މިދުވަސްވަރު ރާއްޖޭގެ ޖައްވުގެ ވައި ނުސާފުވެ ފުސްވެފައިވާތީ، ގެއިންބޭރުގައި އުޅޭ ވަގުތުތަކުގައި ރައްކާތެރިވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފިއެވެ.
މިދުވަސްވަރު ރާއްޖެ ސަރަޙައްދުގެ ޖައްވު ނުސާފުވެ ފުސްވެފައިވަނީ ހުޅަނގުން އިރުމައްޗަށް ވައި ބަދަލުވުމާއެކު ހިމާލާ ފަރުބަދަ ހުންނަ ސަރަހައްދުން ވަޔާއެކު ދައުރުވަމުންދާ ހިރަފުހާއި ދުން، ރާއްޖެއާ ހަމައަށް އަންނާތީކަމުގައި މޫސުމާއި ބެހޭ ޤައުމީ އިދާރާއިން ބުނެފައިވެއެވެ.
ޢާންމުކޮށް ހުންނަ ވަރަށްވުގެ ރާއްޖޭގެ ޖައްވު ނުސާފުވެ، ދުރު ފެންނަ މިންވަރު ދަށްވެފައިވާކަމަށް ޢާންމުންވެސް ފާހަގަކުރެއެވެ. މިކަމުގެ ސަބަބުން ސިއްޙީގޮތުން ކުރިމަތިވެދާނެ މައްސަލަތަކުން ސަލާމަތްވުމަށް ފިޔަވަޅު އެޅުމަށް ހެލްތު ޕްރިޓެކްޝަން އެޖެންސީ (އެޗްޕީއޭ)އިން ވަނީ އިލްތިމާސްކޮށްފައެވެ.
އެގޮތުން ވައި ސާފުކަމުގެ މިންވަރު ބެލުމަށް މިނިސްޓްރީ އޮފް އެންވަޔަރަންމަންޓް އެންޑް ޓެކްނޮލޮޖީގެ https://iqair.com/maldives މިލިންކް އިން ނުވަތަ IQAir Visual އެޕް އަޅައިގެން ވައިގެ ސާފުކަން ބެލުމަށާއި، ރައްކާތެރިވުމަށް އެޗްޕީއޭއިން އިލްތިމާސްކުރެއެވެ.
— Health Protection Agency (@HPA_MV) December 2, 2022
އެޗްޕީއޭއިން އިލްތިމާސްކުރަނީ ހިރަފުހާއި ދުމުގެ ސަބަބުން ނޭވާލުމުގައި މައްސަލައެއް ކުރިމަތިވެދާނެތީ ރައްކާތެރިވުމަށެވެ. މިހާރުގެ ޙާލަތަށް ބަލާއިރު ދުނިޔޭގެ ވައިގެ ސާފުމިން ވަޒަންކުރާ "އައި.ކިއު އެއަރ"ގެ މިންގަނޑުން ބަލާއިރު ރާއްޖޭގެ ބައެއް ސަރަޙައްދުތަކުގެ ވައިގެ ތަޣައްޔަރުކަން ހުރީ 3 ވަނަ ދަރަޖައިގައެވެ.
އެހެންކަމުން ރައްކާތެރިކަމުގެ ފިޔަވަޅުއެޅުގެ ގޮތުގައި ، ފުއްޕާމޭގެ ބަލިތަކާއި ހިތުގެ ބަލި، އެލަރޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަ ނުކުރުމަށް އެޗްޕީއޭއިން އިލްތިމާސްކުރެއެވެ. އަދި ބޭރަށް ނިކުންނަންޖެހޭ ހާލަތުގައި ރައްކާތެރި މާސްކު އެޅުމާއި، ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަ ވަގުތު ހޭދަ ނުކުރުމާއި ތުއްތު ކުދިން ބޭރަށް ނުނެރުމާއި ގޭގެ ދޮރުތައް ލައްޕާފައި ބެހެއްޓުމާއި ބޭރުގައި ކުޅިވަރު ކުރުމާއި ކަސްރަތު ކުރުން ފަދަ ކަންކަންކުރުން މަޑުޖައްސާލުމަށް އެޗްޕީއޭއިން އިލްތިމާސްކުރެއެވެ.
