްވެސް މެއެވެ. އޭނާގެ ލީޑަޝިޕް އެންމެ ފުޅާ ދާއިރާއެއްގައި ފެނިގެން ގޮސްފައިވަނީ ފާއިތުވެދިޔަ ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް ދޭންފެށި އުދުވާނީ ހަމަލާތަކަށްފަހު، ހިގަމުންދާ ޔޫކުރެއިން ހަގުރާމާގައެވެ.

ދުނިޔޭގެ އޮތް އެންމެ ވަރުގަދަ އަސްކަރީ ބާރާއި ދެކޮޅަށް، އަދި ދުނިޔޭގަ އޮތް އެންމެ ވަރުގަދަ ނިއުކުލިއަރ ބާރާއި ދެކޮޅަށް ޔޫކުރެއިންގެ މިނިވަންކަން ހިމާޔަތުގައި އެގައުމުގެ ރައްޔިތުން މިއަދު ކުރަމުންދާ ހަގުރާމައިގެ އެންމެ ކުރީގައި މިއަދު ހުންނެވީ، ކޮމީޑިއަންއެއްގެ ރޯލު ކުޅުނު، އެހެންނަމަވެސް މިއަދު ޔޫކުރެއިންގެ ރައީސް ވޮލޮޑޮމިރު ޒެލެންސްކީއެވެ.

އަދި ރަޝިއާގެ ވަރުގަދަ އަސްކަރިއްޔާއިން ޔޫކުރެއިންގެ ވެރިރަށް ހިފުމަށް ކުރަމުންދާ ވަރުގަދަ ހަގުރާމާގައި ދޫނުދީ، ޔޫކުރެއިންގެ ކޮމާންޑަރއިން ޗީފްގެ ހައިސިއްޔަތުން ޒެލެންސްކީ ދައްކަވަމުން ގެންދަވާ ލީޑަރޝިޕަށް ދުނިޔޭގެ ލީޑަރުންގެ ތައުރީފްވެސް ވަނީ އޮހިގެން ގޮސްފައެވެ. އަދި ބައެއް ފަރާތްތަކުން އޭނާ ސިފަކުރަމުންދަނީ، އޭނާއަކީ ޔޫރަޕް އެކަތިގަނޑަކަށް ހެއްދެވި ލީޑަރުގެ ގޮތުގައެވެ.

ރަޝިއާއިން ޔޫކުރެއިންގައި ކުރަމުންދާ ހަގުރާމައަށް މިހާރު 9 މަސް ފާއިތުވެގެން ގޮސްފައިވާއިރު، މި ހަމަލާތައް ފެށިގެން އައިއިރު، އެންމެ ފުރަތަމަ 4 ދުވަހުގެ ތެރޭގައި ވެރިރަށް ކީވް ރަޝިއާގެ ބާރުގެދަށަށް ދާނެކަމަށް ލަފާކޮށް، ޒެލެންސްކީއަށް ރައްކާތެރިކަން ފޯރުކޮށްދީ، އޭނާ އެމެރިކާއަށް ދިއުމަށް އެމެރިކާއިން އޭނާއަށް ދައުވަތު ދީފައި ވެއެވެ. އަދި ތުރުކީންވެސް ޒެލެންސްކީއަށް އެގައުމުގައި ރައްކާތެރިކަން ފޮރުކޮށްދިނުމަށް ހުށަހަޅާފައި ވެއެވެ.

އެހެންނަމަވެސް، ޒެލެންސްކީ ވަނީ މިހުށަހެޅުންތައް ރައްދުކޮށް، އޭނާ ބޭނުންވަނީ ގައުމު ދޫކޮށް ދިއުމަށް ނޫންކަމަށާއި، ބޭނުމީ ހަގުރާމަ ކުރާނެ ހަތިޔާރުކަމުގައި ވިދާޅުވެފައެވެ. ކުރިން، ހެއްވާ މަޖާބައި ކުޅެމުންއައި ފިލްމީތަރި ވިދާޅުވަމުން ގެންދަވާފައިވަނީ، އެންމެ ފަހު ނޭވައާއި ހަމައަށްވެސް ރަޝިއާއާއި ދެކޮޅަށް ހަގުރާމަ ކުރައްވާނެ ކަމުގައެވެ.

ރަޝިއާއިން ޔޫކުރެއިންއާއި ދެކޮޅަށް ހިންގަމުންދާ އުދުވާންއާއި ދެކޮޅަށް ޒެލެންސްކީ ދައްކަވަމުންދާ ހިތްވަރާއި، އަދި ހަނގުރާމައިގެ ހާލަތުގައި އެގައުމު އެއްބައިވަން ކުރުވުމަށް އޭނާ ދައްކަވާފައިވާ ލީޑަރޝިޕަށް ސޯޝަލް މީޑިއާގައިވެސް ގިނަ ބަޔަކު ވަނީ ތައުރީފް ކޮށްފައެވެ.